Еклесиастес 10 Еклесиастес 10 разьдзел

² Сердце мужа мудраго ест на правици его, сердце же безумнаго ест на левици его.

³ Но и по пути своем безымный ходяй, понеже сам безумен ест, всех иных мнить быти безумных.

⁴ Взойдет ли дух силу имеющаго на тебе, места своего не кидай, понеже печаль престати чинит грехи велми великие.

⁵ Ест единое злое, еже есми видял под солнцем, еже яко бы през поблужение выходит от лица князева,

⁷ Видел есми рабы, а они ездять на конех, бояре же, а они ходять пеши.

⁸ Кто копает яму, увалится в ню, и кто казить плот, укусить сего вуж.

⁹ Кто преносить камение, поболить от него, и кто щепает дрова, уразится от них.

¹⁰ Будеть ли притуплено железо, а то неяко первей, но източено будет.

Таковое з великою працею выострено будеть, тако ж по пилности приходить мудрость.

¹¹ Яко змия, еже кусает тайне, тако и той, он же срамотить скрите.

¹² Слова уст мудрых суть милость, уста же немудраго сторгнуть главу его.

¹³ Зачало слов его ест безумие, и остаточные речи устен его сут блуд наигорший.

¹⁴ Безумный много говорить.

Не весть человек, что пред ним было ест, и что потом имать быти — кто ему может показати?

¹⁵ Труд безумных поженет их, они же не умеють ко граду поспешити.

¹⁶ Горе тобе, земле, твой же царь детищ ест, и его же князи рано ядят.

¹⁷ Добро тобе, земля, твой же царь разумен ест, и князи его ядять часом своим к посилению, а не к любодеянию.

¹⁸ Для недбания гниють кроквы, и для ленивое руки капати будет до дому.

¹⁹ К смеху чинят хлеб и вино, абы поживали пиющие.

И пенезем служать вси речи.

²⁰ В мысли твоей не клини царя и во сокрытом месте дому твоего не лай богатому, понеже и птици небесные донесуть глас твой, и имеющии криле скажуть осуждение.