Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

А ў пятнаццаты год панаваньня цэзара Тыбэрыя, калі Понці Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і Траханіцкай краіне, а Лісані — тэтрархам у Абіліне,

пры першасьвятарах Ганьне і Каяфе, быў голас Божы да Яна, сына Захара, у пустыні.

 

пры першасьвятарах Аньне і Каяфе было слова Божае да Яна, сына Захарыі, у пустыні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

і ўбачыць кожная плоць ратунак Божы».

 

і ўгледзіць усякае цела збаўленьне Божае”».

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

І пыталіся ў яго людзі: што ж нам рабіць?

 

І спытаўся ў яго натоўп, кажучы: «Дык што нам рабіць?»

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыйшлі і мытнікі хрысьціцца, і сказалі яму: «Настаўнік, што нам рабіць?»

Ён адказваў ім: нічога не патрабуйце больш вызначанага вам.

 

А ён сказаў ім: «Нічога не бярыце больш таго, што вам загадана».

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абмаўляйце і задавальняйцеся сваёю платай».

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

І народу, які чакаў і разважаў у сэрцах сваіх адносна Яна, ці не Хрыстос ён,

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

Шмат чаго іншага зьвеставаў ён народу, павучаючы яго.

 

І шмат іншага дабравесьціў ён народу, навучаючы яго.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

дадаў да ўсяго іншага і тое, што ўвязьніў Яна ў цямніцу.

 

дадаў да ўсяго і тое, што замкнуў Яна ў вязьніцу.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

Мататаў, Левіінаў, Мэлхіеў, Янаеў, Язэпаў,

 

Мататаў, Левіяў, Мэльхіяў, Янаяў, Язэпаў,

Мататыеў, Амосаў, Навумаў, Ясьлімаў, Нагееў.

 

Мататыяў, Амосаў, Навумаў, Эсьліяў, Нагеяў,

Маатаў, Мататыеў, Сэмяіеў, Язэпаў, Юдаў,

 

Магатаў, Мататыяў, Сэмэяў, Язэпаў, Юдаў,

Ёананаў, Рысаеў, Зарававэлеў, Салатыілеў, Нірыеў,

 

Яанаяў, Рэсаеў, Зэрубабэляў, Салятыэляў, Нэрыяў,

Мэлхіеў, Аддзіеў, Касамаў, Элмадамаў, Іраў,

 

Мэльхіяў, Аддыяў, Касамаў, Эльмадамаў, Іраў,

Ёсіеў, Эліезэраў, Ёрымаў, Мататаў, Левіінаў,

 

Ёсіяў, Эліезэраў, Ярымаў, Мататаў, Левіяў,

Сымонаў, Юдаў, Язэпаў, Ёнанаў, Іліякімаў,

 

Сымонаў, Юдаў, Язэпаў, Янанаў, Эліякімаў,

Мэлеаеў, Маінанаў, Мататаеў, Натанаў, Давідаў,

 

Мэлеаяў, Маінанаў, Мататаў, Натанаў, Давідаў,

Ясэеў, Авідаў, Ваозаў, Салмонаў, Наасонаў,

 

Есэяў, Абэдаў, Боазаў, Сальмонаў, Наасонаў,

Амінадаваў, Арамаў, Ісромаў, Фарэсаў, Юдаў,

 

Амінадабаў, Арамаў, Эсромаў, Пэрэсаў, Юдаў,

Якаваў, Ісакаў, Абрагамаў, Тараў, Нахораў,

 

Якубаў, Ісаакаў, Абрагамаў, Тэрахаў, Нахораў,

Сэрухаў, Рагаваў, Фалекаў, Івераў, Салаў,

 

Сэрухаў, Рагаваў, Фалекаў, Гэбэраў, Салаў,

Каінанаў, Арфаксадаў, Сімаў, Ноеў, Ламэхаў,

 

Каінанаў, Арфаксадаў, Сэмаў, Нояў, Лямэхаў,

Матусалаў, Інохаў, Ярэдаў, Малелеілаў, Каінанаў,

 

Мэтушаляхаў, Энохаў, Ярэдаў, Магалялеэляў, Кейнанаў,

Іносаў, Сітаў, Адамаў, Божы.

 

Эносаў, Сэтаў, Адамаў, Божы.