Лукаша 3 разьдзел

 

 

А ў пятнаццаты год кіравання кесара Тыберыя, калі Понцій Пілат быў намеснікам Іудзеі, а чацвёртаўладальнікам Галілеі быў Ірад, Філіп жа, яго брат, быў чацвёртаўладальнікам Ітурэі і Траханіцкай зямлі, а Лісаній чацвёртаўладальнікам Авіліны,

 

У пятнаццаты год панавання цэзара Тыберыя, калі Понцій Пілат быў намеснікам Юдэі, а Ірад быў тэтрархам Галілеі, Філіп, брат ягоны, тэтрархам Ітурэі і Траханіцкай зямлі, а Лізанія тэтрархам Абілены,

пры першасвятары Ганну і Каіяфе, было слова Божае да Іаана, сына Захарыевана, у пустэльні.

 

пры першасвятарах Анне і Каяфе, было скіравана слова Божае да Яна, сына Захарыі, у пустыні.

І ён прайшоў усё наваколле Іардана, абвяшчаючы хрышчэнне пакаяння дзеля адпушчэння грахоў,

 

Ён прайшоў усе ваколіцы Ярдана, абвяшчаючы хрост пакаяння дзеля адпушчэння грахоў,

як напісана ў кнізе слоў прарока Ісаіі: «Голас прапаведніка ў пустэльні: «Падрыхтуйце дарогу Госпаду, простымі зрабіце Яму сцежкі;

 

як напісана ў кнізе слоў прарока Ісаі: «Голас таго, хто кліча ў пустыні:“Падрыхтуйце дарогу Пану,простымі рабіце сцежкі Яму!

кожны дол няхай напоўніцца, а кожная гара і пагорак няхай панізяцца, і крывое няхай выпрастаецца, і выбоістыя дарогі стануць гладкімі;

 

Кожная даліна ўзвысіцца,кожная гара і пагорак панізяцца,і выбоістыя дарогі стануць раўнінай,а ланцугі гор — далінаю.

і ўбачыць кожнае стварэнне выратаванне Божае».

 

І ўбачыць кожнае целаБожае збаўленне”».

Дык ён казаў натоўпам, што выходзілі, каб хрысціцца ў яго: Гадзючыя выпадкі, хто паказаў вам уцякаць ад будучага гневу?

 

Ён казаў натоўпам, якія прыходзілі да яго хрысціцца: «Племя змяінае, хто навучыў вас уцякаць ад будучага гневу?

Дык стварыце годныя плады пакаяння і не пачынайце казаць самім сабе: «Бацька ў нас Аўраам». Бо кажу вам, што Бог можа з гэтых камянёў узняць дзяцей Аўрааму.

 

Прынясіце ж годны плён пакаяння і не думайце казаць сабе: “Маем Абрагама за бацьку”; бо кажу вам, што Бог можа з камянёў гэтых абудзіць дзяцей Абрагаму.

Ужо ж і сякера ляжыць пры корані дрэў; дык кожнае дрэва, што добрага плоду не родзіць, ссякаюць і кідаюць у агонь.

 

Ужо і сякера прыкладзена да карэння дрэў. Таму кожнае дрэва, якое не дае добрага плоду, будзе ссечана і кінута ў агонь».

І натоўпы пыталіся ў яго, кажучы: Дык што нам рабіць?

 

І пыталіся ў яго людзі, кажучы: «Што мы павінны рабіць?»

Ён жа ў адказ ім казаў: Хто мае два хітоны, няхай дасць таму, хто не мае, і хто мае ежу, няхай гэтак жа зробіць.

 

Ён казаў ім у адказ: «Хто мае дзве вопраткі, няхай аддасць таму, хто не мае, і хто мае ежу, няхай зробіць тое самае».

Прыйшлі ж і зборшчыкі падаткаў хрысціцца і сказалі яму: Настаўніку, што нам рабіць?

 

Прыйшлі і мытнікі хрысціцца і сказалі яму: «Настаўнік, што мы павінны рабіць?»

І ён ім сказаў: Не спаганяйце нічога больш, чым вызначана вам.

 

Ён адказаў ім: «Нічога больш за вызначанае вам не спаганяйце».

Пыталіся ж у яго і воіны, кажучы: А нам што рабіць? — І сказаў ім: Ні ў кога нічога не вымагайце, не даносьце і задавальняйцеся сваёю платаю.

 

Пыталіся ў яго таксама і жаўнеры, кажучы: «А мы што павінны рабіць?» Ён адказаў ім: «Нікога не крыўдзіце, не абвінавачвайце несправядліва і задавольвайцеся сваёй платай».

