Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

У пятнаццатае лета панаваньня Тыберыя цэзара, калі Пілат Понтыцкі гаспадарыў у Юдэі, Ірад быў чацьвертаўладнікам у Галілеі, Піліп — брат ягоны — чацьвертаўладнікам у Ітурэі й Траханіцкай краіне, а Лізані — чацьвертаўладнікам у Авілінеі;

пры першасьвятарах Ганьне і Каяфе, быў голас Божы да Яна, сына Захара, у пустыні.

 

Пры архісьвятарах Ганьне й Кайяфе, быў голас Божы да Яна, сына Захарыя ў пустыні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І ён прайходзіў па ўсіх ваколіцах Йарданскіх, абвяшчаючы хрышчэньне пакаяньня дзеля адпушчэньня грахоў.

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

Як напісана ў кнізе слоў прароцтва Ісайі прарока: — голас усклікаючага ў пустыні: прыгатуйце шлях Госпаду, прастуйце сьцежкі Яму.

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

Усякі дол няхай выпаўніцца і ўсякая гара й пагорак няхай зьнізяцца, крывізны выпрастаюцца і ўхабы згладзяцца.

і ўбачыць кожная плоць ратунак Божы».

 

І ўбачыць усякае цела збавеньне Божае.

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

І гаварыў людзям, калі прыйходзілі хрысьціцца да яго: — параджэньне гадаўя? хто паказаў вам уцякаць ад надыходзячага гневу?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Утварэце плён годны пакаяньня, і не пачынайце гаварыць сабе: — маем айца Абрагама; бо кажу вам — з камяньня гэтага Бог можа ўзьняць дзяцей Абрагаму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Ужо й сякера пры карані дрэваў паложана: усякае дрэва, якое ня прыносіць добраго плёну, будзе сьсечана і ў агонь укінена.

І пыталіся ў яго людзі: што ж нам рабіць?

 

І пыталі людзі ў яго: што-ж нам рабіць?

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

Ён-жа ў адказ ім казаў: — хто мае дзьве адзежыны, падзяліся з тым, хто ня мае; і хто мае ежу, няхай робіць таксама.

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыйшлі й мытнікі хрысьціца й сказалі яму: — вучыцель! што нам рабіць?

Ён адказваў ім: нічога не патрабуйце больш вызначанага вам.

 

Ён-жа сказаў ім: — нічога больш таго, што вам вызначана.

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ў яго таксама й войны, кажучы: — а мы? што мы маем рабіць? і сказаў ім: — нікога не абірайце, нікога не абмаўляйце, і задавальняйцеся сваею заплатаю.

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

Народу-ж, які быў тады ў надзеі, і ўсе думалі ў сэрцах сваіх пра Яна — ці ня Хрыстос ён, —

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

Ян адказаў, гаворачы да усіх: — я вас хрышчу вадою, але йдзе Мацнейшы за мяне, у Яко я недастойны разьвязаць рамень абутку Ягонага; Ён будзе хрысьціць вас Духам Сьвятым і агнём;

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

Веялка Яго ў руцэ Ягонай, і Ён ачысьціць гумно Сваё й зьбярэ пшаніцу ў сьвіран Свою, мякіну-ж спаліць агнём незгасальным.

Шмат чаго іншага зьвеставаў ён народу, павучаючы яго.

 

І шмат чаго іншага навучальнага дабравесьціў людзям.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

Ірад-жа чацьвертаўладнікам, якому Ян дакараў за Ірадыяду, жонку брата свайго, і за ўсё, што Ірад учыніў ліхое,

дадаў да ўсяго іншага і тое, што ўвязьніў Яна ў цямніцу.

 

Прылажыў да ўсяго іншага й тое, што замкнуў Яна ў вязьніцу.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

Было-ж, калі хрысьціўся ўвесь народ, і Ісус таксама хрысьціўся й маліўся, — разчынілася неба;

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

І Дух Сьвяты зыйшоў на Яго ў цялесным выглядзе, як голуб, і быў голас з неба, прамаўляючы: Ты Сын Мой улюбены, у Табе Маё дабраволеньне.

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

Сам-жа Ісус, калі пачынаў Сваё служэньне, быў у веку лет трыццацёх, і быў, як думалі: сын Язэпаў, Іліеў;

Мататаў, Левіінаў, Мэлхіеў, Янаеў, Язэпаў,

 

Матфатаў, Левіін, Мелхіеў, Йанаеў, Язэпаў;

Мататыеў, Амосаў, Навумаў, Ясьлімаў, Нагееў.

 

Маттафіеў, Амосаў, Навумаў, Эсьлімаў, Наггеяў;

Маатаў, Мататыеў, Сэмяіеў, Язэпаў, Юдаў,

 

Маафаў, Маттафіеў, Сэміеў, Язэпаў, Юдаў;

Ёананаў, Рысаеў, Зарававэлеў, Салатыілеў, Нірыеў,

 

Йананаў, Рысаеў, Зарававеляў, Саляфіілаў, Нірыеў;

Мэлхіеў, Аддзіеў, Касамаў, Элмадамаў, Іраў,

 

Мэлхіеў, Аддзіеў, Касамаў, Элмадамаў, Іраў;

Ёсіеў, Эліезэраў, Ёрымаў, Мататаў, Левіінаў,

 

Йасіеў, Эліезэраў, Йарымаў, Матфатаў, Левіеў;

Сымонаў, Юдаў, Язэпаў, Ёнанаў, Іліякімаў,

 

Сымеонаў, Юдаў, Язэпаў, Йананаў, Эліякімаў;

Мэлеаеў, Маінанаў, Мататаеў, Натанаў, Давідаў,

 

Мелеаеў, Майнанаў, Маттафаеў, Нафанаў, Давыдаў;

Ясэеў, Авідаў, Ваозаў, Салмонаў, Наасонаў,

 

Йессееў, Авідаў, Ваозаў, Салмонаў, Наасонаў;

Амінадаваў, Арамаў, Ісромаў, Фарэсаў, Юдаў,

 

Амінадаваў, Арамаў, Йарамаў, Эсромаў, Фарэсаў, Юдаў;

Якаваў, Ісакаў, Абрагамаў, Тараў, Нахораў,

 

Якубаў, Ісакаў, Абрагамаў, Фаранаў, Нахораў;

Сэрухаў, Рагаваў, Фалекаў, Івераў, Салаў,

 

Сэрухаў, Рагаваў, Фалекаў, Эвераў, Саланаў;

Каінанаў, Арфаксадаў, Сімаў, Ноеў, Ламэхаў,

 

Кайнанаў, Арфаксадаў, Сімаў, Ноеў, Ламехаў;

Матусалаў, Інохаў, Ярэдаў, Малелеілаў, Каінанаў,

 

Мафусалаў, Янохаў, Йарэдаў, Малеляілаў, Кайнанаў;

Іносаў, Сітаў, Адамаў, Божы.

 

Эносаў, Сіфаў, Адамаў, Божы.