Лукаша 3 разьдзел

 

 

Пятнанцатага году дзяржавы цэсара Тыбэра, як Понт Пілат быў намесьнікам Юдэі, Гірад быў чацьвертнікам у Ґалілеі, а Піліп, брат ягоны, чацьвертнікам Ітурэі а Трахоніцкае краіны, а Лізан чацьвертнікам Абіленеі,

 

А ў пятнаццаты год панаваньня цэзара Тыбэрыя, калі Понці Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і Траханіцкай краіне, а Лісані — тэтрархам у Абіліне,

За найвышшых сьвятароў Ганны а Каяпы, было слова Божае да Яана Захаронка на пустыні.

 

пры першасьвятарах Аньне і Каяфе было слова Божае да Яна, сына Захарыі, у пустыні.

І ён праходзіў па ўсёй краіне ля Ёрдану, абяшчаючы хрэст каяты дзеля дараваньня грахоў,

 

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

Як напісана ў кнізе словаў Ісаі прарокі, кажучы: «Голас гукаючага на пустыні: гатуйце дарогу Спадарову, прастайце сьцелжі Ягоныя;

 

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

Кажная даліна напоўніцца, і кажная гара а ўзгорак паніжыцца, і скрыўленыя выпрастаюцца, і драгкія дарогі стануць гладкімі;

 

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

І кажнае цела абача спасеньне Божае».

 

і ўгледзіць усякае цела збаўленьне Божае”».

Тады сказаў ён гурбе, што прыходзіла хрысьціцца ў яго: «Родзе яшчарыны! хто перасьцярог вас уцякаць ад надыходзячага гневу?

 

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

Дык радзіце плады гожыя каяты. І не пачынайце гукаць сабе: "Айцец у нас Абрагам"; бо кажу вам, што Бог можа з камянёў гэтых узьняць дзеці Абрагаму.

 

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

Ужо й сякіра да караня дзерваў прыложана; дык кажнае дзерва, што ня родзе добрага плоду, сякуць а кідаюць у цяпло».

 

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

І пыталіся ў яго гурбы, кажучы: «Дык што маем рабіць?»

 

І спытаўся ў яго натоўп, кажучы: «Дык што нам рабіць?»

Ён, адказуючы, сказаў ім: «Хто мае дзьве адзежы, дай нямаючаму; і хто мае ежу, рабі тое самае».

 

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

Тады прышлі таксама мытнікі хрысьціцца і сказалі яму: «Вучыцелю, што мы маем рабіць?»

 

Прыйшлі і мытнікі хрысьціцца, і сказалі яму: «Настаўнік, што нам рабіць?»

І сказаў ім: «Нічога не вымагайце балей за прызначанае вам».

 

А ён сказаў ім: «Нічога не бярыце больш таго, што вам загадана».

І пыталіся ў яго таксама жаўнеры, кажучы: «А мы што маем рабіць?» І ён адказаў ім: «Не рабіце ўсілства нікому ані вінуйце хвальшыва, і будзьце здаволіўшыся з платы свае».

 

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абмаўляйце і задавальняйцеся сваёю платай».

І як люд спадзяваўся, і думалі ўсі ў сэрцах сваіх празь Яана, ці ня быў можа ён Хрыстос,

 

І народу, які чакаў і разважаў у сэрцах сваіх адносна Яна, ці не Хрыстос ён,

Яан адказаў, кажучы ўсім: «Я запраўды хрышчу вас вадою, але йдзець дужшы за мяне, у Каторага я ня гожы разьвязаць рэменьчыка ў вобую Ягоным; Ён будзе хрысьціць вас Духам Сьвятым а агнём.

 

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

Веялка Ягоная ў руццэ Ягонай, і Ён ачысьце такаўню Сваю, і пшонку зьбярэць у сьвіран, а ўмецьце спале агнём няўгасным».

 

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

І шмат чаго іншага напамінаючы, даваў дабравесьць люду.

 

І шмат іншага дабравесьціў ён народу, навучаючы яго.

Гірад жа чацьвертнік, ганены ім за Гіродзяду, жонку брата свайго Піліпа, і за ўсе ліха, што Гірад зрабіў,

 

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

Дадаў яшчэ да ўсяго тое, што пасадзіў Яана ў вязьніцу.

 

дадаў да ўсяго і тое, што замкнуў Яна ў вязьніцу.

І сталася, як хрысьціўся ўвесь люд, і Ісус, ахрысьціўшыся, маліўся, нябёсы рашчыніліся,

 

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

І ісступіў Дух Сьвяты на Яго ў цялесным выглядзе, як галуба, і прышоў голас ізь неба, кажучы: «Ты Сын Мой любовы; Цябе Я ўпадабаў!»

 

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

А Самому Ісусу, як пачынаў, было год трыццаць веку, будучы, як думалі, сынам Язэпа Гілянка,

 

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

Матфацёнка, Левянка, Мельшанка, Янянка, Язэпенка,

 

Мататаў, Левіяў, Мэльхіяў, Янаяў, Язэпаў,

Маттафёнка, Амасёнка, Нагумёнка, Есьлянка, Наґґаёнка,

 

Мататыяў, Амосаў, Навумаў, Эсьліяў, Нагеяў,

Маафёнка, Матгафёнка, Сэмеёнка, Язэпенка, Юдзянка,

 

Магатаў, Мататыяў, Сэмэяў, Язэпаў, Юдаў,

Яанёнка, Рысаёнка, Зэрувавеленка, Шэалфіеленка, Ніранка,

 

Яанаяў, Рэсаеў, Зэрубабэляў, Салятыэляў, Нэрыяў,

Мельшанка, Адзьдзянка, Косамёнка, Елмодамёнка, Іранка,

 

Мэльхіяў, Аддыяў, Касамаў, Эльмадамаў, Іраў,

Ёсянка, Елезэранка, Ёрыменка, Матфацёнка, Левянка,

 

Ёсіяў, Эліезэраў, Ярымаў, Мататаў, Левіяў,

Сыманёнка, Юдзянка, Язэпенка, Ёнанёнка, Елякімёнка,

 

Сымонаў, Юдаў, Язэпаў, Янанаў, Эліякімаў,

Малеаёнка, Менанёнка, Маттафёнка, Нафанёнка, Давідзёнка,

 

Мэлеаяў, Маінанаў, Мататаў, Натанаў, Давідаў,

Есянка, Овідзёнка, Воозёнка, Салмонёнка, Наасонёнка,

 

Есэяў, Абэдаў, Боазаў, Сальмонаў, Наасонаў,

Амінадавенка, Арамёнка, Есромёнка, Фарэсёнка, Юдзянка,

 

Амінадабаў, Арамаў, Эсромаў, Пэрэсаў, Юдаў,

Якавёнка, Ісачонка, Абрагаменка, Фаранка, Нахаронка,

 

Якубаў, Ісаакаў, Абрагамаў, Тэрахаў, Нахораў,

Сэрушонка, Раґавёнка, Фалечонка, Еверонка, Салянка,

 

Сэрухаў, Рагаваў, Фалекаў, Гэбэраў, Салаў,

Каінанёнка, Арфаксадзенка, Сэмянка, Ноянка, Ламёшанка,

 

Каінанаў, Арфаксадаў, Сэмаў, Нояў, Лямэхаў,

Мефусаленка, Енашонка, Ярэдзёнка, Малелееленка, Каінанёнка,

 

Мэтушаляхаў, Энохаў, Ярэдаў, Магалялеэляў, Кейнанаў,

Еносёнка, Сыфянка, Адамёнка, каторы быў Божы.

 

Эносаў, Сэтаў, Адамаў, Божы.