Псалтыр 75 псалом — Пераклад Антонія Бокуна → Пераклад Яна Станкевіча

Кіраўніку хору: на лад: “Не загубляй!”. Псальм Асафа. Сьпеў.

Кіраўніку хору. Подле «Не загубі». Псальма Асафова. Песьня.

Славім мы Цябе, Божа, славім, і тыя, што блізкія да імя Твайго, абвяшчаюць цуды Твае.

Мы дзякуем Табе, Божа, мы дзякуем Табе, бо блізка імя Твае, і вылічаем чудосы Твае.

«Калі Я прызначу [месца] спатканьня, Я буду судзіць паводле справядлівасьці.

«У часе, каторы Я прызначу, Я буду судзіць справядліва.

Калі растапляецца зямля і ўсе, хто жыве на ёй, Я ўзважваю слупы яе. (Сэлях)

Растаіла зямля і ўсі жыхары яе; Я ўмацаваў стаўпы яе. Сэля.

Я кажу да тых, якія хваляцца сабою: “Не хваліцеся!”, і да бязбожных: “Не падымайце рогі!

Кажу хвальком: "Не хваліцеся", і нягодным: "Не падыймайце рогу,

Не падымайце высока рогі свае, не прамаўляйце, дзёрзка [трымаючы] шыю!”»

Не падыймайце ўгару рогу свайго ані гукайце з калянаю шыяю"»,

Бо ані з усходу, ані з захаду, ані з пустыні вывышэньне,

Бо ня з усходу, ані із захаду, ані з пустыні павышэньне;

але Бог ёсьць Судзьдзя, гэтага Ён паніжае, а таго вывышае.

Бо Бог судзе: аднаго паніжае, а другога павышае;

Бо ў руцэ ГОСПАДА келіх з віном, якое пеніцца; ён поўны напою зьмяшанага, і Ён з яго налівае, але толькі фуз ягоны будуць піць усе бязбожнікі на зямлі.

Бо чара ў руццэ ў СПАДАРА, зь віном шумячым поўная мешанага, і Ён налівае зь яе; дрожджы яе, адылі, вып’юць а выссуць усі нягодныя землі.

А я буду апавядаць [пра гэта] вечна, буду выслаўляць Бога Якуба.

А я буду абяшчаць на векі, буду пяяць хвалы Богу Якававаму.

І ўсе рогі бязбожнікам я адсяку, і будуць узьнятыя рогі праведнага.

Усі рогі нягодных Ён заб’ець, але рогі справядлівых падыйме.