3 Яна 1 разьдзел

 

 

Старэйшына — умілаванаму Гаю, якога я люблю ў праўдзе.

 

Старэйшы — дарагому Гаю, якога я люблю ў праўдзе.

Умілаваны, малюся, каб ты быў здаровы і каб ва ўсім шчасціла табе, як шчасціць тваёй душы.

 

Даражэнькі, малюся, каб ты быў спраўны і здаровы так, як спраўная душа твая.

Я вельмі ўзрадаваўся, калі прыйшлі браты і засведчылі пра тваю праўду і што ты паступаеш па праўдзе.

 

Вельмі ўзрадаваўся я з прыбыцця братоў, якія засведчылі праўду тваю ды як ты жывеш у праўдзе.

Для мяне няма большай радасці, як чуць, што мае дзеці жывуць у праўдзе.

 

Для мяне няма большай радасці, як пачуць, што дзеці мае жывуць у праўдзе.

Умілаваны, ты паступаеш згодна з вераю ў тым, што робіш для братоў і чужаземцаў.

 

Ты, даражэнькі, па веры робіш, калі рупішся дзеля братоў і дзеля падарожных,

Яны засведчылі перад Касцёлам пра тваю любоў. Калі адправіш іх па-Божаму, добра зробіш.

 

якія аддалі сведчанне тваёй любові перад царквою. Ты добра зробіш, калі выправіш іх у дарогу па-божаму.

Бо дзеля імя Хрыстовага яны пайшлі, нічога не беручы ад язычнікаў.

 

Бо выправіліся яны ў дарогу ў імя [Яго], не прымаючы нічога ад паганаў.

Таму мы павінны прымаць такіх людзей, каб стаць супрацоўнікамі праўды.

 

Таму мусім гасцінна прымаць такіх, каб быць саўдзельнікамі праўды.

Я напісаў ужо Касцёлу, але Дыятрэф, што любіць першынство сярод іх, не прымае нас.

 

Я напісаў крыху для царквы, але той, які хоча мець першынства сярод іх, Дыятрэф, не прымае нас.

Таму, калі прыйду, узгадаю яго ўчынкі, якія робіць, зласловячы нас. Не задавольваючыся гэтым, і сам не прымае братоў, і забараняе тым, хто хоча прымаць, ды выганяе іх з Касцёла.

 

Таму вось, калі прыбуду, нагадаю пра яго ўчынкі, што ён зрабіў, плявузгаючы на нас ліхімі словамі; і быццам яму яшчэ гэтага не хапае, сам не прымае братоў і тым, якія прымаюць, перашкаджае і выганяе з царквы.

Умілаваны, не наследуй зло, але дабро. Хто чыніць дабро, той ад Бога, а хто чыніць зло, той не бачыў Бога.

 

Даражэнькі, не наслядуй  ліхому, але таму, што добрае. Хто добрае робіць, ёсць ад Бога, а хто робіць благое, той не бачыў Бога.

Пра Дэметрыя ўсе сведчаць, нават сама праўда. І мы сведчым, а ты ведаеш, што сведчанне нашае праўдзівае.

 

Пра Дэмэтра ўсе добра сведчаць, і нават сама праўда; і мы таксама сведчым, і ты ведаеш, што сведчанне наша праўдзівае.

Пра многае меў напісаць табе, але не хацеў пісаць атрамантам і пяром,

 

Шмат я меў табе напісаць, але не хачу пісаць табе атрамантам  і пяром;

бо спадзяюся хутка ўбачыць цябе і паразмаўляць з табою.

 

спадзяюся, што хутка цябе ўбачу і тады пагаворым з вуснаў у вусны.

Спакой табе. Вітаюць цябе сябры. І ты прывітай сяброў пайменна.

 

Супакой табе. Вітаюць цябе сябры. Прывітай сяброў пайменна.