Да Піліпцаў 1 Ліст да Піліпцаў 1 разьдзел

¹ Паўла і Цімафей, рабы Хрыста Ісуса, усім святым у Хрысце Ісусе, якія ёсць у Піліпах разам з епіскапамі і дыяканамі:

² ласка вам і супакой ад Бога, Айца нашага, і Госпада Ісуса Хрыста.

³ Дзякую Богу майму, усякі раз успамінаючы вас,

⁴ заўсёды ва ўсіх малітвах маіх за ўсіх вас з радасцю молячыся,

⁵ дзеля вашага ўдзелу ў Евангеллі ад першага дня аж да цяпер,

⁶ маючы пэўнасць, што Той, Які пачаў у вас добрую справу, давядзе аж да дня Хрыста Ісуса;

⁷ як справядліва мне думаць пра вас усіх, бо маю вас у сэрцы, і ў путах маіх, і ў абароне, і ва ўмацаванні Евангелля, бо ўсе вы супольнікі мае ў ласцы.

⁸ Сведка мне Бог, як сардэчна імкнуся да ўсіх вас у Ісусе Хрысце.

⁹ І аб тым малюся, каб любоў ваша ўсё больш і больш узрастала ў веданні і ўсякім адчуванні,

¹⁰ каб пазнаваць вам лепшае, каб вы былі чыстымі і без заганы ў дзень Хрыстоў,

¹¹ поўныя пладоў справядлівасці, што праз Ісуса Хрыста на ўшанаванне і славу Бога.

¹² Хачу, браты, каб вы ведалі: тое, што вакол мяне, спрычынілася больш да поспеху Евангелля,

¹³ бо путы мае ў Хрысце праславіліся ва ўсёй прэторыі і ва ўсіх іншых,

¹⁴ і многія з братоў у Госпадзе, асмеленыя маімі кайданамі, яшчэ больш адважыліся без страху абвяшчаць слова.

¹⁵ Адны, праўда, з зайздрасці і пярэчлівасці вясцяць Хрыста, іншыя ж — з добрай волі.

¹⁶ Тыя, што з любові, — ведаючы, што я дзеля абароны Евангелля пастаўлены,

¹⁷ тыя ж, што з зайздрасці, прапаведуюць Хрыста няшчыра, з намерам зрабіць мае путы яшчэ цяжэйшымі.

¹⁸ Дык што? Ці так, ці гэтак: ці дзеля віду, ці праўдзіва, Хрыстос абвяшчаецца; і я гэтаму рады, і буду радавацца,

¹⁹ ведаючы, што гэта ўсё выйдзе мне на збаўленне праз вашы малітвы і з дапамогай Духа Ісуса Хрыста,

²⁰ паводле чакання і спадзявання майго, што я ні ў чым не пралічуся, але з усёй упэўненасцю, як заўсёды, гэтак і цяпер хай уславіцца Хрыстос у целе маім ці праз жыццё, ці праз смерць.

²¹ Бо для мяне жыццё — гэта Хрыстос, і смерць — набытак.

²² Але калі жыццё ў целе прыносіць плод у маёй дзейнасці, дык, што выбраць, не ведаю.

²³ Цягне мяне адно і другое: жадаю адысці і быць з Хрыстом, бо гэта шмат лепшае,

²⁴ але заставацца ў целе больш патрэбна для вас.

²⁵ І гэта напэўна ведаю, што застануся з усімі вамі на карысць вашу і на радасць веры,

²⁶ каб радасць ваша расла ў Ісусе Хрысце праз мяне, праз маё вяртанне да вас.

²⁷ Толькі жывіце дастойна Евангелля Хрыстова, каб, ці калі прыбуду і ўбачу вас, ці адсутны, пачуў пра вас, што вы стаіце ў адным Духу, аднадумна змагаючыся за веру Евангельскую

²⁸ і ні ў чым не палохаецеся супраціўнікаў, што ім стане знакам загубы, вам жа — збаўлення, і гэта ад Бога.

²⁹ Вам бо дадзена дзеля Хрыста не толькі верыць у Яго, але і цярпець за Яго,

³⁰ такое самае змаганне маючы, якое бачылі ўва мне і як чуеце цяпер пра мяне.