Да Рымлянаў 12 разьдзел

 

 

Дык вось вельмі прашу вас, браты, міласэрнасьцю Бога аддаць целы вашыя ў ахвяру жывую, сьвятую, прыемную Богу на разумнае служэньне вашае,

 

Прашу вас, браты, праз літасць Божую: аддайце целы вашыя на ахвяру жывую, святую, прыемную Богу як выраз вашага разумнага служэння.

і ня прыстасоўвайцеся да веку гэтага, але будзьце пераабражаемы абнаўленьнем розуму вашага, каб пазнаваць вам, якая (ёсьць) воля Бога — добрая і заўгодная, і дасканалая.

 

І не дастасоўвайцеся да гэтага веку, але перамяняйцеся праз абнаўленне розуму, каб вы пазналі, якая воля Божая, што добрае, прыемнае і дасканалае.

Бо кажу паводля Багадаці, якая дана мне, кожнаму хто знаходзіцца сярод вас: ня думаць (аб сабе) больш, чым належыць думаць, але думаць так, каб кожнаму быць разумным па меры веры, якой (кожнага) надзяліў Бог.

 

Дзякуючы дадзенай мне ласцы, я кажу кожнаму, хто ёсць сярод вас, каб не думалі пра сябе лепш, чым трэба думаць, але ацэньвалі сябе цвяроза, паводле веры, удзеленай кожнаму Богам.

Бо як у адным целе маем шмат чэлясаў, але ня ўсе чэлясы маюць адну і тую ж работу,

 

Бо як у адным целе маем шмат членаў, і не ўсе яны выконваюць тыя самыя функцыі,

такім чынам мы многія зьяўляемся ў Хрысьце адным целам, а паасобку адзін для другога (мы ёсьць) чэлясы.

 

так і мы, многія, складаем адно цела ў Хрысце, а паасобку адзін для аднаго — члены.

Але маючы па Багадаці данай нам розныя дары, (то) калі (маеш дар) прароцтва, то (прароч) адпаведна веры;

 

Паводле дадзенай ласкі мы маем розныя дары. Калі дар прароцтва, павінны прарочыць згодна з вераю.

калі (маеш дар) служэньня, — то (будзь) у служэньні; калі (маеш дар) вучыцеля, — то вучы;

 

Калі служэнне — служыць; калі настаўніцтва — навучаць;

калі (маеш дар) суцяшэньня, — то суцяшай; калі (маеш дар) падзяліцца, — то (падзяліся) у шчырасьці; калі (маеш дар) начальніка, — то (начальствуй) з клопатам; калі (маеш дар) дабрачыннасьці, — то (дабрачынствуй) з радасьцю.

 

калі заахвочванне — заахвочваць; калі размеркаванне — раздаваць у прастаце; калі кіраванне — кіраваць старанна; калі міласэрнасць, то павінны чыніць гэта з радасцю.

Любоў (паміж вамі хай будзе) няпрытворная; нянавідзьце зло, прыляпляйцеся да дабра;

 

Любоў няхай будзе некрывадушнай. Майце агіду да зла, гарніцеся да дабра;

(будзьце) у любові адзін да воднага з пяшчотаю, апераджаючы адзін аднаго ў шанаваньні;

 

любіце адзін аднаго братняю любоўю, апярэджвайце адзін аднаго ў ветлівасці,

у руплівасьці ня аслабявайце, духам палаючы, чынячы служэньне да канца часоў;

 

у руплівасці будзьце нястомныя, духам палымнейце, служыце Пану.

радуйцеся праз надзею, (усякую) пакуту пераносьце зь цярпеньнем, у малітве будзьце заўсёды;

 

Цешцеся надзеяй, ва ўціску будзьце цярплівыя, у малітве — трывалыя;

бярэце ўдзел у патрэбах сьвятых, пра гасьціннасьць дбайце.

 

падтрымлівайце святых; дбайце пра гасціннасць.

Багаслаўляйце тых, хто гоніць вас, багаслаўляйце, а ня кляніце,

 

Благаслаўляйце тых, хто пераследуе вас, благаслаўляйце, а не праклінайце!

радуйцеся з тымі, хто радуецца, і плачце з тымі, хто плача,

 

Радуйцеся з тымі, хто радуецца, плачце з тымі, хто плача.

будзьце між сабою аднадумнымі, ня думайце аб сабе высакамерна, але ідзіце ўсьлед за сьціплымі, ня лічыце сябе мудрэйшымі за другіх.

 

Будзьце аднамысныя паміж сабою; не мудруйце празмерна, але наследуйце пакорных. Не лічыце сябе мудрымі.

Нікому ня аддавайце злом за зло, але старайцеся аб добрым перад абліччам усіх людзей.

 

Нікому не адплачвайце злом за зло, але дбайце аб добрым перад усімі людзьмі.

Калі магчыма, наколькі гэта залежыць ад вас, будзьце ў згодзе са ўсімі людзьмі.

 

Са свайго боку, калі магчыма, жывіце ў спакоі з усімі людзьмі.

Ня помсьціце за сябе, любасныя, але дайце мейсца гневу (Бога). Бо напісана: «Мне помста. Я аддам», — кажа Госпад.

 

Не помсціце за сябе, умілаваныя, але дайце месца Божаму гневу, бо напісана: «Мне помста, Я аддам», — кажа Пан.

Дык, калі вораг твой галодны, накармі яго; калі прагне, напаі яго: бо робячы гэта ты зьбярэш на галаву ягоную разпаленае вугольле.

 

Але, калі вораг твой галодны, накармі Яго; калі прагне, напаі яго, бо так робячы, збярэш яму на галаву гарачае вуголле.

Ня будзь пераможаны злом, але перамагай зло дабром.

 

Не будзь пераможаны злом, але перамагай зло дабром.