Лукаша 3 разьдзел

 

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

 

У пятнаццатае лета панаваньня Тыберыя цэзара, калі Пілат Понтыцкі гаспадарыў у Юдэі, Ірад быў чацьвертаўладнікам у Галілеі, Піліп — брат ягоны — чацьвертаўладнікам у Ітурэі й Траханіцкай краіне, а Лізані — чацьвертаўладнікам у Авілінеі;

пры архірэях Ганьне і Каяхве было Слова Божае да Яана, Захаравага сына, у пустэльні.

 

Пры архісьвятарах Ганьне й Кайяфе, быў голас Божы да Яна, сына Захарыя ў пустыні.

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

 

І ён прайходзіў па ўсіх ваколіцах Йарданскіх, абвяшчаючы хрышчэньне пакаяньня дзеля адпушчэньня грахоў.

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

 

Як напісана ў кнізе слоў прароцтва Ісайі прарока: — голас усклікаючага ў пустыні: прыгатуйце шлях Госпаду, прастуйце сьцежкі Яму.

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

 

Усякі дол няхай выпаўніцца і ўсякая гара й пагорак няхай зьнізяцца, крывізны выпрастаюцца і ўхабы згладзяцца.

і ўбачыць кожнае цела збаўленьне Божае.

 

І ўбачыць усякае цела збавеньне Божае.

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

 

І гаварыў людзям, калі прыйходзілі хрысьціцца да яго: — параджэньне гадаўя? хто паказаў вам уцякаць ад надыходзячага гневу?

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

 

Утварэце плён годны пакаяньня, і не пачынайце гаварыць сабе: — маем айца Абрагама; бо кажу вам — з камяньня гэтага Бог можа ўзьняць дзяцей Абрагаму.

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

 

Ужо й сякера пры карані дрэваў паложана: усякае дрэва, якое ня прыносіць добраго плёну, будзе сьсечана і ў агонь укінена.

І пыталіся ў яго людзі, кажучы: што ж (нам) рабіць?

 

І пыталі людзі ў яго: што-ж нам рабіць?

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

 

Ён-жа ў адказ ім казаў: — хто мае дзьве адзежыны, падзяліся з тым, хто ня мае; і хто мае ежу, няхай робіць таксама.

Прыйшлі ж і мытнікі ахрысьціцца і сказалі яму: настаўнік! што на́м рабіць?

 

Прыйшлі й мытнікі хрысьціца й сказалі яму: — вучыцель! што нам рабіць?

Ён жа адказаў ім: нічога большага за загаданае вам ня спаганяйце.

 

Ён-жа сказаў ім: — нічога больш таго, што вам вызначана.

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

 

Пыталіся ў яго таксама й войны, кажучы: — а мы? што мы маем рабіць? і сказаў ім: — нікога не абірайце, нікога не абмаўляйце, і задавальняйцеся сваею заплатаю.

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

 

Народу-ж, які быў тады ў надзеі, і ўсе думалі ў сэрцах сваіх пра Яна — ці ня Хрыстос ён, —

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

 

Ян адказаў, гаворачы да усіх: — я вас хрышчу вадою, але йдзе Мацнейшы за мяне, у Яко я недастойны разьвязаць рамень абутку Ягонага; Ён будзе хрысьціць вас Духам Сьвятым і агнём;

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

 

Веялка Яго ў руцэ Ягонай, і Ён ачысьціць гумно Сваё й зьбярэ пшаніцу ў сьвіран Свою, мякіну-ж спаліць агнём незгасальным.

І вось, і многае другое, навучаючы, дабравесьціў (ён) народу.

 

І шмат чаго іншага навучальнага дабравесьціў людзям.

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

 

Ірад-жа чацьвертаўладнікам, якому Ян дакараў за Ірадыяду, жонку брата свайго, і за ўсё, што Ірад учыніў ліхое,

дадаў да ўсяго і тое, што пасадзіў Яана ў вязьніцу.

 

Прылажыў да ўсяго іншага й тое, што замкнуў Яна ў вязьніцу.

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

 

Было-ж, калі хрысьціўся ўвесь народ, і Ісус таксама хрысьціўся й маліўся, — разчынілася неба;

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

 

І Дух Сьвяты зыйшоў на Яго ў цялесным выглядзе, як голуб, і быў голас з неба, прамаўляючы: Ты Сын Мой улюбены, у Табе Маё дабраволеньне.

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

 

Сам-жа Ісус, калі пачынаў Сваё служэньне, быў у веку лет трыццацёх, і быў, як думалі: сын Язэпаў, Іліеў;

Маттатаў, Ле́віяў, Ме́льхіяў, Яанаў, Язэпаў,

 

Матфатаў, Левіін, Мелхіеў, Йанаеў, Язэпаў;

Маттаціяў, Амо́саў, Навумаў, Ясьлімаў, Нагеяў,

 

Маттафіеў, Амосаў, Навумаў, Эсьлімаў, Наггеяў;

Маатаў, Маттаціяў, Самеяў, Язэпаў, Юдаў,

 

Маафаў, Маттафіеў, Сэміеў, Язэпаў, Юдаў;

Яананаў, Рысаяў, Зараба́бэляў, Салятыілаў, Нірыяў,

 

Йананаў, Рысаеў, Зарававеляў, Саляфіілаў, Нірыеў;

Мэльхіяў, Адзіяў, Касамаў, Ялмадамаў, Іраў,

 

Мэлхіеў, Аддзіеў, Касамаў, Элмадамаў, Іраў;

Ясіяў, Яліязэраў, Іярымаў, Маттатаў, Ле́віяў,

 

Йасіеў, Эліезэраў, Йарымаў, Матфатаў, Левіеў;

Сымонаў, Юдаў, Язэпаў, Яананаў, Яліякімаў,

 

Сымеонаў, Юдаў, Язэпаў, Йананаў, Эліякімаў;

Мэлеаяў, Маінанаў, Маттатаяў, Натанаў, Давідаў,

 

Мелеаеў, Майнанаў, Маттафаеў, Нафанаў, Давыдаў;

Ясеяў, Абідаў, Баозаў, Салмонаў, Наасонаў,

 

Йессееў, Авідаў, Ваозаў, Салмонаў, Наасонаў;

Амінадабаў, Арамаў, Ясромаў, Хварэсаў, Юдаў,

 

Амінадаваў, Арамаў, Йарамаў, Эсромаў, Фарэсаў, Юдаў;

Якубаў, Ісагакаў, Абрагамаў, Тараў, Нахораў,

 

Якубаў, Ісакаў, Абрагамаў, Фаранаў, Нахораў;

Сэрухаў, Рагабаў, Хвалекаў, Ябераў, Салаў,

 

Сэрухаў, Рагаваў, Фалекаў, Эвераў, Саланаў;

Каінанаў, Архваксадаў, Сэмаў, Нояў, Ламехаў,

 

Кайнанаў, Арфаксадаў, Сімаў, Ноеў, Ламехаў;

Матусалаў, Янохаў, Ярэдаў, Малеляіляў, Каінанаў,

 

Мафусалаў, Янохаў, Йарэдаў, Малеляілаў, Кайнанаў;

Яносаў, Сэтаў, Адамаў, Божы.

 

Эносаў, Сіфаў, Адамаў, Божы.