Да Філіпянаў 1 разьдзел

¹ Паўла і Цімахвей, слугі Ісуса Хрыста, усім сьвятым у Хрысьце Ісусе, што ў Філіпах, з япіскапамі і дыяканамі:

² ласка вам і мір ад Бога Айца нашага і Госпада Ісуса Хрыста.

³ Дзякую Богу майму пры ўсякім успаміне аб вас,

⁴ (заўсёды ў кожнай малітве маей за ўсіх вас молячыся з радасьцяй,)

⁵ за вашае ўчасьце ў дабравешчаньні ад першага дня аж дагэтуль,

⁶ перакананы ў тым, што той, хто пачаў у вас добрае дзела, будзе завяршаць ажно па дзень Ісуса Хрыста,

⁷ як і справядліва мне думаць аб усіх вас, бо я маю вас у сэрцы, у путах маіх і ў абароне і ўмацаваньні Эвангельля, вас, якія ўсе — супольнікі маі ў ласцы.

⁸ Бо Бог мне сьведка, што я люблю вас у любві Ісуса Хрыста;

⁹ і малюся аб тое, каб любоў вашая яшчэ балей і балей узрастала ў пазнаньні і ўсякім пачуцьці,

¹⁰ каб пазнаць вам лепшае, каб вы былі чыстымі і неспаткнуўшыміся ў дзень Хрыстовы,

¹¹ напоўненымі пладамі праведнасьці праз Ісуса Хрыста на славу й пахвалу Божую.

¹² Хачу, браты, каб вы ведалі, што тое, што са мной (сталася), служыла балей на пасьпех Эвангельля,

¹³ бо путы маі ў Хрысьце сталіся вядомымі ўсей прэторыі і ўсім іншым,

¹⁴ і большая частка братоў у Госпадзе, перакананыя путамі маімі, яшчэ балей адважыліся бяз страху апавядаць Слова.

¹⁵ А некаторыя праз зайздрасьць і перакорлівасьць, іншыя-ж з добрай думкай абвяшчаюць Хрыста:

¹⁶ тыя, што праз непакорлівасьць, абвяшчаюць Хрыста ня чыста, думаючы дадаць гора путам маім;

¹⁷ тыя-ж, што з любві, ведаючы, што дзеля абароны Эвангельля ляжу.

¹⁸ Дык што? Так, ці сяк, дзеля віду, ці праўдзіва, Хрыстос абвяшчаецца, і я з гэтага цешуся і буду цешыцца,

¹⁹ бо я ведаю, што гэта паслужыць мне на збаўленьне праз вашу малітву, з дапамогай Духа Ісуса Хрыста,

²⁰ водле спадзяваньня і надзеі маей, што я ні ў чым ня буду асаромлены, а з усенькай адвагай, як заўсёды, гэтак і цяпер, узьвялічаны будзе Хрыстос у целе маім, ці то жыцьцём, ці сьмерцяй.

²¹ Бо для мяне жыцьцё — Хрыстос, і сьмерць — набытак.

²² А як жыцьцё водле цела — гэта мне плод дзела, дык і ня ведаю, што выбраць.

²³ Цягне тое і другое: маю жаданьне разьвязацца і быць з Хрыстом, бо гэта шмат лепшае,

²⁴ але аставацца ў целе патрабней дзеля вас.

²⁵ І я напэўна ведаю, што астануся і перабуду з усімі вамі на вашу карысьць і радасьць веры,

²⁶ каб пахвала вашая ў Хрысьце Ісусе павялічылася праз мяне пры маім паўторным да вас прыходзе.

²⁷ Толькі жывеце дастойна Эвангельля Хрыстовага, каб мне, ці прыду і ўгледжу вас, ці ня прыду, чуць аб вас, што вы стаіцё ў адным духу, змагаючыся аднадушна за веру Эвангельскую

²⁸ і ані не палохаючыся супраціўнікаў; гэтае для іх ёсьць знак пагібелі, а для вас — збаўленьня, і яно ад Бога;

²⁹ бо вам дадзена дзеля Хрыста ня толькі верыць у Яго, але і мучыцца за Яго,

³⁰ вядучы тую-ж барацьбу, якую вы бачылі ў-ва мне і цяпер чуеце аба мне.