Лукаша 3 разьдзел

 

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

 

А ў пятнаццаты год кіравання кесара Тыберыя, калі Понцій Пілат быў намеснікам Іудзеі, а чацвёртаўладальнікам Галілеі быў Ірад, Філіп жа, яго брат, быў чацвёртаўладальнікам Ітурэі і Траханіцкай зямлі, а Лісаній чацвёртаўладальнікам Авіліны,

пры архірэях Ганьне і Каяхве было Слова Божае да Яана, Захаравага сына, у пустэльні.

 

пры першасвятары Ганну і Каіяфе, было слова Божае да Іаана, сына Захарыевана, у пустэльні.

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

 

І ён прайшоў усё наваколле Іардана, абвяшчаючы хрышчэнне пакаяння дзеля адпушчэння грахоў,

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

 

як напісана ў кнізе слоў прарока Ісаіі: «Голас прапаведніка ў пустэльні: «Падрыхтуйце дарогу Госпаду, простымі зрабіце Яму сцежкі;

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

 

кожны дол няхай напоўніцца, а кожная гара і пагорак няхай панізяцца, і крывое няхай выпрастаецца, і выбоістыя дарогі стануць гладкімі;

і ўбачыць кожнае цела збаўленьне Божае.

 

і ўбачыць кожнае стварэнне выратаванне Божае».

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

 

Дык ён казаў натоўпам, што выходзілі, каб хрысціцца ў яго: Гадзючыя выпадкі, хто паказаў вам уцякаць ад будучага гневу?

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

 

Дык стварыце годныя плады пакаяння і не пачынайце казаць самім сабе: «Бацька ў нас Аўраам». Бо кажу вам, што Бог можа з гэтых камянёў узняць дзяцей Аўрааму.

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

 

Ужо ж і сякера ляжыць пры корані дрэў; дык кожнае дрэва, што добрага плоду не родзіць, ссякаюць і кідаюць у агонь.

І пыталіся ў яго людзі, кажучы: што ж (нам) рабіць?

 

І натоўпы пыталіся ў яго, кажучы: Дык што нам рабіць?

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

 

Ён жа ў адказ ім казаў: Хто мае два хітоны, няхай дасць таму, хто не мае, і хто мае ежу, няхай гэтак жа зробіць.

Прыйшлі ж і мытнікі ахрысьціцца і сказалі яму: настаўнік! што на́м рабіць?

 

Прыйшлі ж і зборшчыкі падаткаў хрысціцца і сказалі яму: Настаўніку, што нам рабіць?

Ён жа адказаў ім: нічога большага за загаданае вам ня спаганяйце.

 

І ён ім сказаў: Не спаганяйце нічога больш, чым вызначана вам.

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

 

Пыталіся ж у яго і воіны, кажучы: А нам што рабіць? — І сказаў ім: Ні ў кога нічога не вымагайце, не даносьце і задавальняйцеся сваёю платаю.

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

 

Калі ж народ чакаў і ўсе разважалі ў сваіх сэрцах пра Іаана, ці не Хрыстос ён,

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

 

Іаан адказаў, кажучы ўсім: Я вадою хрышчу вас; а ідзе Мацнейшы за мяне, у Якога я няварты развязаць раменьчык Яго сандаляў; Ён вас будзе хрысціць Святым Духам і агнём;

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

 

у Яго руцэ веялка, каб ачысціць Свой умалот і сабраць пшаніцу ў Сваё сховішча, а мякіну спаліць незгасальным агнём.

І вось, і многае другое, навучаючы, дабравесьціў (ён) народу.

 

Дык, і шмат у чым іншым настаўляючы, ён дабравесціў народу.

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

 

А Ірад, чацвёртаўладнік, выкрываны ім за Ірадыяду, жонку свайго брата, і за ўсё ліхое, што Ірад зрабіў,

дадаў да ўсяго і тое, што пасадзіў Яана ў вязьніцу.

 

дадаў да ўсяго і тое, што зняволіў Іаана ў турму.

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

 

І сталася: калі хрысціўся ўвесь народ і Ісус, ахрысціўшыся, маліўся, расчынілася неба,

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

 

і зышоў Святы Дух у цялесным выглядзе, як голуб на Яго, і голас з неба пачуўся: Ты Мой Сын Улюбёны, у Табе знайшоў Я задавальненне.

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

 

А Сам Ісус, пачынаючы Сваё служэнне, меў гадоў каля трыццаці, быў, як думалі, Сын Іосіфаў, Іліеў,

Маттатаў, Ле́віяў, Ме́льхіяў, Яанаў, Язэпаў,

 

Матфатаў, Лявіеў, Мялхіеў, Іяннаеў, Іосіфаў,

Маттаціяў, Амо́саў, Навумаў, Ясьлімаў, Нагеяў,

 

Матафіеў, Амосаў, Навумаў, Гесліеў, Нагееў,

Маатаў, Маттаціяў, Самеяў, Язэпаў, Юдаў,

 

Маафаў, Матафіеў, Семяінаў, Іасіхаў, Іадаеў,

Яананаў, Рысаяў, Зараба́бэляў, Салятыілаў, Нірыяў,

 

Іаананаў, Рысаеў, Дзарававелеў, Салафіілеў, Нірыеў,

Мэльхіяў, Адзіяў, Касамаў, Ялмадамаў, Іраў,

 

Мялхіеў, Аддзеў, Касамаў, Элмадамаў, Іраў,

Ясіяў, Яліязэраў, Іярымаў, Маттатаў, Ле́віяў,

 

Ісусаў, Эліедзераў, Іарымаў, Матфатаў, Лявіеў,

Сымонаў, Юдаў, Язэпаў, Яананаў, Яліякімаў,

 

Сімяонаў, Іудаў, Іосіфаў, Іананаў, Эліякімаў,

Мэлеаяў, Маінанаў, Маттатаяў, Натанаў, Давідаў,

 

Меляаеў, Мяннаеў, Матафаеў, Нафанаў, Давідаў,

Ясеяў, Абідаў, Баозаў, Салмонаў, Наасонаў,

 

Іессееў, Авідаў, Ваозаў, Салаў, Наасонаў,

Амінадабаў, Арамаў, Ясромаў, Хварэсаў, Юдаў,

 

Амінадаваў, Адмінаў, Арніеў, Гесромаў, Фарэсаў, Іудаў,

Якубаў, Ісагакаў, Абрагамаў, Тараў, Нахораў,

 

Іякаваў, Ісаакаў, Аўраамаў, Фараў, Нахораў,

Сэрухаў, Рагабаў, Хвалекаў, Ябераў, Салаў,

 

Сярухаў, Рагаваў, Фалекаў, Эвераў, Салаў,

Каінанаў, Архваксадаў, Сэмаў, Нояў, Ламехаў,

 

Каінамаў, Арфаксадаў, Сімаў, Ноеў, Ламехаў,

Матусалаў, Янохаў, Ярэдаў, Малеляіляў, Каінанаў,

 

Мафусалаў, Энохаў, Іярэтаў, Малеляілаў, Каінамаў,

Яносаў, Сэтаў, Адамаў, Божы.

 

Эносаў, Сіфаў, Адамаў, Божы.