Лукаша 3 разьдзел

 

 

У пятнаццаты год панавання цэзара Тыберыя, калі Понцій Пілат быў намеснікам Юдэі, а Ірад быў тэтрархам Галілеі, Філіп, брат ягоны, тэтрархам Ітурэі і Траханіцкай зямлі, а Лізанія тэтрархам Абілены,

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

пры першасвятарах Анне і Каяфе, было скіравана слова Божае да Яна, сына Захарыі, у пустыні.

 

пры першасьвятарах Ганьне і Каяфе, быў голас Божы да Яна, сына Захара, у пустыні.

Ён прайшоў усе ваколіцы Ярдана, абвяшчаючы хрост пакаяння дзеля адпушчэння грахоў,

 

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

як напісана ў кнізе слоў прарока Ісаі: «Голас таго, хто кліча ў пустыні:“Падрыхтуйце дарогу Пану,простымі рабіце сцежкі Яму!

 

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

Кожная даліна ўзвысіцца,кожная гара і пагорак панізяцца,і выбоістыя дарогі стануць раўнінай,а ланцугі гор — далінаю.

 

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

І ўбачыць кожнае целаБожае збаўленне”».

 

і ўбачыць кожная плоць ратунак Божы».

Ён казаў натоўпам, якія прыходзілі да яго хрысціцца: «Племя змяінае, хто навучыў вас уцякаць ад будучага гневу?

 

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

Прынясіце ж годны плён пакаяння і не думайце казаць сабе: “Маем Абрагама за бацьку”; бо кажу вам, што Бог можа з камянёў гэтых абудзіць дзяцей Абрагаму.

 

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

Ужо і сякера прыкладзена да карэння дрэў. Таму кожнае дрэва, якое не дае добрага плоду, будзе ссечана і кінута ў агонь».

 

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

І пыталіся ў яго людзі, кажучы: «Што мы павінны рабіць?»

 

І пыталіся ў яго людзі: што ж нам рабіць?

Ён казаў ім у адказ: «Хто мае дзве вопраткі, няхай аддасць таму, хто не мае, і хто мае ежу, няхай зробіць тое самае».

 

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

Прыйшлі і мытнікі хрысціцца і сказалі яму: «Настаўнік, што мы павінны рабіць?»

 

Прыйшлі і мытнікі хрысьціцца і сказалі яму: Настаўнік! што нам рабіць?

Ён адказаў ім: «Нічога больш за вызначанае вам не спаганяйце».

 

Ён адказваў ім: нічога не патрабуйце больш вызначанага вам.

Пыталіся ў яго таксама і жаўнеры, кажучы: «А мы што павінны рабіць?» Ён адказаў ім: «Нікога не крыўдзіце, не абвінавачвайце несправядліва і задавольвайцеся сваёй платай».

 

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

Калі народ чакаў і калі ўсе разважалі ў сэрцах сваіх пра Яна, ці не Месія ён,

 

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

Ян адказаў усім: «Я вадою хрышчу вас, але ідзе мацнейшы за мяне, якому я няварты развязаць раменьчык на Яго сандалях. Ён вас будзе хрысціць Духам Святым і агнём.

 

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

Лапату трымае ў руцэ сваёй, каб ачысціць гумно сваё і сабраць пшаніцу ў засекі свае, а мякіну спаліць агнём непагасным».

 

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

Шмат чаго іншага прапаведаваў ён, абвяшчаючы Добрую Навіну народу.

 

Шмат чаго іншага зьвеставаў ён народу, павучаючы яго.

А тэтрарх Ірад, якога Ян дакараў за Ірадыяду, жонку яго брата Філіпа, і за ўсё зло, якое ўчыніў Ірад,

 

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

да ўсяго дадаў яшчэ і тое, што замкнуў Яна ў вязніцы.

 

дадаў да ўсяго іншага і тое, што ўвязьніў Яна ў цямніцу.

Калі хрысціўся ўвесь народ і калі Езус, прыняўшы хрост, маліўся, раскрылася неба,

 

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

і Дух Святы ў цялесным выглядзе, як голуб, сышоў на Яго, і быў голас з неба: «Ты Сын Мой умілаваны, Цябе ўпадабаў Я».

 

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

Езус, пачынаючы служэнне сваё, меў каля трыццаці гадоў і быў, як лічылі, сынам Юзафа, сына Элія,

 

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

Матата, Левія, Мэльхія, Яная, Юзафа,

 

Мататаў, Левіінаў, Мэлхіеў, Янаеў, Язэпаў,

Матація, Амоса, Навума, Эслія, Нагея,

 

Мататыеў, Амосаў, Навумаў, Ясьлімаў, Нагееў.

Маата, Матація, Сэмэя, Ёсэха, Ёды,

 

Маатаў, Мататыеў, Сэмяіеў, Язэпаў, Юдаў,

Янана, Рэсы, Зарабабэля, Салятыэля, Нэрыя,

 

Ёананаў, Рысаеў, Зарававэлеў, Салатыілеў, Нірыеў,

Мэльхія, Адзія, Касама, Эльмадама, Эра,

 

Мэлхіеў, Аддзіеў, Касамаў, Элмадамаў, Іраў,

Езуса, Эліязэра, Ярыма, Матата, Левія,

 

Ёсіеў, Эліезэраў, Ёрымаў, Мататаў, Левіінаў,

Сімяона, Юды, Юзафа, Ёнама, Эліяхіма,

 

Сымонаў, Юдаў, Язэпаў, Ёнанаў, Іліякімаў,

Мэлея, Мэны, Матата, Натана, Давіда,

 

Мэлеаеў, Маінанаў, Мататаеў, Натанаў, Давідаў,

Есэя, Абэда, Бааза, Сальмона, Наасона,

 

Ясэеў, Авідаў, Ваозаў, Салмонаў, Наасонаў,

Амінадаба, Адміна, Арні, Эзрома, Фарэса, Юды,

 

Амінадаваў, Арамаў, Ісромаў, Фарэсаў, Юдаў,

Якуба, Ісаака, Абрагама, Тарэя, Нахора,

 

Якаваў, Ісакаў, Абрагамаў, Тараў, Нахораў,

Сэруха, Рахаба, Фалека, Эбэра, Салія,

 

Сэрухаў, Рагаваў, Фалекаў, Івераў, Салаў,

Каінама, Арфаксада, Сэма, Ноя, Ламеха,

 

Каінанаў, Арфаксадаў, Сімаў, Ноеў, Ламэхаў,

Матусала, Эноха, Ярэда, Малелеэля, Каінама,

 

Матусалаў, Інохаў, Ярэдаў, Малелеілаў, Каінанаў,

Эноса, Сэта, Адама, сына Бога.

 

Іносаў, Сітаў, Адамаў, Божы.