Лукаша 3 разьдзел

 

 

У пятнаццаты ж год праўле́ння ке́сара Тыве́рыя, калі Понцій Пілат быў правíцелем у Іудзеі, Ірад быў тэтра́рхам у Галіле́і, а Філіп, брат яго, тэтра́рхам у Ітурэ́і і Траханíцкай зямлі, а Ліса́ній тэтра́рхам у Авіліне́і,

 

На пятнаццаты год панавання цэзара Тыберыя, калі Понцкі Пілат кіраваў у Юдэі, а Ірад быў тэтрархам Галілеі, а брат яго Піліп — тэтрархам Ітурэі і Траханіцкай краіны, а Лісанія — тэтрархам Абіліны,

пры першасвятарах Анне і Каіа́фе, было́ слова Божае да Іаана, сына Заха́рыі, у пусты́ні.

 

пры першасвятарах Анну і Кайфу было слова Бога да Яна, сына Захарыі, у пустыні.

І прайшоў ён усё навако́лле Іарданскае, прапаве́дуючы хрышчэ́нне пакая́ння дзе́ля адпушчэ́ння грахоў,

 

І прайшоў ён усю зямлю вакол Ярдана, прапаведуючы хрост навяртання дзеля адпушчэння грахоў,

як напíсана ў кнізе слоў Іса́іі прарока: «голас таго, хто клíча ў пусты́ні: падрыхту́йце шлях Госпаду, про́стымі зрабíце сце́жкі Яму;

 

як напісана ў кнізе прамоў Ісаі прарока: «Голас лямантуючага ў пустыні: рыхтуйце дарогу Госпаду, прастуйце сцежкі Яму.

кожны дол няхай напо́ўніцца, і кожная гара́ і ўзгорак няхай панíзяцца, і крывое няхай вы́прастаецца, і няроўныя дарогі стануць гла́дкімі,

 

Хай усякая яма будзе засыпана, і кожная гара і ўзгорак хай будуць паніжаны, і крывізны хай стануць роўнымі, а церні — гладкімі дарогамі,

і ўбачыць кожная плоць спасе́нне Божае».

 

і ўбачаць усе канцы свету збаўленне Бога нашага».

І вось сказаў народу, які прыходзіў хрысцíцца ад яго: адро́ддзе яхíдніна! хто намо́віў вас уцяка́ць ад будучага гневу?

 

І натоўпам, што прыходзілі да яго атрымаць хрост, гаварыў: «Змяінае племя, хто заверыў вас, што ўсцеражэцеся будучага гневу?

Прынясíце ж годныя плады́ пакая́ння і не думайце гаварыць самі сабе: «айцец ў нас Аўраам»; бо кажу вам, што Бог можа з камянёў гэтых узве́сці дзяцей Аўрааму.

 

Чыніце належныя плады навяртання, і перастаньце хваліцца між сабой: «Маем бацьку Абрагама»; кажу вам, што Бог можа з гэтых каменняў падняць сыноў Абрагаму.

Ужо і сяке́ра пры ко́рані дрэў ляжы́ць: бо ўсякае дрэва, якое не прыно́сіць добрага плоду, ссяка́юць і кíдаюць у агонь.

 

Ужо вось сякера прыстаўлена да карэнняў дрэў, кожнае дрэва, што не дае добрага плода, будзе ссечана і кінута ў агонь».

І пытаўся ў яго народ, ка́жучы: што ж рабіць нам?

 

Дык пыталіся ў яго натоўпы: «Што тады маем рабіць?»

Ён жа гаворыць ім у адказ: хто ма́е дзве кашу́лі, няхай дасць таму, хто не ма́е, і хто ма́е ежу, няхай зробіць гэтаксама.

 

Адказваючы, ён гаварыў ім: «Хто мае дзве вопраткі, хай дасць таму, хто не мае. І хто мае ежу, хай зробіць падобна».

Прыйшлі і мы́тнікі хрысцíцца ад яго і сказалі яму: настаўнік! што нам рабіць?

 

Прыходзілі таксама мытнікі, каб атрымаць хрост, і яны сказалі яму: «Вучыцелю, што мы маем рабіць?»

А ён сказаў ім: нічога больш за вы́значанае вам не спаганя́йце.

 

А ён ім сказаў: «Нічога не рабіце больш таго, што вам прызначана».

Пыталіся ў яго таксама і воіны, гаво́рачы: а нам што рабіць? І сказаў ім: не чынíце крыўды нікому, не даносьце і задавальня́йцеся пла́тай сваёй.

 

Пыталіся ў яго таксама жаўнеры, кажучы: «А што мы маем рабіць?» А ён ім казаў: «Нікога не біце, не нагаворвайце і будзьце задаволены сваёю платаю».

Калі ж народ быў у чака́нні і ўсе разважа́лі ў сэ́рцах сваіх пра Іаана, ці не Хрыстос ён, —

 

А калі народ сумняваўся ды ўсе ў душы пачыналі разважаць пра Яна, ці ён часам не Хрыстос,

адказаў Іаан усім, гаворачы: я вадою хрышчу́ вас, але ідзе Мацнейшы за мяне, у Якога я нява́рты развяза́ць раме́нь абутку Яго; Ён будзе хрысцíць вас Духам Святым і агнём.

