Лукаша 3 разьдзел

 

 

Пятнанцатага году дзяржавы цэсара Тыбэра, як Понт Пілат быў намесьнікам Юдэі, Гірад быў чацьвертнікам у Ґалілеі, а Піліп, брат ягоны, чацьвертнікам Ітурэі а Трахоніцкае краіны, а Лізан чацьвертнікам Абіленеі,

 

На пятнаццаты год панавання цэзара Тыберыя, калі Понцкі Пілат кіраваў у Юдэі, а Ірад быў тэтрархам Галілеі, а брат яго Піліп — тэтрархам Ітурэі і Траханіцкай краіны, а Лісанія — тэтрархам Абіліны,

За найвышшых сьвятароў Ганны а Каяпы, было слова Божае да Яана Захаронка на пустыні.

 

пры першасвятарах Анну і Кайфу было слова Бога да Яна, сына Захарыі, у пустыні.

І ён праходзіў па ўсёй краіне ля Ёрдану, абяшчаючы хрэст каяты дзеля дараваньня грахоў,

 

І прайшоў ён усю зямлю вакол Ярдана, прапаведуючы хрост навяртання дзеля адпушчэння грахоў,

Як напісана ў кнізе словаў Ісаі прарокі, кажучы: «Голас гукаючага на пустыні: гатуйце дарогу Спадарову, прастайце сьцелжі Ягоныя;

 

як напісана ў кнізе прамоў Ісаі прарока: «Голас лямантуючага ў пустыні: рыхтуйце дарогу Госпаду, прастуйце сцежкі Яму.

Кажная даліна напоўніцца, і кажная гара а ўзгорак паніжыцца, і скрыўленыя выпрастаюцца, і драгкія дарогі стануць гладкімі;

 

Хай усякая яма будзе засыпана, і кожная гара і ўзгорак хай будуць паніжаны, і крывізны хай стануць роўнымі, а церні — гладкімі дарогамі,

І кажнае цела абача спасеньне Божае».

 

і ўбачаць усе канцы свету збаўленне Бога нашага».

Тады сказаў ён гурбе, што прыходзіла хрысьціцца ў яго: «Родзе яшчарыны! хто перасьцярог вас уцякаць ад надыходзячага гневу?

 

І натоўпам, што прыходзілі да яго атрымаць хрост, гаварыў: «Змяінае племя, хто заверыў вас, што ўсцеражэцеся будучага гневу?

Дык радзіце плады гожыя каяты. І не пачынайце гукаць сабе: "Айцец у нас Абрагам"; бо кажу вам, што Бог можа з камянёў гэтых узьняць дзеці Абрагаму.

 

Чыніце належныя плады навяртання, і перастаньце хваліцца між сабой: «Маем бацьку Абрагама»; кажу вам, што Бог можа з гэтых каменняў падняць сыноў Абрагаму.

Ужо й сякіра да караня дзерваў прыложана; дык кажнае дзерва, што ня родзе добрага плоду, сякуць а кідаюць у цяпло».

 

Ужо вось сякера прыстаўлена да карэнняў дрэў, кожнае дрэва, што не дае добрага плода, будзе ссечана і кінута ў агонь».

І пыталіся ў яго гурбы, кажучы: «Дык што маем рабіць?»

 

Дык пыталіся ў яго натоўпы: «Што тады маем рабіць?»

Ён, адказуючы, сказаў ім: «Хто мае дзьве адзежы, дай нямаючаму; і хто мае ежу, рабі тое самае».

 

Адказваючы, ён гаварыў ім: «Хто мае дзве вопраткі, хай дасць таму, хто не мае. І хто мае ежу, хай зробіць падобна».

Тады прышлі таксама мытнікі хрысьціцца і сказалі яму: «Вучыцелю, што мы маем рабіць?»

 

Прыходзілі таксама мытнікі, каб атрымаць хрост, і яны сказалі яму: «Вучыцелю, што мы маем рабіць?»

І сказаў ім: «Нічога не вымагайце балей за прызначанае вам».

 

А ён ім сказаў: «Нічога не рабіце больш таго, што вам прызначана».

І пыталіся ў яго таксама жаўнеры, кажучы: «А мы што маем рабіць?» І ён адказаў ім: «Не рабіце ўсілства нікому ані вінуйце хвальшыва, і будзьце здаволіўшыся з платы свае».

 

Пыталіся ў яго таксама жаўнеры, кажучы: «А што мы маем рабіць?» А ён ім казаў: «Нікога не біце, не нагаворвайце і будзьце задаволены сваёю платаю».

І як люд спадзяваўся, і думалі ўсі ў сэрцах сваіх празь Яана, ці ня быў можа ён Хрыстос,

 

А калі народ сумняваўся ды ўсе ў душы пачыналі разважаць пра Яна, ці ён часам не Хрыстос,

Яан адказаў, кажучы ўсім: «Я запраўды хрышчу вас вадою, але йдзець дужшы за мяне, у Каторага я ня гожы разьвязаць рэменьчыка ў вобую Ягоным; Ён будзе хрысьціць вас Духам Сьвятым а агнём.

