Ёва 34 разьдзел
Кніга Ёва
Пераклад Чарняўскага 2017 → Пераклад Антонія Бокуна
І, працягваючы далей, сказаў Элію таксама наступнае:
І гаварыў Элігу, і сказаў:
«Мудрыя, выслухайце словы мае і, адукаваныя, прыхіліце вушы,
«Мудрыя, слухайце словы мае, і знаўцы, прыхіліце вушы да мяне.
бо вуха выпрабоўвае словы, як горла страву на смак распазнае.
Бо вуха выспрабоўвае словы, як паднябеньне смакуе страву.
Разбяромся для сябе, што справядлівае, і разгледзім паміж сабою, што лепшае.
Разьбяромся між сабою, што слушнае, і зразумеем, што добрае.
Ёў вось сказаў: “Я справядлівы, а Бог пазбавіў мяне суда.
Бо Ёў сказаў: “Я — праведны, а Бог пазбавіў мяне суду.
У судзе ж маім — падман. Вялікая рана мая, а я без ніякага граху”.
Ці буду я казаць хлусьліва пра праўду маю? Небясьпечная рана мая, а я без віны”.
Хто такі чалавек, як Ёў, які п’е знявагу, як ваду,
Ці ёсьць такі чалавек, як Ёў, які п’е зьнявагі, як ваду,
які крочыць разам з тымі, што чыняць несправядлівасць, і ходзіць нават з людзьмі бязбожнымі?
і ідзе разам са злачынцамі, і ходзіць з людзьмі бязбожнымі?
Бо ён сказаў: “Няма карысці чалавеку, калі ён чыніць прыязнае Богу”.
Бо ён сказаў: “Няма карысьці чалавеку, калі ён дагаджае Богу”.
Дык паслухайце мяне, людзі разумныя! Будзь далёкі ад Бога, о грэх, і беззаконне — ад Усемагутнага.
Дык паслухайце мяне, людзі разумныя! Бог далёкі ад няправасьці, і Усемагутны — ад беззаконьня.
Бо за справу чалавека Ён аддасць яму, і паводле шляхоў кожнага верне назад яму.
Бо Ён паводле ўчынкаў аднагароджвае чалавеку, паводле шляхоў кожнага аднагароджвае яму.
Сапраўды, Бог не чыніць ліха і Усемагутны не парушыць суд.
Сапраўды, Бог ня чыніць несправядлівасьці, і Усемагутны не перакручвае суд.
Хто даручыў яму зямлю сваю, або хто заснаваў увесь сусвет?
Хто даручыў Яму зямлю? Хто паставіў Яго над усім сусьветам?
Калі б Ён накіраваў да Сябе сэрца яго ды ўзяў да Сябе дух яго і дыханне,
Калі б Ён накіраваў да Сябе сэрца Сваё, і ўзяў да Сябе Духа Свайго і дыханьне Сваё,
то прапала б адразу кожнае цела, і чалавек перамяніўся б у парахно.
тады загінула б кожнае цела, і чалавек перамяніўся б у парахно.
Дык калі маеш ты розум, чуў гэта і ўслухаўся ў голас слоў маіх.
Калі ты маеш розум, паслухай гэта, прыхілі вуха на голас словаў маіх.
Няўжо той, хто не любіць праўды, будзе мець уладу? Ці асудзіш ты Найсправядлівейшага,
Ці той, хто ненавідзіць суд, можа кіраваць? Ці асудзіш ты Найправеднейшага?
Які скажа цару: “Нягоднік!”, Які можа назваць князёў: “Бязбожныя!”,
Ці можна сказаць валадару: “Нягоднік”, або начальнікам: “Бязбожнікі”.
Які не глядзіць на асобы князёў і не зважае на багатага, калі ён судзіцца з бедным? Бо ўсе яны — справа рук Яго.
Але Ён не глядзіць на абліччы князёў і ня лічыць багатага вышэй за ўбогага. Бо ўсе яны — творы рук Ягоных.
