Мацьвея 1 разьдзел

 

 

Кніга радаводу Езуса Хрыста, сына Давідавага, сына Абрагамавага.

 

Кніга радаводу Ісуса Хрыста сына Давідавага, сына Аўраамавага.

Абрагам спарадзіў Ізаака, Ізаак спарадзіў Якуба. Якуб спарадзіў Юду й братоў ягоных.

 

Аўраам радзіў Ісаака, Ісаак радзіў Якава, Якаў радзіў Юду і ягоных братоў.

Юда спарадзіў Фарэса і Зару ад Тамары. Фарэс спарадзіў Эзрона, Эзрон спарадзіў Арама.

 

Юда радзіў Фарэса і Зару ад Тамары, Фарэс радзіў Эзрома, Эзром радзіў Арама,

Арам спарадзіў Амінадаба. Амінадаб-жа спарадзіў Наасона. Наасон спарадзіў Сальмона.

 

Арама радзіў Амінадава, Амінадаў радзіў Наасона, Наасон-жа радзіў Сальмона,

Сальмон-жа спарадзіў Бооза ад Рагабы. А Бооз спарадзіў Обэд ад Рут.

 

Сальмон радзіў Боаза ад Рахавы, Боаз радзіў Обэда ад Руты,

Обэд спарадзіў Ессэ. А Ессэ спарадзіў Давіда караля. Давід-жа кароль спарадзіў Салямона з тае, што была Урыявай.

 

Обэд радзіў Ессея, Ессей радзіў Давіда цара, Давід радзіў Салямона ад тае, што была Урыявай,

Салямон спарадзіў Робоама. Робоам спарадзіў Абію. Абія спарадзіў Асу.

 

Салямон радзіў Рабоама, Рабоам радзіў Абіаю, Абія радзіў Асу,

Аса-ж спарадзіў Ёзафата. Ёзафат спарадзіў Ёрама. А Ёрам спарадзіў Озію.

 

Аса радзіў Ёзафата, Ёзафат радзіў Ёрама, Ёрам радзіў Озію,

Озія спарадзіў Ёатама. А Ёатам спарадзіў Ахаза. Ахаз-жа спарадзіў Эзэхію.

 

Озія радзіў Ёатама, Ёатам радзіў Ахаза, Ахаз радзіў Эзэхію,

Эзэхія спарадзіў Манассэса. А Манассэс спарадзіў Амона, Амон-жа спарадзіў Ёзію.

 

Эзэхія радзіў Манасію, Манасія радзіў Амона, Амон радзіў Ёсію,

А Ёзія спарадзіў Ехонія і братоў ягоных перад перамяшчэннем у Бабілён.

 

Ёсія радзіў Ехонію і ягоных братоў перад перасяленьнем у Бабілён.

А пасьля перамяшчэння ў Бабілён Ехоні спарадзіў Салятіэля. Салятіэль-жа нарадзіў Зарабабэля.

 

А пасьля перасяленьня ў Бабілён Ехонія радзіў Салятіэля, Салятіэль радзіў Зоробабэля,

А Зарабабэль спарадзіў Абіюда. Абіюд спарадзіў Эліакіма, Эліакім-жа спарадзіў Азора.

 

Зоробабэль радзіў Абіуда, Абіюд радзіў Эліякіма, Эліякім радзіў Азора,

Азор спарадзіў Садока. А Садок спарадзіў Ахіма. Ахім спарадзіў Эліуда.

 

Азор радзіў Садока, Садок рэдзіў Ахіма, Ахім радзіў Эліуды,

Эліуд спарадзіў Элеазара. Элеазар спарадзіў Матгана. А Матган спарадзіў Якуба.

 

Эліуд радзіў Маттана, Маттан радзіў Якава,

Якуб спарадзіў Язэпа, мужа Марыі, з якое нарадзіўся Езус, што называецца Хрыстус.

 

Якаў радзіў Язэпа, мужа Марыі, ад каторае нарадзіўся Ісус, што называецца Хрыстос.

Гэтак усіх радоў ад Абрагама да Давіда чатырнаццаць. І ад Давіда да перамяшчэння Бабілёнскага радоў чатырнаццаць. І ад перамяшчэння ў Бабілён да Хрыстуса радоў чатырнаццаць.

 

Гэтак усіх родаў ад Аўрааме да Давіда чатырнаццаць родаў; і ад Давіда да перасяленьня ў Бабілён чатырнаццаць родаў; і ад перасяленьня ў Бабілён да Хрыста чатырнаццаць родаў.

А з нарадзінамі Хрыста было гэтак: Па заручынах Маці Ягонай Марыі з Язэпам, перад тым як сышліся, выявілася, што яна ўжэ мела ў сабе з Духа Святога.

 

А нараджэньнем Ісуса Хрыста было вось як: Па заручынах Ягонае маці Марыі з Язепам, перад тым, як яны сышліся, выявілася, што яна цяжарная ад Сьвятога Духа.

Язэп-жа, ейны муж, быў чэсным, і ня хочучы яе знеслаўляць, маніўся сэкрэтна пакінуць яе.

 

Язэп-же муж яе, будучы праведным і ня хочучы зьнеслаўляць яе, хацеў тайком адпусьціць яе.

Адыж яктолькі гэта падумаў, вось анел Божы з’явіўся, яму ўва сьне й сказаў: Язэпе, сыне Давідавы, ня бойся прыняць Марыю, тваю сужэнку, гэны бо засьнітак у ёй ёсьць з Духа Святога.

 

Але калі ён гэтае падумаў, вось ангел Гасподні зьявіўся яму ўва сьне і сказаў: Язэп, сын Давідаў! ня бойся прыняць Марыю, тваю жонку, бо зароджанае ў ёй ёсьць ад Сьвятога Духа.

Вось-жа народзіць сына, і дасі імя яму Езус, ён бо збавіць людзей сваіх ад грахоў іхніх.

 

Вось-жа народзіць сына і дасі Яму імя Ісус, бо Ён збавіць людзей сваіх ад іхных грахоў.

А ўсё гэта здарылася, каб збылося Госпадам сказанае праз прарока гаворачага:

 

А ўсе гэта здарылася, каб збылося сказанае Госпадам праз прарока, які кажа:

«Вось дзяўчо меціме ў нутры сваім і народзіць сына, і дадуць імя яму Эммануэль» гэта знача: Бог з намі (Із. 7:14).

 

Вось дзева прыйме ў нутро і народзіць сына і дадуць яму імя Эмануэль, гэта значыць: з намі Бог.

Устаўшы зо сну Язэп зрабіў як загадаў яму анел Божы, і прыняў сваю сужэнку.

 

Устаўшы ад сну, Язэп зрабіў, як загадаў яму Гасподні ангел, і прыняў сваю жонку

І не пазнаваў яе дакуль не нарадзіла сына свайго першароднага, і даў імя яму: Езус.

 

і не пазнаваў яе ажно нарадзіла свайго Сына першароднага, і даў Яму імя Ісус.