 

Ян адказваў, кажучы ўсім: «Я хрышчу вас вадою. Але прыйдзе дужэйшы ад мяне, Катораму я не варты развязаць рамень Яго пасталоў. Ён будзе вас хрысціць Духам Святым і агнём.

Веялка Ягоная ў руццэ Ягонай, і Ён ачысьце такаўню Сваю, і пшонку зьбярэць у сьвіран, а ўмецьце спале агнём няўгасным».

 

Ён трымае ў руцэ Сваёй веялку і ачысціць ток Свой, ды збярэ пшаніцу ў свіран Свой, а салому спаліць у агні незгасальным».

І шмат чаго іншага напамінаючы, даваў дабравесьць люду.

 

Многаму таксама іншаму навучаючы, абвяшчаў народу добрую вестку.

Гірад жа чацьвертнік, ганены ім за Гіродзяду, жонку брата свайго Піліпа, і за ўсе ліха, што Гірад зрабіў,

 

Але Ірад, тэтрарх, які дакараўся Янам дзеля Ірадыяды, жонкі брата яго, ды дзеля іншых ліхіх учынкаў, якія ўчыніў Ірад,

Дадаў яшчэ да ўсяго тое, што пасадзіў Яана ў вязьніцу.

 

дадаў да ўсяго і тое, што пасадзіў Яна ў вязніцу.

І сталася, як хрысьціўся ўвесь люд, і Ісус, ахрысьціўшыся, маліўся, нябёсы рашчыніліся,

 

І сталася, калі ўвесь народ хрысціўся, і Ісус быў ахрышчаны і маліўся, адкрылася неба,

І ісступіў Дух Сьвяты на Яго ў цялесным выглядзе, як галуба, і прышоў голас ізь неба, кажучы: «Ты Сын Мой любовы; Цябе Я ўпадабаў!»

 

і Дух Святы цялесна ў выглядзе галуба сышоў на Ісуса. І азваўся голас з неба: «Ты — Сын Мой улюбёны, у Табе Маё ўпадабанне».

А Самому Ісусу, як пачынаў, было год трыццаць веку, будучы, як думалі, сынам Язэпа Гілянка,

 

Ісус меў каля трыццаці гадоў, калі пачынаў Сваё служэнне, і быў, як лічылася, сынам Язэпа, сына Гэлі,

Матфацёнка, Левянка, Мельшанка, Янянка, Язэпенка,

 

сына Матата, сына Леві, сына Мэльха, сына Яны, сына Язэпа,

Маттафёнка, Амасёнка, Нагумёнка, Есьлянка, Наґґаёнка,

 

сына Мататыі, сына Амоса, сына Нагума, сына Эсля, сына Нагі,

Маафёнка, Матгафёнка, Сэмеёнка, Язэпенка, Юдзянка,

 

сына Магата, сына Мататыі, сына Сэмэя, сына Язэха, сына Ёды,

Яанёнка, Рысаёнка, Зэрувавеленка, Шэалфіеленка, Ніранка,

 

сына Яна, сына Рэсы, сына Зарабабэля, сына Салатыэля, сына Нэра,

Мельшанка, Адзьдзянка, Косамёнка, Елмодамёнка, Іранка,

 

сына Мэльха, сына Адыя, сына Касама, сына Эльмадама, сына Эра,

Ёсянка, Елезэранка, Ёрыменка, Матфацёнка, Левянка,

 

сына Ешуа, сына Эліязара, сына Ярыма, сына Матата, сына Левія,

Сыманёнка, Юдзянка, Язэпенка, Ёнанёнка, Елякімёнка,

 

сына Сімяона, сына Юды, сына Язэпа, сына Ёны, сына Эліякіма,

Малеаёнка, Менанёнка, Маттафёнка, Нафанёнка, Давідзёнка,

 

сына Мэлея, сына Мэнны, сына Матата, сына Натана, сына Давіда,

Есянка, Овідзёнка, Воозёнка, Салмонёнка, Наасонёнка,

 

сына Ясэя, сына Абэда, сына Боаза, сына Салы, сына Нагасона,

Амінадавенка, Арамёнка, Есромёнка, Фарэсёнка, Юдзянка,

 

сына Амінадаба, сына Адміна, сына Арні, сына Хэцрона, сына Пэрэса, сына Юды,

Якавёнка, Ісачонка, Абрагаменка, Фаранка, Нахаронка,

 

сына Якуба, сына Ізаака, сына Абрагама, сына Тэраха, сына Нахора,

Сэрушонка, Раґавёнка, Фалечонка, Еверонка, Салянка,

 

сына Сэруга, сына Рагава, сына Пэлега, сына Гэбэра, сына Сэлаха,

Каінанёнка, Арфаксадзенка, Сэмянка, Ноянка, Ламёшанка,

 

сына Кенана, сына Арпаксада, сына Сэма, сына Ноя, сына Ламэха,

Мефусаленка, Енашонка, Ярэдзёнка, Малелееленка, Каінанёнка,

 

сына Мэтусалаха, сына Гэноха, сына Ярэда, сына Малаліэля, сына Кенана,

Еносёнка, Сыфянка, Адамёнка, каторы быў Божы.

 

сына Эноса, сына Сэта, сына Адама, сына Божага.