Ёва 34 разьдзел
Кніга Ёва
Пераклад Васіля Сёмухі → Пераклад Антонія Бокуна
І гаварыў далей Эліуй і сказаў:
І гаварыў Элігу, і сказаў:
выслухайце, мудрыя, слова маё, і прыхілеце да мяне вуха, разважлівыя!
«Мудрыя, слухайце словы мае, і знаўцы, прыхіліце вушы да мяне.
Бо вуха разьбірае словы, як гартань адрозьнівае смак у ежы.
Бо вуха выспрабоўвае словы, як паднябеньне смакуе страву.
Пастановім паміж сабою развагу і распазнаем, што добра.
Разьбяромся між сабою, што слушнае, і зразумеем, што добрае.
Вось, Ёў сказаў: «праўда мая, але Бог пазбавіў мяне суду.
Бо Ёў сказаў: “Я — праведны, а Бог пазбавіў мяне суду.
Ці павінен я маніць на праўду маю? Мая рана нявылечная бязь віны».
Ці буду я казаць хлусьліва пра праўду маю? Небясьпечная рана мая, а я без віны”.
Ці ёсьць такі чалавек, як Ёў, які п’е глум, як ваду,
Ці ёсьць такі чалавек, як Ёў, які п’е зьнявагі, як ваду,
уступае ў супольнасьць з тымі, якія чыняць беззаконьне, і ходзіць зь людзьмі бязбожнымі?
і ідзе разам са злачынцамі, і ходзіць з людзьмі бязбожнымі?
Бо ён сказаў: няма карысьці чалавеку ў добрым дагодніцтве Богу.
Бо ён сказаў: “Няма карысьці чалавеку, калі ён дагаджае Богу”.
Дык вось паслухайце мяне, мужы мудрыя. Ня можа быць у Бога няпраўды, альбо ва Ўсеўладнага неправасуддзя,
Дык паслухайце мяне, людзі разумныя! Бог далёкі ад няправасьці, і Усемагутны — ад беззаконьня.
бо Ён паводле ўчынкаў чалавека робіць зь ім і паводле шляхоў мужа адплачвае яму.
Бо Ён паводле ўчынкаў аднагароджвае чалавеку, паводле шляхоў кожнага аднагароджвае яму.
Праўда, Бог ня робіць няпраўды, і Ўсеўладны не перакручвае суд.
Сапраўды, Бог ня чыніць несправядлівасьці, і Усемагутны не перакручвае суд.
Хто апрача Яго думае пра зямлю? І хто кіруе ўсім сусьветам?
Хто даручыў Яму зямлю? Хто паставіў Яго над усім сусьветам?
Калі б Ён павярнуў сэрца Сваё да Сябе і ўзяў да Сябе дух яе і дыханьне яе, —
Калі б Ён накіраваў да Сябе сэрца Сваё, і ўзяў да Сябе Духа Свайго і дыханьне Сваё,
раптам загінула б усякая плоць, і чалавек вярнуўся б у пыл.
тады загінула б кожнае цела, і чалавек перамяніўся б у парахно.
Дык вось, калі ты маеш розум, дык слухай гэта і ўважай словам маім.
Калі ты маеш розум, паслухай гэта, прыхілі вуха на голас словаў маіх.
Той, хто ненавідзіць праўду, ці можа валадарыць? І ці можаш ты зьвінаваціць Найсправядлівейшага?
Ці той, хто ненавідзіць суд, можа кіраваць? Ці асудзіш ты Найправеднейшага?
Ці можна сказаць цару: ты — бязбожнік, і князям: вы — беззаконьнікі?
Ці можна сказаць валадару: “Нягоднік”, або начальнікам: “Бязбожнікі”.
Але ён не зважае на асобы князёў і не выдзяляе багатага ад беднага, бо ўсе яны дзея рук Ягоных.
Але Ён не глядзіць на абліччы князёў і ня лічыць багатага вышэй за ўбогага. Бо ўсе яны — творы рук Ягоных.
