Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

А ў пятнаццаты год кіравання кесара Тыберыя, калі Понцій Пілат быў намеснікам Іудзеі, а чацвёртаўладальнікам Галілеі быў Ірад, Філіп жа, яго брат, быў чацвёртаўладальнікам Ітурэі і Траханіцкай зямлі, а Лісаній чацвёртаўладальнікам Авіліны,

пры першасьвятарах Ганьне і Каяфе, быў голас Божы да Яна, сына Захара, у пустыні.

 

пры першасвятары Ганну і Каіяфе, было слова Божае да Іаана, сына Захарыевана, у пустэльні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І ён прайшоў усё наваколле Іардана, абвяшчаючы хрышчэнне пакаяння дзеля адпушчэння грахоў,

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

як напісана ў кнізе слоў прарока Ісаіі: «Голас прапаведніка ў пустэльні: «Падрыхтуйце дарогу Госпаду, простымі зрабіце Яму сцежкі;

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

кожны дол няхай напоўніцца, а кожная гара і пагорак няхай панізяцца, і крывое няхай выпрастаецца, і выбоістыя дарогі стануць гладкімі;

і ўбачыць кожная плоць ратунак Божы».

 

і ўбачыць кожнае стварэнне выратаванне Божае».

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

Дык ён казаў натоўпам, што выходзілі, каб хрысціцца ў яго: Гадзючыя выпадкі, хто паказаў вам уцякаць ад будучага гневу?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Дык стварыце годныя плады пакаяння і не пачынайце казаць самім сабе: «Бацька ў нас Аўраам». Бо кажу вам, што Бог можа з гэтых камянёў узняць дзяцей Аўрааму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Ужо ж і сякера ляжыць пры корані дрэў; дык кожнае дрэва, што добрага плоду не родзіць, ссякаюць і кідаюць у агонь.

І пыталіся ў яго людзі: што ж нам рабіць?

 

І натоўпы пыталіся ў яго, кажучы: Дык што нам рабіць?

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

Ён жа ў адказ ім казаў: Хто мае два хітоны, няхай дасць таму, хто не мае, і хто мае ежу, няхай гэтак жа зробіць.

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыйшлі ж і зборшчыкі падаткаў хрысціцца і сказалі яму: Настаўніку, што нам рабіць?

Ён адказваў ім: нічога не патрабуйце больш вызначанага вам.

 

І ён ім сказаў: Не спаганяйце нічога больш, чым вызначана вам.

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ж у яго і воіны, кажучы: А нам што рабіць? — І сказаў ім: Ні ў кога нічога не вымагайце, не даносьце і задавальняйцеся сваёю платаю.

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

Калі ж народ чакаў і ўсе разважалі ў сваіх сэрцах пра Іаана, ці не Хрыстос ён,

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

Іаан адказаў, кажучы ўсім: Я вадою хрышчу вас; а ідзе Мацнейшы за мяне, у Якога я няварты развязаць раменьчык Яго сандаляў; Ён вас будзе хрысціць Святым Духам і агнём;

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

у Яго руцэ веялка, каб ачысціць Свой умалот і сабраць пшаніцу ў Сваё сховішча, а мякіну спаліць незгасальным агнём.

Шмат чаго іншага зьвеставаў ён народу, павучаючы яго.

 

Дык, і шмат у чым іншым настаўляючы, ён дабравесціў народу.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

А Ірад, чацвёртаўладнік, выкрываны ім за Ірадыяду, жонку свайго брата, і за ўсё ліхое, што Ірад зрабіў,

дадаў да ўсяго іншага і тое, што ўвязьніў Яна ў цямніцу.

 

дадаў да ўсяго і тое, што зняволіў Іаана ў турму.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

І сталася: калі хрысціўся ўвесь народ і Ісус, ахрысціўшыся, маліўся, расчынілася неба,

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

і зышоў Святы Дух у цялесным выглядзе, як голуб на Яго, і голас з неба пачуўся: Ты Мой Сын Улюбёны, у Табе знайшоў Я задавальненне.

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

А Сам Ісус, пачынаючы Сваё служэнне, меў гадоў каля трыццаці, быў, як думалі, Сын Іосіфаў, Іліеў,

Мататаў, Левіінаў, Мэлхіеў, Янаеў, Язэпаў,

 

Матфатаў, Лявіеў, Мялхіеў, Іяннаеў, Іосіфаў,

Мататыеў, Амосаў, Навумаў, Ясьлімаў, Нагееў.

 

Матафіеў, Амосаў, Навумаў, Гесліеў, Нагееў,

Маатаў, Мататыеў, Сэмяіеў, Язэпаў, Юдаў,

 

Маафаў, Матафіеў, Семяінаў, Іасіхаў, Іадаеў,

Ёананаў, Рысаеў, Зарававэлеў, Салатыілеў, Нірыеў,

 

Іаананаў, Рысаеў, Дзарававелеў, Салафіілеў, Нірыеў,

Мэлхіеў, Аддзіеў, Касамаў, Элмадамаў, Іраў,

 

Мялхіеў, Аддзеў, Касамаў, Элмадамаў, Іраў,

Ёсіеў, Эліезэраў, Ёрымаў, Мататаў, Левіінаў,

 

Ісусаў, Эліедзераў, Іарымаў, Матфатаў, Лявіеў,

Сымонаў, Юдаў, Язэпаў, Ёнанаў, Іліякімаў,

 

Сімяонаў, Іудаў, Іосіфаў, Іананаў, Эліякімаў,

Мэлеаеў, Маінанаў, Мататаеў, Натанаў, Давідаў,

 

Меляаеў, Мяннаеў, Матафаеў, Нафанаў, Давідаў,

Ясэеў, Авідаў, Ваозаў, Салмонаў, Наасонаў,

 

Іессееў, Авідаў, Ваозаў, Салаў, Наасонаў,

Амінадаваў, Арамаў, Ісромаў, Фарэсаў, Юдаў,

 

Амінадаваў, Адмінаў, Арніеў, Гесромаў, Фарэсаў, Іудаў,

Якаваў, Ісакаў, Абрагамаў, Тараў, Нахораў,

 

Іякаваў, Ісаакаў, Аўраамаў, Фараў, Нахораў,

Сэрухаў, Рагаваў, Фалекаў, Івераў, Салаў,

 

Сярухаў, Рагаваў, Фалекаў, Эвераў, Салаў,

Каінанаў, Арфаксадаў, Сімаў, Ноеў, Ламэхаў,

 

Каінамаў, Арфаксадаў, Сімаў, Ноеў, Ламехаў,

Матусалаў, Інохаў, Ярэдаў, Малелеілаў, Каінанаў,

 

Мафусалаў, Энохаў, Іярэтаў, Малеляілаў, Каінамаў,

Іносаў, Сітаў, Адамаў, Божы.

 

Эносаў, Сіфаў, Адамаў, Божы.