Лукаша 3 разьдзел

 

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

 

Пятнанцатага году дзяржавы цэсара Тыбэра, як Понт Пілат быў намесьнікам Юдэі, Гірад быў чацьвертнікам у Ґалілеі, а Піліп, брат ягоны, чацьвертнікам Ітурэі а Трахоніцкае краіны, а Лізан чацьвертнікам Абіленеі,

пры першасьвятарах Аньне і Каяфе было слова Божае да Яна, сына Захарыі, у пустыні.

 

За найвышшых сьвятароў Ганны а Каяпы, было слова Божае да Яана Захаронка на пустыні.

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

 

І ён праходзіў па ўсёй краіне ля Ёрдану, абяшчаючы хрэст каяты дзеля дараваньня грахоў,

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

 

Як напісана ў кнізе словаў Ісаі прарокі, кажучы: «Голас гукаючага на пустыні: гатуйце дарогу Спадарову, прастайце сьцелжі Ягоныя;

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

 

Кажная даліна напоўніцца, і кажная гара а ўзгорак паніжыцца, і скрыўленыя выпрастаюцца, і драгкія дарогі стануць гладкімі;

і ўгледзіць усякае цела збаўленьне Божае”».

 

І кажнае цела абача спасеньне Божае».

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

 

Тады сказаў ён гурбе, што прыходзіла хрысьціцца ў яго: «Родзе яшчарыны! хто перасьцярог вас уцякаць ад надыходзячага гневу?

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

 

Дык радзіце плады гожыя каяты. І не пачынайце гукаць сабе: "Айцец у нас Абрагам"; бо кажу вам, што Бог можа з камянёў гэтых узьняць дзеці Абрагаму.

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

 

Ужо й сякіра да караня дзерваў прыложана; дык кажнае дзерва, што ня родзе добрага плоду, сякуць а кідаюць у цяпло».

І спытаўся ў яго натоўп, кажучы: «Дык што нам рабіць?»

 

І пыталіся ў яго гурбы, кажучы: «Дык што маем рабіць?»

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

 

Ён, адказуючы, сказаў ім: «Хто мае дзьве адзежы, дай нямаючаму; і хто мае ежу, рабі тое самае».

Прыйшлі і мытнікі хрысьціцца, і сказалі яму: «Настаўнік, што нам рабіць?»

 

Тады прышлі таксама мытнікі хрысьціцца і сказалі яму: «Вучыцелю, што мы маем рабіць?»

А ён сказаў ім: «Нічога не бярыце больш таго, што вам загадана».

 

І сказаў ім: «Нічога не вымагайце балей за прызначанае вам».

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

 

І пыталіся ў яго таксама жаўнеры, кажучы: «А мы што маем рабіць?» І ён адказаў ім: «Не рабіце ўсілства нікому ані вінуйце хвальшыва, і будзьце здаволіўшыся з платы свае».

І народу, які чакаў і разважаў у сэрцах сваіх адносна Яна, ці не Хрыстос ён,

 

І як люд спадзяваўся, і думалі ўсі ў сэрцах сваіх празь Яана, ці ня быў можа ён Хрыстос,

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

 

Яан адказаў, кажучы ўсім: «Я запраўды хрышчу вас вадою, але йдзець дужшы за мяне, у Каторага я ня гожы разьвязаць рэменьчыка ў вобую Ягоным; Ён будзе хрысьціць вас Духам Сьвятым а агнём.

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

 

Веялка Ягоная ў руццэ Ягонай, і Ён ачысьце такаўню Сваю, і пшонку зьбярэць у сьвіран, а ўмецьце спале агнём няўгасным».

І шмат іншага дабравесьціў ён народу, навучаючы яго.

 

І шмат чаго іншага напамінаючы, даваў дабравесьць люду.

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

 

Гірад жа чацьвертнік, ганены ім за Гіродзяду, жонку брата свайго Піліпа, і за ўсе ліха, што Гірад зрабіў,

дадаў да ўсяго і тое, што замкнуў Яна ў вязьніцу.

 

Дадаў яшчэ да ўсяго тое, што пасадзіў Яана ў вязьніцу.

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

 

І сталася, як хрысьціўся ўвесь люд, і Ісус, ахрысьціўшыся, маліўся, нябёсы рашчыніліся,

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

 

І ісступіў Дух Сьвяты на Яго ў цялесным выглядзе, як галуба, і прышоў голас ізь неба, кажучы: «Ты Сын Мой любовы; Цябе Я ўпадабаў!»

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

 

А Самому Ісусу, як пачынаў, было год трыццаць веку, будучы, як думалі, сынам Язэпа Гілянка,

Мататаў, Левіяў, Мэльхіяў, Янаяў, Язэпаў,

 

Матфацёнка, Левянка, Мельшанка, Янянка, Язэпенка,

Мататыяў, Амосаў, Навумаў, Эсьліяў, Нагеяў,

 

Маттафёнка, Амасёнка, Нагумёнка, Есьлянка, Наґґаёнка,

Магатаў, Мататыяў, Сэмэяў, Язэпаў, Юдаў,

 

Маафёнка, Матгафёнка, Сэмеёнка, Язэпенка, Юдзянка,

Яанаяў, Рэсаеў, Зэрубабэляў, Салятыэляў, Нэрыяў,

 

Яанёнка, Рысаёнка, Зэрувавеленка, Шэалфіеленка, Ніранка,

Мэльхіяў, Аддыяў, Касамаў, Эльмадамаў, Іраў,

 

Мельшанка, Адзьдзянка, Косамёнка, Елмодамёнка, Іранка,

Ёсіяў, Эліезэраў, Ярымаў, Мататаў, Левіяў,

 

Ёсянка, Елезэранка, Ёрыменка, Матфацёнка, Левянка,

Сымонаў, Юдаў, Язэпаў, Янанаў, Эліякімаў,

 

Сыманёнка, Юдзянка, Язэпенка, Ёнанёнка, Елякімёнка,

Мэлеаяў, Маінанаў, Мататаў, Натанаў, Давідаў,

 

Малеаёнка, Менанёнка, Маттафёнка, Нафанёнка, Давідзёнка,

Есэяў, Абэдаў, Боазаў, Сальмонаў, Наасонаў,

 

Есянка, Овідзёнка, Воозёнка, Салмонёнка, Наасонёнка,

Амінадабаў, Арамаў, Эсромаў, Пэрэсаў, Юдаў,

 

Амінадавенка, Арамёнка, Есромёнка, Фарэсёнка, Юдзянка,

Якубаў, Ісаакаў, Абрагамаў, Тэрахаў, Нахораў,

 

Якавёнка, Ісачонка, Абрагаменка, Фаранка, Нахаронка,

Сэрухаў, Рагаваў, Фалекаў, Гэбэраў, Салаў,

 

Сэрушонка, Раґавёнка, Фалечонка, Еверонка, Салянка,

Каінанаў, Арфаксадаў, Сэмаў, Нояў, Лямэхаў,

 

Каінанёнка, Арфаксадзенка, Сэмянка, Ноянка, Ламёшанка,

Мэтушаляхаў, Энохаў, Ярэдаў, Магалялеэляў, Кейнанаў,

 

Мефусаленка, Енашонка, Ярэдзёнка, Малелееленка, Каінанёнка,

Эносаў, Сэтаў, Адамаў, Божы.

 

Еносёнка, Сыфянка, Адамёнка, каторы быў Божы.