Лукаша 3 разьдзел

 

 

А ў пятнаццаты год кіравання кесара Тыберыя, калі Понцій Пілат быў намеснікам Іудзеі, а чацвёртаўладальнікам Галілеі быў Ірад, Філіп жа, яго брат, быў чацвёртаўладальнікам Ітурэі і Траханіцкай зямлі, а Лісаній чацвёртаўладальнікам Авіліны,

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

пры першасвятары Ганну і Каіяфе, было слова Божае да Іаана, сына Захарыевана, у пустэльні.

 

пры архірэях Ганьне і Каяхве было Слова Божае да Яана, Захаравага сына, у пустэльні.

І ён прайшоў усё наваколле Іардана, абвяшчаючы хрышчэнне пакаяння дзеля адпушчэння грахоў,

 

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

як напісана ў кнізе слоў прарока Ісаіі: «Голас прапаведніка ў пустэльні: «Падрыхтуйце дарогу Госпаду, простымі зрабіце Яму сцежкі;

 

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

кожны дол няхай напоўніцца, а кожная гара і пагорак няхай панізяцца, і крывое няхай выпрастаецца, і выбоістыя дарогі стануць гладкімі;

 

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

і ўбачыць кожнае стварэнне выратаванне Божае».

 

і ўбачыць кожнае цела збаўленьне Божае.

Дык ён казаў натоўпам, што выходзілі, каб хрысціцца ў яго: Гадзючыя выпадкі, хто паказаў вам уцякаць ад будучага гневу?

 

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

Дык стварыце годныя плады пакаяння і не пачынайце казаць самім сабе: «Бацька ў нас Аўраам». Бо кажу вам, што Бог можа з гэтых камянёў узняць дзяцей Аўрааму.

 

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

Ужо ж і сякера ляжыць пры корані дрэў; дык кожнае дрэва, што добрага плоду не родзіць, ссякаюць і кідаюць у агонь.

 

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

І натоўпы пыталіся ў яго, кажучы: Дык што нам рабіць?

 

І пыталіся ў яго людзі, кажучы: што ж (нам) рабіць?

Ён жа ў адказ ім казаў: Хто мае два хітоны, няхай дасць таму, хто не мае, і хто мае ежу, няхай гэтак жа зробіць.

 

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

Прыйшлі ж і зборшчыкі падаткаў хрысціцца і сказалі яму: Настаўніку, што нам рабіць?

 

Прыйшлі ж і мытнікі ахрысьціцца і сказалі яму: настаўнік! што на́м рабіць?

І ён ім сказаў: Не спаганяйце нічога больш, чым вызначана вам.

 

Ён жа адказаў ім: нічога большага за загаданае вам ня спаганяйце.

Пыталіся ж у яго і воіны, кажучы: А нам што рабіць? — І сказаў ім: Ні ў кога нічога не вымагайце, не даносьце і задавальняйцеся сваёю платаю.

 

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

Калі ж народ чакаў і ўсе разважалі ў сваіх сэрцах пра Іаана, ці не Хрыстос ён,

 

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

Іаан адказаў, кажучы ўсім: Я вадою хрышчу вас; а ідзе Мацнейшы за мяне, у Якога я няварты развязаць раменьчык Яго сандаляў; Ён вас будзе хрысціць Святым Духам і агнём;

 

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

у Яго руцэ веялка, каб ачысціць Свой умалот і сабраць пшаніцу ў Сваё сховішча, а мякіну спаліць незгасальным агнём.

 

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

Дык, і шмат у чым іншым настаўляючы, ён дабравесціў народу.

 

І вось, і многае другое, навучаючы, дабравесьціў (ён) народу.

А Ірад, чацвёртаўладнік, выкрываны ім за Ірадыяду, жонку свайго брата, і за ўсё ліхое, што Ірад зрабіў,

 

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

дадаў да ўсяго і тое, што зняволіў Іаана ў турму.

 

дадаў да ўсяго і тое, што пасадзіў Яана ў вязьніцу.

І сталася: калі хрысціўся ўвесь народ і Ісус, ахрысціўшыся, маліўся, расчынілася неба,

 

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

і зышоў Святы Дух у цялесным выглядзе, як голуб на Яго, і голас з неба пачуўся: Ты Мой Сын Улюбёны, у Табе знайшоў Я задавальненне.

 

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

А Сам Ісус, пачынаючы Сваё служэнне, меў гадоў каля трыццаці, быў, як думалі, Сын Іосіфаў, Іліеў,

 

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

Матфатаў, Лявіеў, Мялхіеў, Іяннаеў, Іосіфаў,

 

Маттатаў, Ле́віяў, Ме́льхіяў, Яанаў, Язэпаў,

Матафіеў, Амосаў, Навумаў, Гесліеў, Нагееў,

 

Маттаціяў, Амо́саў, Навумаў, Ясьлімаў, Нагеяў,

Маафаў, Матафіеў, Семяінаў, Іасіхаў, Іадаеў,

 

Маатаў, Маттаціяў, Самеяў, Язэпаў, Юдаў,

Іаананаў, Рысаеў, Дзарававелеў, Салафіілеў, Нірыеў,

 

Яананаў, Рысаяў, Зараба́бэляў, Салятыілаў, Нірыяў,

Мялхіеў, Аддзеў, Касамаў, Элмадамаў, Іраў,

 

Мэльхіяў, Адзіяў, Касамаў, Ялмадамаў, Іраў,

Ісусаў, Эліедзераў, Іарымаў, Матфатаў, Лявіеў,

 

Ясіяў, Яліязэраў, Іярымаў, Маттатаў, Ле́віяў,

Сімяонаў, Іудаў, Іосіфаў, Іананаў, Эліякімаў,

 

Сымонаў, Юдаў, Язэпаў, Яананаў, Яліякімаў,

Меляаеў, Мяннаеў, Матафаеў, Нафанаў, Давідаў,

 

Мэлеаяў, Маінанаў, Маттатаяў, Натанаў, Давідаў,

Іессееў, Авідаў, Ваозаў, Салаў, Наасонаў,

 

Ясеяў, Абідаў, Баозаў, Салмонаў, Наасонаў,

Амінадаваў, Адмінаў, Арніеў, Гесромаў, Фарэсаў, Іудаў,

 

Амінадабаў, Арамаў, Ясромаў, Хварэсаў, Юдаў,

Іякаваў, Ісаакаў, Аўраамаў, Фараў, Нахораў,

 

Якубаў, Ісагакаў, Абрагамаў, Тараў, Нахораў,

Сярухаў, Рагаваў, Фалекаў, Эвераў, Салаў,

 

Сэрухаў, Рагабаў, Хвалекаў, Ябераў, Салаў,

Каінамаў, Арфаксадаў, Сімаў, Ноеў, Ламехаў,

 

Каінанаў, Архваксадаў, Сэмаў, Нояў, Ламехаў,

Мафусалаў, Энохаў, Іярэтаў, Малеляілаў, Каінамаў,

 

Матусалаў, Янохаў, Ярэдаў, Малеляіляў, Каінанаў,

Эносаў, Сіфаў, Адамаў, Божы.

 

Яносаў, Сэтаў, Адамаў, Божы.