Ёва 18 разьдзел
Кніга Ёва
Пераклад Васіля Сёмухі → Пераклад Антонія Бокуна
І адказваў Валдад Саўхэянін і сказаў:
І адказаў Більдад з Шуаху, і сказаў:
калі ж пакладзяце вы канец такім гаворкам? абдумайце і пасьля будзем гаварыць.
«Калі пакінеце вы кідаць прамовы? Перш зразумейце, а потым будзем гаварыць.
Навошта лічыцца нам жывёламі і быць прыніжанымі ў вачах вашых?
Чаму ты нас лічыш за жывёлу, і мы нячыстыя ў вачах тваіх?
О ты, хто разьдзірае душу тваю ў гневе тваім? Няўжо дзеля цябе апусьцець зямлі, і скале зрушыцца зь месца свайго?
Што ты губіш душу тваю ў гневе тваім? Ці ж дзеля цябе апусьцее зямля, і з месца свайго зварухнецца скала?
Так, сьвятло ў беззаконнага патухне, і не застанецца іскры ад агню ягонага.
Бо сьвятло бязбожніка патухне, і не застанецца зьнічкі ад агню ягонага.
Зацьміцца сьвятло ў намёце ягоным, і сьвяцільня ягоная патухне над ім.
Пацямнее сьвятло ў намёце ягоным, і сьветач, які ў ім, патухне.
Скароцяцца крокі магутнасьці ягонай, і скіне яго ўласны намысел ягоны,
Звузяцца крокі моцы ягонай, намер ягоны здрадзіць яго.
бо ён улезе ў сетку сваімі нагамі і па нератах хадзіць будзе.
Ублуталіся ў сетку ногі ягоныя, і ходзіць ён паміж пастак.
Пятля зашмаргне нагу ягоную, і грабежнік зловіць яго.
Пятля зловіць нагу ягоную, і пастка сашчэпіцца над ім.
Непрыкметна раскладзены на зямлі сілкі на яго і пасткі на дарозе.
Схаваны на зямлі пасткі для яго, і сіло чакае яго на дарозе.
З усіх бакоў будуць палохаць яго жахі і прымушаць яго кідацца туды і сюды.
Палохаюць яго жахі і аблутваюць ногі ягоныя.
Зьмізарнее ад голаду сіла яго, і пагібель гатовая збоку ў яго.
Зьнікае ад голаду дужасьць ягоная, і загуба падрыхтаваная рэбрам ягоным.
Зьесьць чэлесы цела ягонага, зьесьць чэлесы ягоныя першынец сьмерці.
Хвароба зьесьць скуру ягоную, і зжарэ часткі цела ягонага першародны сьмерці.
Выгнана будзе з намёта ягонага надзея ягоная, і гэта апусьціць яго да цара жахаў.
Зьнікне надзея ягоная з намёту яго, і пагоняць яго да валадара жахаў.
Паселяцца ў намёце ягоным, бо ён ужо не ягоны; жытло ягонае будзе пасыпана серкаю.
Будзе ён жыць у намёце, але не ў сваім, і жытло ягонае будзе пасыпана серкаю.
Зьнізу падсохнуць карані ягоныя, і зьверху завянуць галіны ягоныя.
Зьнізу падсечаны карані ягоныя, а зьверху вянуць галінкі ягоныя.
Памяць пра яго зьнікне зь зямлі, і імя ягонага ня будзе на плошчы.
Памяць пра яго зьнікне з зямлі, і ня будзе слаўлена імя ягонае на плошчах.
Прагоняць яго зь сьвятла ў цемру і сатруць яго з улоньня зямлі.
Прагоняць яго са сьвятла ў цемру, і ўвесь сьвет будзе гнаць яго.
Ні сына ягонага, ні ўнука ня будзе ў народзе ягоным, і нікога не застанецца ў сялібах ягоных.
Ня будзе ані сына, ані ўнука ў народзе ягоным, і нікога не застанецца ў месцы вандраваньня ягонага.
Днём ягоным зжахнуцца нашчадкі, і сучасьнікі будуць агорнуты трымценьнем.
У дзень ягоны аслупянеюць нашчадкі, і сучаснікаў ахопіць жудасьць.
Такія жытлішчы ў беззаконнага, і такое месца ў таго, хто ня ведае Бога.
Такое вось жытло грэшніка, і такое месца таго, хто ня ведае Бога».
