Эклезіяста 10 Эклезіяста 10 разьдзел

¹ Мёртвыя мухі псуюць і смуродзяць пахучую масьць міраварніцы, тое самае робіць малая дурнота шаноўнага чалавека зь яго мудрасьцю й гонарам.

² Сэрца мудрага — праваруч, а сэрца бязглуздага — леваруч.

³ І па дарозе, калі дурань ідзе, не стае яму глузду, і кожнаму пакажа, што ён дурны.

⁴ Калі ўспыхне начальніцкі гнеў на цябе, не пакідай свайго месца; бо рахманасьць даводзіць да дараваньня вялікіх правінаў.

⁵ Ёсьць зло, якое бачыў я пад сонцам, падобнае да памылкі, якая ад валадара паўстала:

⁶ на вялікіх вышынях, бывае, сядзіць дурнота, а багатыя нізка садзяцца;

⁷ бачыў я конных рабоў, а князёў, што пеша, нібы рабы, хадзілі.

⁸ Хто яму капае, той у яе і ўпадзе, і хто разбурае агароджу, таго ўкусіць зьмяя.

⁹ Хто зносіць каменьне, той можа сябе надсадзіць, і хто коле дровы, той мае пагрозу ад іх.

¹⁰ Калі прытупляецца сякера і хтось ляза не навострыць, шмат намогі дадаць давядзецца; перавага плённае дзеі — мудрасьць.

¹¹ Калі гадзіна ўкусіць без заклінаньня, дык ня лепшы за яе і злоязыкі.

¹² Слова з вуснаў мудрага — мілата, а вусны дурнога яго ж і нішчаць:

¹³ пачатак слоў зь яго вуснаў — глупства, а канец яго казані з вуснаў — шаленства.

¹⁴ Дурны шмат чаго нагаворыць, хоць ня ведае чалавек, што будзе, і хто скажа яму, што пасьля яго станецца?

¹⁵ Праца дурнога стамляе яго, бо ён і ня ведае нават дарогі да горада.

¹⁶ Гора табе, зямля, калі цар твой — дзіця і калі ўладыкі твае ядуць рана!

¹⁷ Шчасьце табе, зямля, калі цар твой з высокага роду і ўладыкі твае ядуць у назначаны час, каб мацавацца, а не разьядацца!

¹⁸ Ад гультайства і столь прасядае; і як апусьцяцца рукі, дык дом пацячэ.

¹⁹ Гасьціны спраўляюць для асалоды, і віно зьвесяляе жыцьцё; а за ўсё адказвае срэбра.

²⁰ Нават і ў думках тваіх не ліхаслові цара, і ў спальні тваёй не ліхаслові багатага; бо і птушка нябесная можа словы твае перанесьці, а крылатая — казань тваю пераказаць.