 

Ян адказваў, кажучы ўсім: «Я хрышчу вас вадою. Але прыйдзе дужэйшы ад мяне, Катораму я не варты развязаць рамень Яго пасталоў. Ён будзе вас хрысціць Духам Святым і агнём.

Лапа́та Яго ў руцэ́ Яго, і Ён ачы́сціць гумно́ Сваё, і збярэ́ пшаніцу ў жы́тніцу Сваю, а мякíну спа́ліць агнём непага́сным.

 

Ён трымае ў руцэ Сваёй веялку і ачысціць ток Свой, ды збярэ пшаніцу ў свіран Свой, а салому спаліць у агні незгасальным».

І многа ў чым іншым настаўля́ючы, дабраве́сціў ён народу.

 

Многаму таксама іншаму навучаючы, абвяшчаў народу добрую вестку.

А Ірад тэтра́рх, выкрыва́ны ім за Ірадыя́ду, жонку Філіпа, брата свайго, і за ўсё ліхое, што зрабіў Ірад,

 

Але Ірад, тэтрарх, які дакараўся Янам дзеля Ірадыяды, жонкі брата яго, ды дзеля іншых ліхіх учынкаў, якія ўчыніў Ірад,

дада́ў да ўсяго яшчэ і тое, што зачынíў Іаана ў цямнíцы.

 

дадаў да ўсяго і тое, што пасадзіў Яна ў вязніцу.

І ста́лася: калі хрысцíўся ўвесь народ, і Іісус, ахрысцíўшыся, маліўся, раскры́лася неба,

 

І сталася, калі ўвесь народ хрысціўся, і Ісус быў ахрышчаны і маліўся, адкрылася неба,

і сышоў на Яго Дух Святы́ ў цяле́сным вы́глядзе, як голуб, і голас быў з неба, які прамовіў: Ты Сын Мой Узлю́блены, Цябе Я ўпадаба́ў.

 

і Дух Святы цялесна ў выглядзе галуба сышоў на Ісуса. І азваўся голас з неба: «Ты — Сын Мой улюбёны, у Табе Маё ўпадабанне».

А Сам Іісус меў гадоў трыццаць, калі распачына́ў, і быў, як думалі, Сын Іо́сіфаў, Ілíеў,

 

Ісус меў каля трыццаці гадоў, калі пачынаў Сваё служэнне, і быў, як лічылася, сынам Язэпа, сына Гэлі,

Матфа́таў, Левíеў, Мелхíеў, Іана́еў, Іо́сіфаў,

 

сына Матата, сына Леві, сына Мэльха, сына Яны, сына Язэпа,

Матафíеў, Амо́саў, Нау́маў, Еслíмаў, Нагге́еў,

 

сына Мататыі, сына Амоса, сына Нагума, сына Эсля, сына Нагі,

Маа́фаў, Матафíеў, Семеíеў, Іо́сіфаў, Іу́даў,

 

сына Магата, сына Мататыі, сына Сэмэя, сына Язэха, сына Ёды,

Іаана́наў, Рыса́еў, Зарава́велеў, Салафіíлеў, Ніры́еў,

 

сына Яна, сына Рэсы, сына Зарабабэля, сына Салатыэля, сына Нэра,

Мелхíеў, Аддзíеў, Каса́маў, Елмада́маў, Íраў,

 

сына Мэльха, сына Адыя, сына Касама, сына Эльмадама, сына Эра,

Іасíеў, Еліезе́раў, Іары́маў, Матфа́таў, Левíеў,

 

сына Ешуа, сына Эліязара, сына Ярыма, сына Матата, сына Левія,

Сімяо́наў, Іу́даў, Іосіфаў, Іана́наў, Еліакíмаў,

 

сына Сімяона, сына Юды, сына Язэпа, сына Ёны, сына Эліякіма,

Мелеа́еў, Маіна́наў, Маттафа́еў, Нафа́наў, Давíдаў,

 

сына Мэлея, сына Мэнны, сына Матата, сына Натана, сына Давіда,

Іесе́еў, Авíдаў, Вао́заў, Салмо́наў, Наасо́наў,

 

сына Ясэя, сына Абэда, сына Боаза, сына Салы, сына Нагасона,

Амінада́ваў, Ара́маў, Есро́маў, Фарэ́саў, Іу́даў,

 

сына Амінадаба, сына Адміна, сына Арні, сына Хэцрона, сына Пэрэса, сына Юды,

Іа́каваў, Ісаа́каў, Аўраа́маў, Фа́раў, Нахо́раў,

 

сына Якуба, сына Ізаака, сына Абрагама, сына Тэраха, сына Нахора,

Серу́хаў, Рага́ваў, Фале́каў, Еве́раў, Са́лаў,

 

сына Сэруга, сына Рагава, сына Пэлега, сына Гэбэра, сына Сэлаха,

Каіна́наў, Арфакса́даў, Сíмаў, Но́еў, Ла́мехаў,

 

сына Кенана, сына Арпаксада, сына Сэма, сына Ноя, сына Ламэха,

Мафуса́лаў, Ено́хаў, Іарэ́даў, Малелеíлаў, Каіна́наў,

 

сына Мэтусалаха, сына Гэноха, сына Ярэда, сына Малаліэля, сына Кенана,

Ено́саў, Сíфаў, Ада́маў, Божы.

 

сына Эноса, сына Сэта, сына Адама, сына Божага.