Лукаша 3 разьдзел

 

 

А ў пятнаццаты год кіравання кесара Тыберыя, калі Понцій Пілат быў намеснікам Іудзеі, а чацвёртаўладальнікам Галілеі быў Ірад, Філіп жа, яго брат, быў чацвёртаўладальнікам Ітурэі і Траханіцкай зямлі, а Лісаній чацвёртаўладальнікам Авіліны,

 

А ў пятнаццаты год панаваньня цэзара Тыбэрыя, калі Понці Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і Траханіцкай краіне, а Лісані — тэтрархам у Абіліне,

пры першасвятары Ганну і Каіяфе, было слова Божае да Іаана, сына Захарыевана, у пустэльні.

 

пры першасьвятарах Аньне і Каяфе было слова Божае да Яна, сына Захарыі, у пустыні.

І ён прайшоў усё наваколле Іардана, абвяшчаючы хрышчэнне пакаяння дзеля адпушчэння грахоў,

 

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

як напісана ў кнізе слоў прарока Ісаіі: «Голас прапаведніка ў пустэльні: «Падрыхтуйце дарогу Госпаду, простымі зрабіце Яму сцежкі;

 

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

кожны дол няхай напоўніцца, а кожная гара і пагорак няхай панізяцца, і крывое няхай выпрастаецца, і выбоістыя дарогі стануць гладкімі;

 

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

і ўбачыць кожнае стварэнне выратаванне Божае».

 

і ўгледзіць усякае цела збаўленьне Божае”».

Дык ён казаў натоўпам, што выходзілі, каб хрысціцца ў яго: Гадзючыя выпадкі, хто паказаў вам уцякаць ад будучага гневу?

 

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

Дык стварыце годныя плады пакаяння і не пачынайце казаць самім сабе: «Бацька ў нас Аўраам». Бо кажу вам, што Бог можа з гэтых камянёў узняць дзяцей Аўрааму.

 

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

Ужо ж і сякера ляжыць пры корані дрэў; дык кожнае дрэва, што добрага плоду не родзіць, ссякаюць і кідаюць у агонь.

 

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

І натоўпы пыталіся ў яго, кажучы: Дык што нам рабіць?

 

І спытаўся ў яго натоўп, кажучы: «Дык што нам рабіць?»

Ён жа ў адказ ім казаў: Хто мае два хітоны, няхай дасць таму, хто не мае, і хто мае ежу, няхай гэтак жа зробіць.

 

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

Прыйшлі ж і зборшчыкі падаткаў хрысціцца і сказалі яму: Настаўніку, што нам рабіць?

 

Прыйшлі і мытнікі хрысьціцца, і сказалі яму: «Настаўнік, што нам рабіць?»

І ён ім сказаў: Не спаганяйце нічога больш, чым вызначана вам.

 

А ён сказаў ім: «Нічога не бярыце больш таго, што вам загадана».

Пыталіся ж у яго і воіны, кажучы: А нам што рабіць? — І сказаў ім: Ні ў кога нічога не вымагайце, не даносьце і задавальняйцеся сваёю платаю.

 

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абмаўляйце і задавальняйцеся сваёю платай».

Калі ж народ чакаў і ўсе разважалі ў сваіх сэрцах пра Іаана, ці не Хрыстос ён,

 

І народу, які чакаў і разважаў у сэрцах сваіх адносна Яна, ці не Хрыстос ён,

Іаан адказаў, кажучы ўсім: Я вадою хрышчу вас; а ідзе Мацнейшы за мяне, у Якога я няварты развязаць раменьчык Яго сандаляў; Ён вас будзе хрысціць Святым Духам і агнём;

 

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

у Яго руцэ веялка, каб ачысціць Свой умалот і сабраць пшаніцу ў Сваё сховішча, а мякіну спаліць незгасальным агнём.

 

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

Дык, і шмат у чым іншым настаўляючы, ён дабравесціў народу.

 

І шмат іншага дабравесьціў ён народу, навучаючы яго.

А Ірад, чацвёртаўладнік, выкрываны ім за Ірадыяду, жонку свайго брата, і за ўсё ліхое, што Ірад зрабіў,

 

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

дадаў да ўсяго і тое, што зняволіў Іаана ў турму.

 

дадаў да ўсяго і тое, што замкнуў Яна ў вязьніцу.

І сталася: калі хрысціўся ўвесь народ і Ісус, ахрысціўшыся, маліўся, расчынілася неба,

 

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

і зышоў Святы Дух у цялесным выглядзе, як голуб на Яго, і голас з неба пачуўся: Ты Мой Сын Улюбёны, у Табе знайшоў Я задавальненне.

 

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

А Сам Ісус, пачынаючы Сваё служэнне, меў гадоў каля трыццаці, быў, як думалі, Сын Іосіфаў, Іліеў,

 

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

Матфатаў, Лявіеў, Мялхіеў, Іяннаеў, Іосіфаў,

 

Мататаў, Левіяў, Мэльхіяў, Янаяў, Язэпаў,

Матафіеў, Амосаў, Навумаў, Гесліеў, Нагееў,

 

Мататыяў, Амосаў, Навумаў, Эсьліяў, Нагеяў,

Маафаў, Матафіеў, Семяінаў, Іасіхаў, Іадаеў,

 

Магатаў, Мататыяў, Сэмэяў, Язэпаў, Юдаў,

Іаананаў, Рысаеў, Дзарававелеў, Салафіілеў, Нірыеў,

 

Яанаяў, Рэсаеў, Зэрубабэляў, Салятыэляў, Нэрыяў,

Мялхіеў, Аддзеў, Касамаў, Элмадамаў, Іраў,

 

Мэльхіяў, Аддыяў, Касамаў, Эльмадамаў, Іраў,

Ісусаў, Эліедзераў, Іарымаў, Матфатаў, Лявіеў,

 

Ёсіяў, Эліезэраў, Ярымаў, Мататаў, Левіяў,

Сімяонаў, Іудаў, Іосіфаў, Іананаў, Эліякімаў,

 

Сымонаў, Юдаў, Язэпаў, Янанаў, Эліякімаў,

Меляаеў, Мяннаеў, Матафаеў, Нафанаў, Давідаў,

 

Мэлеаяў, Маінанаў, Мататаў, Натанаў, Давідаў,

Іессееў, Авідаў, Ваозаў, Салаў, Наасонаў,

 

Есэяў, Абэдаў, Боазаў, Сальмонаў, Наасонаў,

Амінадаваў, Адмінаў, Арніеў, Гесромаў, Фарэсаў, Іудаў,

 

Амінадабаў, Арамаў, Эсромаў, Пэрэсаў, Юдаў,

Іякаваў, Ісаакаў, Аўраамаў, Фараў, Нахораў,

 

Якубаў, Ісаакаў, Абрагамаў, Тэрахаў, Нахораў,

Сярухаў, Рагаваў, Фалекаў, Эвераў, Салаў,

 

Сэрухаў, Рагаваў, Фалекаў, Гэбэраў, Салаў,

Каінамаў, Арфаксадаў, Сімаў, Ноеў, Ламехаў,

 

Каінанаў, Арфаксадаў, Сэмаў, Нояў, Лямэхаў,

Мафусалаў, Энохаў, Іярэтаў, Малеляілаў, Каінамаў,

 

Мэтушаляхаў, Энохаў, Ярэдаў, Магалялеэляў, Кейнанаў,

Эносаў, Сіфаў, Адамаў, Божы.

 

Эносаў, Сэтаў, Адамаў, Божы.