1 да Цімафея 3 1-ы ліст да Цімафея 3 разьдзел

¹ Вернае слова: калі хто епіскапства жадае, добрай справы жадае.

² Епіскапу належыць быць беззаганным, мужам аднае жонкі, цвярозым, разумным, сумленным, гасцінным, вучыцельным;

³ не п’яніцаю, не задзіраю, не карыслівым, але далікатным, не сварлівым, не сквапным,

⁴ добрым гаспадаром уласнага дому, які трымае ў паслухмянасці дзяцей з усякай пашанай, —

⁵ бо калі хто не можа кіраваць сваім домам, як жа будзе рупіцца аб Царкве Божай? —

⁶ не можа быць з нованавернутых, каб не ўзбіўся ў пыху і не трапіў на суд разам з д’яблам.

⁷ Яму належыць мець добрае сведчанне ад тых, што навокал, каб не трапіў у пагарду і ў пастку д’ябла.

⁸ Таксама і дыяканы [хай будуць] паважныя, не двуязычныя, не прагавітыя да віна, не сквапныя да нажывы,

⁹ якія захоўваюць таямніцу веры ў чыстым сумленні.

¹⁰ І яны павінны быць перш выпрабаваныя, і потым, калі не будуць мець ніякай правіны, хай служаць.

¹¹ Падобна і жонкі — паважныя, не абмоўныя, цвярозыя, верныя ва ўсім.

¹² Дыяканы каб былі мужамі аднае жонкі, якія добра кіруюць дзецьмі сваімі і сваім домам.

¹³ Тыя, што добра спаўняюць служэнне, здабываюць сабе пачэсную ступень ды вялікую ўпэўненасць у веры, якая ёсць у Хрысце Ісусе.

¹⁴ Пішу табе ўсё гэта, маючы надзею прыбыць да цябе неўзабаве.

¹⁵ Калі ж замаруджу, каб ведаў ты, як маеш трымацца ў доме Божым, які ёсць Царква Бога жывога, стоўп і ўмацаванне праўды.

¹⁶ Ды агульна прызнана, што вялікая таямніца пабожнасці: Бог аб’явіўся ў целе, засведчаны Духам, паказаўся анёлам, абвешчаны народам, прыняты вераю ў свеце, узнесены ў славе.