Псалтыр 1 псалом
Псалтыр
Пераклад Антонія Бокуна → Пераклад Яна Станкевіча
Шчасьлівы чалавек, які не хадзіў паводле рады бязбожнікаў, не стаяў на шляху грэшнікаў і не сядзеў паміж насьмешнікаў,
Шчасьлівы тый муж, што не хадзіў подле рады бязбожных, ані на дарозе грэшнікаў не стаяў, ані на седаве скалазубаў не сядзеў;
бо да Закону ГОСПАДА імкненьне ягонае і пра Закон Ягоны будзе разважаць ён днём і ноччу.
Але ў праве СПАДАРОВЫМ любата ягоная, і ў праве Ягоным размышляе дзень і ноч!
І будзе ён як дрэва, пасаджанае пры цячэньні водаў, якое прыносіць плод свой у часе сваім, і лістота якога ня вяне, і ў-ва ўсім, што ён робіць, ён посьпех мае.
І будзе ён, як дзерва, пасаджанае ля цур’ёў вады, што плод свой даець упару, і ліст яго ня вяне; і ўсе, што ён робе, шчасьце яму.
Ня гэтак бязбожнікі, яны як мякіна, якую вецер разносіць.
Ня так тыя бязбожныя, але як умецьце, разьвяванае ветрам.
Таму не ўстаяць бязбожнікі на судзе, ані грэшнікі ў грамадзе праведных,
Затым ня вытрываюць бязбожныя на судзе ані грэшнікі ў збору справядлівых;
бо ГОСПАД ведае шлях праведных, а шлях бязбожнікаў загіне.
Бо знае СПАДАР дарогу справядлівых, а дарога бязбожных загіне.