Неспадзявана паміраюць яны; і сярод ночы ўзрушацца народы, і яны пройдуць, і моцнага выганяць без цяжкасці.
Неспадзявана паміраюць яны, і сярод ночы паўстае народ, і яны зьнікаюць, і моцных выганяюць не рукой [чалавека].
Бо вочы Яго — над дарогамі людзей, і Ён бачыць усе крокі іх.
Бо вочы Ягоныя — над шляхамі чалавека, і Ён бачыць усе крокі ягоныя.
Няма цемры, ані ценю смерці, каб там маглі схавацца тыя, што чыняць несправядлівасць.
Няма цемры, ані змроку, каб там маглі схавацца злачынцы.
Не вызначае Ён больш для чалавека часу, каб той ішоў да Бога на суд.
Бо Ён не прызначае чалавеку тэрмін, каб той ішоў да Бога на суд.
Ён сатрэ магутных без даследавання і замест іх паставіць іншых.
Ён зьнішчае магутных без запытаньня і на іх месца стаўляе іншых.
Паколькі ведае Ён учынкі іх, то прывядзе ноч, — і быць ім знішчанымі.
Ён ведае ўчынкі іхнія і скідвае іх ноччу, і яны гінуць.
Ён паражае іх, як бязбожнікаў, перад вачамі іншых,
Ён ударае іх за бязбожнасьць іхнюю на бачным месцы
тых, якія быццам бы знарок адвярнуліся ад Яго і не захацелі разумець усіх шляхоў Яго,
за тое, што яны адвярнуліся ад Яго і не разумелі ўсіх шляхоў Ягоных.
бо ўспрыняў Ён крык няшчаснага і пачуў голас бедных.
Бо дайшоў да Яго крык убогіх, і Ён пачуў стагнаньне прыгнечаных.
Бо калі Ён будзе ў супакоі, хто асудзіць; а калі Ён схавае аблічча Сваё, хто можа Яго ўбачыць? Будзе гэта для народа і для аднаго чалавека;
Калі Ён супакоіць, хто можа асудзіць? Калі схавае аблічча Сваё, хто можа ўбачыць Яго? Будзе гэта і для народу, і для аднаго чалавека,
хай не валадарыць чалавек бязбожны і не будзе ён пасткай для народа.
каб не валадарыў чалавек нягодны і ня быў ён пасткай для народу.
Калі хто кажа Богу: “Я змушаны быў учыняць, не буду больш грашыць.
Трэба казаць да Бога: “Я нясу [пакараньне], ня буду больш грашыць.
Пакуль мне бачыць, Ты вучы мяне; калі я зрабіў злачынства, болей не буду”.
Чаго я ня бачу, Ты навучы мяне. Калі я зрабіў злачынства, болей гэтага рабіць ня буду”.
Няўжо табе не будзе адплачана за тое, што ты пагарджаў Ім? Ты ж выбіраць будзеш, а не я; і, калі ты ведаеш штосьці — гавары.
На [думку] тваю, ці павінен Ён адплаціць [табе], бо ты адкідаеш [гэта]? Бо ты сам, а ня я выбіраеш [казаць гэта]. А калі ведаеш што [больш], скажы.
Людзі разумныя скажуць мне, і мудры чалавек, які паслухае мяне:
Людзі разумныя скажуць мне, і чалавек мудры, які слухае мяне, [прамовіць]:
“А Ёў неразумна кажа, і словы яго не выяўляюць разважнасці”.
“Ёў неразумна кажа, і словы ягоныя без разуменьня”.
Ва ўсякім разе, хай будзе Ёў правераны да канца, паводле адказаў людзей няцноты.
Няхай будзе Ёў дасьледаваны да канца, паводле адказаў ягоных, якія ўласцівыя людзям беззаконным.
Бо ён дадае да грахоў сваіх злачынства, сярод нас пляскае ў далоні, ды яшчэ больш павялічвае свае прамовы супраць Бога».
Бо ён дадае да грахоў сваіх правіну, і сярод нас пляскае ў далоні, і памнажае прамовы свае супраць Бога».
