Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

пры першасьвятарах Ганьне і Каяфе, быў голас Божы да Яна, сына Захара, у пустыні.

 

пры архірэях Ганьне і Каяхве было Слова Божае да Яана, Захаравага сына, у пустэльні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

і ўбачыць кожная плоць ратунак Божы».

 

і ўбачыць кожнае цела збаўленьне Божае.

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

І пыталіся ў яго людзі: што ж нам рабіць?

 

І пыталіся ў яго людзі, кажучы: што ж (нам) рабіць?

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыйшлі ж і мытнікі ахрысьціцца і сказалі яму: настаўнік! што на́м рабіць?

Ён адказваў ім: нічога не патрабуйце больш вызначанага вам.

 

Ён жа адказаў ім: нічога большага за загаданае вам ня спаганяйце.

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

Шмат чаго іншага зьвеставаў ён народу, павучаючы яго.

 

І вось, і многае другое, навучаючы, дабравесьціў (ён) народу.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

дадаў да ўсяго іншага і тое, што ўвязьніў Яна ў цямніцу.

 

дадаў да ўсяго і тое, што пасадзіў Яана ў вязьніцу.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

Мататаў, Левіінаў, Мэлхіеў, Янаеў, Язэпаў,

 

Маттатаў, Ле́віяў, Ме́льхіяў, Яанаў, Язэпаў,

Мататыеў, Амосаў, Навумаў, Ясьлімаў, Нагееў.

 

Маттаціяў, Амо́саў, Навумаў, Ясьлімаў, Нагеяў,

Маатаў, Мататыеў, Сэмяіеў, Язэпаў, Юдаў,

 

Маатаў, Маттаціяў, Самеяў, Язэпаў, Юдаў,

Ёананаў, Рысаеў, Зарававэлеў, Салатыілеў, Нірыеў,

 

Яананаў, Рысаяў, Зараба́бэляў, Салятыілаў, Нірыяў,

Мэлхіеў, Аддзіеў, Касамаў, Элмадамаў, Іраў,

 

Мэльхіяў, Адзіяў, Касамаў, Ялмадамаў, Іраў,

Ёсіеў, Эліезэраў, Ёрымаў, Мататаў, Левіінаў,

 

Ясіяў, Яліязэраў, Іярымаў, Маттатаў, Ле́віяў,

Сымонаў, Юдаў, Язэпаў, Ёнанаў, Іліякімаў,

 

Сымонаў, Юдаў, Язэпаў, Яананаў, Яліякімаў,

Мэлеаеў, Маінанаў, Мататаеў, Натанаў, Давідаў,

 

Мэлеаяў, Маінанаў, Маттатаяў, Натанаў, Давідаў,

Ясэеў, Авідаў, Ваозаў, Салмонаў, Наасонаў,

 

Ясеяў, Абідаў, Баозаў, Салмонаў, Наасонаў,

Амінадаваў, Арамаў, Ісромаў, Фарэсаў, Юдаў,

 

Амінадабаў, Арамаў, Ясромаў, Хварэсаў, Юдаў,

Якаваў, Ісакаў, Абрагамаў, Тараў, Нахораў,

 

Якубаў, Ісагакаў, Абрагамаў, Тараў, Нахораў,

Сэрухаў, Рагаваў, Фалекаў, Івераў, Салаў,

 

Сэрухаў, Рагабаў, Хвалекаў, Ябераў, Салаў,

Каінанаў, Арфаксадаў, Сімаў, Ноеў, Ламэхаў,

 

Каінанаў, Архваксадаў, Сэмаў, Нояў, Ламехаў,

Матусалаў, Інохаў, Ярэдаў, Малелеілаў, Каінанаў,

 

Матусалаў, Янохаў, Ярэдаў, Малеляіляў, Каінанаў,

Іносаў, Сітаў, Адамаў, Божы.

 

Яносаў, Сэтаў, Адамаў, Божы.