Калі ж народ чакаў і ўсе разважалі ў сваіх сэрцах пра Іаана, ці не Хрыстос ён,

 

Калі народ чакаў і калі ўсе разважалі ў сэрцах сваіх пра Яна, ці не Месія ён,

Іаан адказаў, кажучы ўсім: Я вадою хрышчу вас; а ідзе Мацнейшы за мяне, у Якога я няварты развязаць раменьчык Яго сандаляў; Ён вас будзе хрысціць Святым Духам і агнём;

 

Ян адказаў усім: «Я вадою хрышчу вас, але ідзе мацнейшы за мяне, якому я няварты развязаць раменьчык на Яго сандалях. Ён вас будзе хрысціць Духам Святым і агнём.

у Яго руцэ веялка, каб ачысціць Свой умалот і сабраць пшаніцу ў Сваё сховішча, а мякіну спаліць незгасальным агнём.

 

Лапату трымае ў руцэ сваёй, каб ачысціць гумно сваё і сабраць пшаніцу ў засекі свае, а мякіну спаліць агнём непагасным».

Дык, і шмат у чым іншым настаўляючы, ён дабравесціў народу.

 

Шмат чаго іншага прапаведаваў ён, абвяшчаючы Добрую Навіну народу.

А Ірад, чацвёртаўладнік, выкрываны ім за Ірадыяду, жонку свайго брата, і за ўсё ліхое, што Ірад зрабіў,

 

А тэтрарх Ірад, якога Ян дакараў за Ірадыяду, жонку яго брата Філіпа, і за ўсё зло, якое ўчыніў Ірад,

дадаў да ўсяго і тое, што зняволіў Іаана ў турму.

 

да ўсяго дадаў яшчэ і тое, што замкнуў Яна ў вязніцы.

І сталася: калі хрысціўся ўвесь народ і Ісус, ахрысціўшыся, маліўся, расчынілася неба,

 

Калі хрысціўся ўвесь народ і калі Езус, прыняўшы хрост, маліўся, раскрылася неба,

і зышоў Святы Дух у цялесным выглядзе, як голуб на Яго, і голас з неба пачуўся: Ты Мой Сын Улюбёны, у Табе знайшоў Я задавальненне.

 

і Дух Святы ў цялесным выглядзе, як голуб, сышоў на Яго, і быў голас з неба: «Ты Сын Мой умілаваны, Цябе ўпадабаў Я».

А Сам Ісус, пачынаючы Сваё служэнне, меў гадоў каля трыццаці, быў, як думалі, Сын Іосіфаў, Іліеў,

 

Езус, пачынаючы служэнне сваё, меў каля трыццаці гадоў і быў, як лічылі, сынам Юзафа, сына Элія,

Матфатаў, Лявіеў, Мялхіеў, Іяннаеў, Іосіфаў,

 

Матата, Левія, Мэльхія, Яная, Юзафа,

Матафіеў, Амосаў, Навумаў, Гесліеў, Нагееў,

 

Матація, Амоса, Навума, Эслія, Нагея,

Маафаў, Матафіеў, Семяінаў, Іасіхаў, Іадаеў,

 

Маата, Матація, Сэмэя, Ёсэха, Ёды,

Іаананаў, Рысаеў, Дзарававелеў, Салафіілеў, Нірыеў,

 

Янана, Рэсы, Зарабабэля, Салятыэля, Нэрыя,

Мялхіеў, Аддзеў, Касамаў, Элмадамаў, Іраў,

 

Мэльхія, Адзія, Касама, Эльмадама, Эра,

Ісусаў, Эліедзераў, Іарымаў, Матфатаў, Лявіеў,

 

Езуса, Эліязэра, Ярыма, Матата, Левія,

Сімяонаў, Іудаў, Іосіфаў, Іананаў, Эліякімаў,

 

Сімяона, Юды, Юзафа, Ёнама, Эліяхіма,

Меляаеў, Мяннаеў, Матафаеў, Нафанаў, Давідаў,

 

Мэлея, Мэны, Матата, Натана, Давіда,

Іессееў, Авідаў, Ваозаў, Салаў, Наасонаў,

 

Есэя, Абэда, Бааза, Сальмона, Наасона,

Амінадаваў, Адмінаў, Арніеў, Гесромаў, Фарэсаў, Іудаў,

 

Амінадаба, Адміна, Арні, Эзрома, Фарэса, Юды,

Іякаваў, Ісаакаў, Аўраамаў, Фараў, Нахораў,

 

Якуба, Ісаака, Абрагама, Тарэя, Нахора,

Сярухаў, Рагаваў, Фалекаў, Эвераў, Салаў,

 

Сэруха, Рахаба, Фалека, Эбэра, Салія,

Каінамаў, Арфаксадаў, Сімаў, Ноеў, Ламехаў,

 

Каінама, Арфаксада, Сэма, Ноя, Ламеха,

Мафусалаў, Энохаў, Іярэтаў, Малеляілаў, Каінамаў,

 

Матусала, Эноха, Ярэда, Малелеэля, Каінама,

Эносаў, Сіфаў, Адамаў, Божы.

 

Эноса, Сэта, Адама, сына Бога.