Лукаша 3 разьдзел

 

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

 

У пятнаццатае лета панаваньня Тыберыя цэзара, калі Пілат Понтыцкі гаспадарыў у Юдэі, Ірад быў чацьвертаўладнікам у Галілеі, Піліп — брат ягоны — чацьвертаўладнікам у Ітурэі й Траханіцкай краіне, а Лізані — чацьвертаўладнікам у Авілінеі;

пры першасьвятарах Аньне і Каяфе было слова Божае да Яна, сына Захарыі, у пустыні.

 

Пры архісьвятарах Ганьне й Кайяфе, быў голас Божы да Яна, сына Захарыя ў пустыні.

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

 

І ён прайходзіў па ўсіх ваколіцах Йарданскіх, абвяшчаючы хрышчэньне пакаяньня дзеля адпушчэньня грахоў.

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

 

Як напісана ў кнізе слоў прароцтва Ісайі прарока: — голас усклікаючага ў пустыні: прыгатуйце шлях Госпаду, прастуйце сьцежкі Яму.

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

 

Усякі дол няхай выпаўніцца і ўсякая гара й пагорак няхай зьнізяцца, крывізны выпрастаюцца і ўхабы згладзяцца.

і ўгледзіць усякае цела збаўленьне Божае”».

 

І ўбачыць усякае цела збавеньне Божае.

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

 

І гаварыў людзям, калі прыйходзілі хрысьціцца да яго: — параджэньне гадаўя? хто паказаў вам уцякаць ад надыходзячага гневу?

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

 

Утварэце плён годны пакаяньня, і не пачынайце гаварыць сабе: — маем айца Абрагама; бо кажу вам — з камяньня гэтага Бог можа ўзьняць дзяцей Абрагаму.

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

 

Ужо й сякера пры карані дрэваў паложана: усякае дрэва, якое ня прыносіць добраго плёну, будзе сьсечана і ў агонь укінена.

І спытаўся ў яго натоўп, кажучы: «Дык што нам рабіць?»

 

І пыталі людзі ў яго: што-ж нам рабіць?

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

 

Ён-жа ў адказ ім казаў: — хто мае дзьве адзежыны, падзяліся з тым, хто ня мае; і хто мае ежу, няхай робіць таксама.

Прыйшлі і мытнікі хрысьціцца, і сказалі яму: «Настаўнік, што нам рабіць?»

 

Прыйшлі й мытнікі хрысьціца й сказалі яму: — вучыцель! што нам рабіць?

А ён сказаў ім: «Нічога не бярыце больш таго, што вам загадана».

 

Ён-жа сказаў ім: — нічога больш таго, што вам вызначана.

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

 

Пыталіся ў яго таксама й войны, кажучы: — а мы? што мы маем рабіць? і сказаў ім: — нікога не абірайце, нікога не абмаўляйце, і задавальняйцеся сваею заплатаю.

І народу, які чакаў і разважаў у сэрцах сваіх адносна Яна, ці не Хрыстос ён,

 

Народу-ж, які быў тады ў надзеі, і ўсе думалі ў сэрцах сваіх пра Яна — ці ня Хрыстос ён, —

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

 

Ян адказаў, гаворачы да усіх: — я вас хрышчу вадою, але йдзе Мацнейшы за мяне, у Яко я недастойны разьвязаць рамень абутку Ягонага; Ён будзе хрысьціць вас Духам Сьвятым і агнём;

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

 

Веялка Яго ў руцэ Ягонай, і Ён ачысьціць гумно Сваё й зьбярэ пшаніцу ў сьвіран Свою, мякіну-ж спаліць агнём незгасальным.

І шмат іншага дабравесьціў ён народу, навучаючы яго.

 

І шмат чаго іншага навучальнага дабравесьціў людзям.

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

 

Ірад-жа чацьвертаўладнікам, якому Ян дакараў за Ірадыяду, жонку брата свайго, і за ўсё, што Ірад учыніў ліхое,

дадаў да ўсяго і тое, што замкнуў Яна ў вязьніцу.

 

Прылажыў да ўсяго іншага й тое, што замкнуў Яна ў вязьніцу.

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

 

Было-ж, калі хрысьціўся ўвесь народ, і Ісус таксама хрысьціўся й маліўся, — разчынілася неба;

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

 

І Дух Сьвяты зыйшоў на Яго ў цялесным выглядзе, як голуб, і быў голас з неба, прамаўляючы: Ты Сын Мой улюбены, у Табе Маё дабраволеньне.

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

 

Сам-жа Ісус, калі пачынаў Сваё служэньне, быў у веку лет трыццацёх, і быў, як думалі: сын Язэпаў, Іліеў;

Мататаў, Левіяў, Мэльхіяў, Янаяў, Язэпаў,

 

Матфатаў, Левіін, Мелхіеў, Йанаеў, Язэпаў;

Мататыяў, Амосаў, Навумаў, Эсьліяў, Нагеяў,

 

Маттафіеў, Амосаў, Навумаў, Эсьлімаў, Наггеяў;

Магатаў, Мататыяў, Сэмэяў, Язэпаў, Юдаў,

 

Маафаў, Маттафіеў, Сэміеў, Язэпаў, Юдаў;

Яанаяў, Рэсаеў, Зэрубабэляў, Салятыэляў, Нэрыяў,

 

Йананаў, Рысаеў, Зарававеляў, Саляфіілаў, Нірыеў;

Мэльхіяў, Аддыяў, Касамаў, Эльмадамаў, Іраў,

 

Мэлхіеў, Аддзіеў, Касамаў, Элмадамаў, Іраў;

Ёсіяў, Эліезэраў, Ярымаў, Мататаў, Левіяў,

 

Йасіеў, Эліезэраў, Йарымаў, Матфатаў, Левіеў;

Сымонаў, Юдаў, Язэпаў, Янанаў, Эліякімаў,

 

Сымеонаў, Юдаў, Язэпаў, Йананаў, Эліякімаў;

Мэлеаяў, Маінанаў, Мататаў, Натанаў, Давідаў,

 

Мелеаеў, Майнанаў, Маттафаеў, Нафанаў, Давыдаў;

Есэяў, Абэдаў, Боазаў, Сальмонаў, Наасонаў,

 

Йессееў, Авідаў, Ваозаў, Салмонаў, Наасонаў;

Амінадабаў, Арамаў, Эсромаў, Пэрэсаў, Юдаў,

 

Амінадаваў, Арамаў, Йарамаў, Эсромаў, Фарэсаў, Юдаў;

Якубаў, Ісаакаў, Абрагамаў, Тэрахаў, Нахораў,

 

Якубаў, Ісакаў, Абрагамаў, Фаранаў, Нахораў;

Сэрухаў, Рагаваў, Фалекаў, Гэбэраў, Салаў,

 

Сэрухаў, Рагаваў, Фалекаў, Эвераў, Саланаў;

Каінанаў, Арфаксадаў, Сэмаў, Нояў, Лямэхаў,

 

Кайнанаў, Арфаксадаў, Сімаў, Ноеў, Ламехаў;

Мэтушаляхаў, Энохаў, Ярэдаў, Магалялеэляў, Кейнанаў,

 

Мафусалаў, Янохаў, Йарэдаў, Малеляілаў, Кайнанаў;

Эносаў, Сэтаў, Адамаў, Божы.

 

Эносаў, Сіфаў, Адамаў, Божы.