Нечакана яны паміраюць; сярод ночы народ узбурыцца, і яны зьнікаюць; і моцных выганяюць ня сілаю.
Неспадзявана паміраюць яны, і сярод ночы паўстае народ, і яны зьнікаюць, і моцных выганяюць не рукой [чалавека].
Бо вочы Ягоныя над шляхамі чалавека, і Ён бачыць увесь поступ яго.
Бо вочы Ягоныя — над шляхамі чалавека, і Ён бачыць усе крокі ягоныя.
Няма цемры, ні ценю сьмяротнага, дзе маглі б схавацца беззаконьнікі.
Няма цемры, ані змроку, каб там маглі схавацца злачынцы.
Таму Ён ужо не патрабуе ад чалавека, каб ішоў на суд з Богам.
Бо Ён не прызначае чалавеку тэрмін, каб той ішоў да Бога на суд.
Ён ламае дужых не разьбіраючы, і пастаўляе іншых на іх месцы,
Ён зьнішчае магутных без запытаньня і на іх месца стаўляе іншых.
бо ён робіць вядомымі дзеі іхнія і скідае іх уначы, і яны зьнішчаюцца.
Ён ведае ўчынкі іхнія і скідвае іх ноччу, і яны гінуць.
Ён пабівае іх, як беззаконных людзей, на вачах у іншых,
Ён ударае іх за бязбожнасьць іхнюю на бачным месцы
за тое, што яны адвярнуліся ад Яго і не зразумелі ўсіх шляхоў Ягоных,
за тое, што яны адвярнуліся ад Яго і не разумелі ўсіх шляхоў Ягоных.
так што дайшоў да Яго лямант бедных, і Ён пачуў стогны прыгнечаных.
Бо дайшоў да Яго крык убогіх, і Ён пачуў стагнаньне прыгнечаных.
Ці даруе ён цішыню, хто можа парушыць? ці хавае Ён аблічча Сваё, хто можа ўбачыць Яго? Ці будзе гэта для народу, альбо для аднаго чалавека,
Калі Ён супакоіць, хто можа асудзіць? Калі схавае аблічча Сваё, хто можа ўбачыць Яго? Будзе гэта і для народу, і для аднаго чалавека,
каб не цараваў крывадушнік на спакусу народу.
каб не валадарыў чалавек нягодны і ня быў ён пасткай для народу.
Богу трэба гаварыць: «я пацярпеў, больш ня буду грашыць.
Трэба казаць да Бога: “Я нясу [пакараньне], ня буду больш грашыць.
А чаго я ня ведаю, Ты навучыш мяне; і калі я ўчыніў беззаконьне, больш ня буду».
Чаго я ня бачу, Ты навучы мяне. Калі я зрабіў злачынства, болей гэтага рабіць ня буду”.
Ці паводле тваёй развагі Ён павінен даваць? І што ты адкідаеш, тое табе належыць выбіраць, а ня мне; кажы, што ведаеш.
На [думку] тваю, ці павінен Ён адплаціць [табе], бо ты адкідаеш [гэта]? Бо ты сам, а ня я выбіраеш [казаць гэта]. А калі ведаеш што [больш], скажы.
Людзі разумныя скажуць мне, і муж мудры, які слухае мяне:
Людзі разумныя скажуць мне, і чалавек мудры, які слухае мяне, [прамовіць]:
Ёў неразумна гаворыць, і словы ягоныя бяз сэнсу.
“Ёў неразумна кажа, і словы ягоныя без разуменьня”.
Я хацеў бы, каб Ёў быў выпрабаваны, паводле адказаў ягоных, уласьцівых людзям бязбожным.
Няхай будзе Ёў дасьледаваны да канца, паводле адказаў ягоных, якія ўласцівыя людзям беззаконным.
Інакш ён да грэху свайго дадасьць адступленьне, будзе пляскаць у ладкі сярод нас і яшчэ болей нагаворыць супроць Бога.
Бо ён дадае да грахоў сваіх правіну, і сярод нас пляскае ў далоні, і памнажае прамовы свае супраць Бога».
