Лукаша 3 разьдзел

 

 

Пятнанцатага году дзяржавы цэсара Тыбэра, як Понт Пілат быў намесьнікам Юдэі, Гірад быў чацьвертнікам у Ґалілеі, а Піліп, брат ягоны, чацьвертнікам Ітурэі а Трахоніцкае краіны, а Лізан чацьвертнікам Абіленеі,

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

За найвышшых сьвятароў Ганны а Каяпы, было слова Божае да Яана Захаронка на пустыні.

 

пры першасьвятарах Ганьне і Каяфе, быў голас Божы да Яна, сына Захара, у пустыні.

І ён праходзіў па ўсёй краіне ля Ёрдану, абяшчаючы хрэст каяты дзеля дараваньня грахоў,

 

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

Як напісана ў кнізе словаў Ісаі прарокі, кажучы: «Голас гукаючага на пустыні: гатуйце дарогу Спадарову, прастайце сьцелжі Ягоныя;

 

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

Кажная даліна напоўніцца, і кажная гара а ўзгорак паніжыцца, і скрыўленыя выпрастаюцца, і драгкія дарогі стануць гладкімі;

 

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

І кажнае цела абача спасеньне Божае».

 

і ўбачыць кожная плоць ратунак Божы».

Тады сказаў ён гурбе, што прыходзіла хрысьціцца ў яго: «Родзе яшчарыны! хто перасьцярог вас уцякаць ад надыходзячага гневу?

 

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

Дык радзіце плады гожыя каяты. І не пачынайце гукаць сабе: "Айцец у нас Абрагам"; бо кажу вам, што Бог можа з камянёў гэтых узьняць дзеці Абрагаму.

 

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

Ужо й сякіра да караня дзерваў прыложана; дык кажнае дзерва, што ня родзе добрага плоду, сякуць а кідаюць у цяпло».

 

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

І пыталіся ў яго гурбы, кажучы: «Дык што маем рабіць?»

 

І пыталіся ў яго людзі: што ж нам рабіць?

Ён, адказуючы, сказаў ім: «Хто мае дзьве адзежы, дай нямаючаму; і хто мае ежу, рабі тое самае».

 

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

Тады прышлі таксама мытнікі хрысьціцца і сказалі яму: «Вучыцелю, што мы маем рабіць?»

 

Прыйшлі і мытнікі хрысьціцца і сказалі яму: Настаўнік! што нам рабіць?

І сказаў ім: «Нічога не вымагайце балей за прызначанае вам».

 

Ён адказваў ім: нічога не патрабуйце больш вызначанага вам.

І пыталіся ў яго таксама жаўнеры, кажучы: «А мы што маем рабіць?» І ён адказаў ім: «Не рабіце ўсілства нікому ані вінуйце хвальшыва, і будзьце здаволіўшыся з платы свае».

 

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

І як люд спадзяваўся, і думалі ўсі ў сэрцах сваіх празь Яана, ці ня быў можа ён Хрыстос,

 

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

Яан адказаў, кажучы ўсім: «Я запраўды хрышчу вас вадою, але йдзець дужшы за мяне, у Каторага я ня гожы разьвязаць рэменьчыка ў вобую Ягоным; Ён будзе хрысьціць вас Духам Сьвятым а агнём.

 

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

Веялка Ягоная ў руццэ Ягонай, і Ён ачысьце такаўню Сваю, і пшонку зьбярэць у сьвіран, а ўмецьце спале агнём няўгасным».

 

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

І шмат чаго іншага напамінаючы, даваў дабравесьць люду.

 

Шмат чаго іншага зьвеставаў ён народу, павучаючы яго.

Гірад жа чацьвертнік, ганены ім за Гіродзяду, жонку брата свайго Піліпа, і за ўсе ліха, што Гірад зрабіў,

 

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

Дадаў яшчэ да ўсяго тое, што пасадзіў Яана ў вязьніцу.

 

дадаў да ўсяго іншага і тое, што ўвязьніў Яна ў цямніцу.

І сталася, як хрысьціўся ўвесь люд, і Ісус, ахрысьціўшыся, маліўся, нябёсы рашчыніліся,

 

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

І ісступіў Дух Сьвяты на Яго ў цялесным выглядзе, як галуба, і прышоў голас ізь неба, кажучы: «Ты Сын Мой любовы; Цябе Я ўпадабаў!»

 

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

А Самому Ісусу, як пачынаў, было год трыццаць веку, будучы, як думалі, сынам Язэпа Гілянка,

 

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

Матфацёнка, Левянка, Мельшанка, Янянка, Язэпенка,

 

Мататаў, Левіінаў, Мэлхіеў, Янаеў, Язэпаў,

Маттафёнка, Амасёнка, Нагумёнка, Есьлянка, Наґґаёнка,

 

Мататыеў, Амосаў, Навумаў, Ясьлімаў, Нагееў.

Маафёнка, Матгафёнка, Сэмеёнка, Язэпенка, Юдзянка,

 

Маатаў, Мататыеў, Сэмяіеў, Язэпаў, Юдаў,

Яанёнка, Рысаёнка, Зэрувавеленка, Шэалфіеленка, Ніранка,

 

Ёананаў, Рысаеў, Зарававэлеў, Салатыілеў, Нірыеў,

Мельшанка, Адзьдзянка, Косамёнка, Елмодамёнка, Іранка,

 

Мэлхіеў, Аддзіеў, Касамаў, Элмадамаў, Іраў,

Ёсянка, Елезэранка, Ёрыменка, Матфацёнка, Левянка,

 

Ёсіеў, Эліезэраў, Ёрымаў, Мататаў, Левіінаў,

Сыманёнка, Юдзянка, Язэпенка, Ёнанёнка, Елякімёнка,

 

Сымонаў, Юдаў, Язэпаў, Ёнанаў, Іліякімаў,

Малеаёнка, Менанёнка, Маттафёнка, Нафанёнка, Давідзёнка,

 

Мэлеаеў, Маінанаў, Мататаеў, Натанаў, Давідаў,

Есянка, Овідзёнка, Воозёнка, Салмонёнка, Наасонёнка,

 

Ясэеў, Авідаў, Ваозаў, Салмонаў, Наасонаў,

Амінадавенка, Арамёнка, Есромёнка, Фарэсёнка, Юдзянка,

 

Амінадаваў, Арамаў, Ісромаў, Фарэсаў, Юдаў,

Якавёнка, Ісачонка, Абрагаменка, Фаранка, Нахаронка,

 

Якаваў, Ісакаў, Абрагамаў, Тараў, Нахораў,

Сэрушонка, Раґавёнка, Фалечонка, Еверонка, Салянка,

 

Сэрухаў, Рагаваў, Фалекаў, Івераў, Салаў,

Каінанёнка, Арфаксадзенка, Сэмянка, Ноянка, Ламёшанка,

 

Каінанаў, Арфаксадаў, Сімаў, Ноеў, Ламэхаў,

Мефусаленка, Енашонка, Ярэдзёнка, Малелееленка, Каінанёнка,

 

Матусалаў, Інохаў, Ярэдаў, Малелеілаў, Каінанаў,

Еносёнка, Сыфянка, Адамёнка, каторы быў Божы.

 

Іносаў, Сітаў, Адамаў, Божы.