Лукаша 3 разьдзел

 

 

У пятнаццаты-ж год панаваньня Тывэрыя ке́сара, калі Понці Пілат гаспадарыў у Юдэі, Ірад быў чацьвертаўладнікам у Галіле́і, Піліп, брат яго, чацьвертаўладнікам у Ітурэі і Траханіцкай краіне, а Лісані чацьвертаўладнікам у Авілене́і,

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

пры архірэях Ганьне і Кайяфе, быў голас Божы да Іоана, сына Заха́равага, у пустыні.

 

пры архірэях Ганьне і Каяхве было Слова Божае да Яана, Захаравага сына, у пустэльні.

І ён праходзіў па ўсіх ваколіцах Іорданскіх, прапаве́дываючы хрышчэньне пакая́ньня дзеля адпушчэньня грахоў,

 

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

як напісана ў кнізе слоў прарока Ісаі, які кажа: голас клíкаючага ў пустыні: прыгатуйце шлях Госпаду, простымі зрабеце сьце́жкі Яму;

 

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

усякі дол няхай напоўніцца, і ўсякая гара́ і ўзгорак няхай зьнíзяцца, крывулі выпрастуюцца і няроўныя шляхі зробяцца гладкімі;

 

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

і ўгле́дзіць усякае це́ла спасе́ньне Божае (Ісая 40:3−5).

 

і ўбачыць кожнае цела збаўленьне Божае.

І казаў Іоан народу, які прыходзіў хрысьціцца ў яго: плод яхідніны! хто перасьцярог вас, каб уцякалі ад будучага гне́ву?

 

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

Зрабе́це-ж годныя пакаяньня плады і ня думайце гаварыць сабе́: бацька ў нас Аўраам; бо кажу вам, што Бог можа з каме́ньняў гэтых падняць дзяце́й Аўрааму.

 

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

Ужо й сяке́ра ля караня́ дрэваў ляжыць; усякае дрэва, што плоду добрага ня прыносе, зрубаецца й кідаецца ў вагонь.

 

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

І спытаўся ў яго народ: што-ж нам рабіць?

 

І пыталіся ў яго людзі, кажучы: што ж (нам) рабіць?

Ён жа сказаў ім у адказ: у каго дзьве́ адзе́жыны, той дай таму, хто ня ма́е; і ў каго ёсьць е́жа, рабі тое-ж.

 

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

Прыйшлі і мытнікі хрысьціцца і сказалі яму: вучыцель! што нам рабіць?

 

Прыйшлі ж і мытнікі ахрысьціцца і сказалі яму: настаўнік! што на́м рабіць?

Ён жа адказаў ім: нічога не бярэце больш таго, што назна́чана вам.

 

Ён жа адказаў ім: нічога большага за загаданае вам ня спаганяйце.

Пыталіся ў яго таксама й вая́кі: а нам што́ рабіць? І сказаў ім: нікога ня крыўдзьце, не абмаўляйце і здавальняйцеся сваёю платай.

 

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

Калі-ж народ быў у недаўме́ньні, і ўсе́ думалі ў сэрцах сваіх аб Іоане, ці ня Хрыстос ён?

 

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

Іоан усім адказаў: я хрышчу вас вадою, але йдзе́ Дужэйшы за мяне́, у каторага я ня варты разьвязаць раме́нь абуцьця: Ён будзе хрысьціць вас Духам Сьвятым і агнём;

 

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

лапата Яго ў руцэ Яго, і Ён ачысьціць гумно Сваё і пазьбірае пшаніцу ў сьвіран свой, а садому спаліць агнём няўга́сным.

 

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

Многа і другога прапаве́дываў ён народу, навучаючы яго.

 

І вось, і многае другое, навучаючы, дабравесьціў (ён) народу.

Ірад жа чацьвертаўладнік, дакара́ны ім за Ірадзіяду, жонку брата яго, Піліпа, і за ўсё, што Ірад зрабіў благога,

 

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

дадаў да ўсяго іншага й тое, што пасадзіў Іоана ў вязьніцу.

 

дадаў да ўсяго і тое, што пасадзіў Яана ў вязьніцу.

І сталася, як хрысьціўся ўве́сь народ, і Ісус ахрысьціўшыся маліўся, — адчынілася не́ба,

 

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

і Дух Сьвяты зыйшоў на Яго ў цяле́сным вы́глядзе, як галу́б, і быў голас з не́ба, гаворачы: Ты Сын Мой Улю́блены; цябе́ ўпадабаў Я.

 

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

Ісус, пачынаючы Сваё служэньне, быў гадоў трыццацёх і быў, як думалі, сын Язэпаў, Іліяў,

 

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

Матфанаў, Ле́віяў, Мэльхіяў, Іоанаў, Язэпаў,

 

Маттатаў, Ле́віяў, Ме́льхіяў, Яанаў, Язэпаў,

Матафíяў, Амосаў, Навумаў, Ясьлімаў, Наге́яў,

 

Маттаціяў, Амо́саў, Навумаў, Ясьлімаў, Нагеяў,

Маафаў, Матафіяў, Саме́яў, Язэпаў, Юдзін,

 

Маатаў, Маттаціяў, Самеяў, Язэпаў, Юдаў,

Іоананаў, Рысаеў, Зарававэляў, Саляфіілаў, Нірыяў,

 

Яананаў, Рысаяў, Зараба́бэляў, Салятыілаў, Нірыяў,

Мэльхіяў, Адзіяў, Касамаў, Ялмадамаў, Іраў,

 

Мэльхіяў, Адзіяў, Касамаў, Ялмадамаў, Іраў,

Есіяў, Еліязэраў, Іярымаў, Матфатаў, Ле́віін,

 

Ясіяў, Яліязэраў, Іярымаў, Маттатаў, Ле́віяў,

Сымэонаў, Юдзін, Язэпаў, Іоананаў, Эліякімаў,

 

Сымонаў, Юдаў, Язэпаў, Яананаў, Яліякімаў,

Мэлеаяў, Маінаінаў, Матафаяў, Натанаў, Давідаў,

 

Мэлеаяў, Маінанаў, Маттатаяў, Натанаў, Давідаў,

Іясе́яў, Авідаў, Ваозаў, Салмонаў, Наасонау,

 

Ясеяў, Абідаў, Баозаў, Салмонаў, Наасонаў,

Амінадаваў, Арамаў, Ясромаў, Фарэсаў, Юдзін,

 

Амінадабаў, Арамаў, Ясромаў, Хварэсаў, Юдаў,

Якубаў, Ісаакаў, Аўраамаў, Фарын, Нахораў,

 

Якубаў, Ісагакаў, Абрагамаў, Тараў, Нахораў,

Сэрухаў, Рагаваў, Фале́каў, Яве́раў, Салін,

 

Сэрухаў, Рагабаў, Хвалекаў, Ябераў, Салаў,

Каінанаў, Арфаксадаў, Сімаў, Нояў, Ламе́хаў,

 

Каінанаў, Архваксадаў, Сэмаў, Нояў, Ламехаў,

Матусалаў, Янохаў, Іарэдаў, Малеляіляў, Каінанаў,

 

Матусалаў, Янохаў, Ярэдаў, Малеляіляў, Каінанаў,

Эносаў, Сіфаў, Адамаў, Божы.

 

Яносаў, Сэтаў, Адамаў, Божы.