Ёва 5 разьдзел
Кніга Ёва
Пераклад Чарняўскага 2017 → Пераклад Антонія Бокуна
Дык крычы, калі ёсць той, хто табе адкажа! Да каго са святых звернешся ты?
Дык крычы, калі ёсьць той, хто адкажа табе? Да каго са сьвятых ты зьвернешся?
Бо бязглуздага забівае гняўлівасць, а неразумнага губіць зайздрасць.
Бо неразумнага забівае гняўлівасьць, а дурнога губіць зайздрасьць.
Я бачыў бязглуздага, трывала ўкаранёнага, і пракляў я дом яго ў той жа час.
Я бачыў, як дурны разжываецца, але ў момант спарахнеў дом ягоны.
Далёка будуць сыны яго ад збаўлення, і будуць іх штурхаць у браме, і не будзе таго, хто б выбавіў.
Сыны ягоныя без ратунку, іх топчуць у браме, і няма каму ратаваць іх.
Ураджай яго з’есць галодны, а самога яго ўзброены схопіць, і прагныя вып’юць багацце яго.
Ураджай ягоны зьесьць галодны, і з-за агароджы схопіць, і прагны праглыне багацьце ягонае.
Бо не з пылу бярэцца няшчасце, і не з зямлі вырастае пакута,
Ня з пылу бярэцца няшчасьце, і не з зямлі расьце гора.
але чалавек спараджае працу, як птушкі ўзнімаюцца ў палёт.
Але чалавек нараджаецца на пакуты, як зьнічкі — каб падымацца ўгору.
З гэтай прычыны я буду прасіць Госпада і ўзнясу прамову сваю да Бога,
Таму я буду прасіць Бога, і да Бога ўзьнясу справу маю.
Які чыніць вялікае, і недаследнае, і дзівоснае без ліку;
Ён творыць рэчы недасьледныя і вялікія, і цуды незьлічоныя.
Які дае дождж на аблічча зямлі і абмывае водамі палеткі;
Ён дае дождж на аблічча зямлі і поіць палеткі вадою.
Які пакорлівых ставіць высока, а тужлівых падтрымлівае выратаваннем;
Ён падымае прыніжаных высока, і тых, што смуткуюць, суцяшае збаўленьнем.
Які разбівае намеры ліхадзеяў, каб не змаглі рукі іх выканаць тое, што пачалі;
Ён разьбівае намеры ліхотнікаў, каб не змаглі рукі іхнія выканаць тое, што задумалі.
Які ловіць мудрых у хітрасці іх і змову нягоднікаў разбівае.
Ён ловіць хітрых у глупоце іхняй, і змову крывадушнікаў робіць марнай.
Днём яны забягуць у цемру і, быццам уночы, будуць навобмацак ісці апоўдні.
Удзень падаюць у цемру, і быццам уначы, навобмацак ідуць апоўдні.
Затое Ён выратуе няшчаснага ад меча вуснаў іх і ад рукі пераследніка — беднага;
Ён ратуе беднага ад мяча, і бедака — ад рукі нахабніка.
і будзе спадзяванне няшчаснаму, несправядлівасць жа закрые рот свой.
І ёсьць надзея для ўбогага, а крыўда зачыняе вусны свае.
Шчасны чалавек, якога дакарае Бог; дык ушчуваннем Усемагутнага не пагарджай.
Шчасьлівы чалавек, якога дакарае Бог; таму навучаньнем Усемагутнага не пагарджай.
Бо Ён раніць і лечыць, Ён б’е, і рукі Яго аздараўляюць.
Ён раніць, і Ён лечыць, Ён ударае і аздараўляе Сам рукамі Сваімі.
Ад шасці бед збавіць цябе, і ў сёмы раз не кране цябе няшчасце.
Ад шасьці бедаў збавіць цябе, і ў сёмы раз не кране няшчасьце цябе.
У голад Ён выбавіць цябе ад смерці, а ў час вайны — ад рукі меча.
У голад Ён захавае цябе ад сьмерці, і ў час вайны ад мяча ўратуе.
Усцеражэшся ты ад бізуна языка і не збаішся спусташэння, калі яно прыйдзе.
Усьцеражэшся ты ад языка кусьлівага і ня будзеш баяцца спусташэньня, калі яно прыйдзе.
У час спусташэння і голаду будзеш ты смяяцца ды не будзеш баяцца звяроў зямных.
У час спусташэньня і голаду будзеш ты сьмяяцца і ня будзеш баяцца зьвяроў палявых.
Але з камянямі палявымі дамова твая і звяры зямныя будуць да цябе прыязныя.
З камянямі палявымі дамова твая, і зьвяры дзікія будуць прыязныя табе.
І ты даведаешся, што палатка твая ў супакоі, і, наведваючы жытло сваё, не дапусціш памылкі.
І ты даведаешся, што намёт твой у супакоі, і, наведваючы жытло тваё, ня знойдзеш нястачы.
І даведаешся таксама, што насенне тваё будзе шматлікае і нашчадкі твае — быццам зелле зямное.
І ты ўбачыш, што насеньне тваё шматлікае і нашчадкі твае — быццам трава на зямлі.
І ўвойдзеш у магілу ў гадах саспелых, як ставіцца сноп пшаніцы ў час свой.
І ўвойдзеш у магілу ў гадах сьпелых, як кладзецца сноп пшаніцы ў час свой.
Вось, як мы даследавалі гэта, так і ёсць; паслухай гэта і сам зразумей для сябе».
Як мы дасьледавалі гэта, так і ёсьць. Паслухай гэта, і сам зразумееш».