Да Эфесцаў 6 Ліст да Эфесцаў 6 разьдзел

¹ Дзеці, слухайце бацькоў вашых у Госпадзе, бо гэта справядліва.

² Паважай бацьку твайго і маці; гэта першае прыказанне з абяцаннем:

³ каб добра было табе і каб быў ты даўгавечным на зямлі.

⁴ І вы, бацькі, не раздражняйце дзяцей вашых, але ўзгадоўвайце іх у навуцы і напамінанні Госпадавым.

⁵ Нявольнікі, са страхам і трымценнем у прастаце сэрца падпарадкоўвайцеся цялесным гаспадарам вашым, як Хрысту,

⁶ не на вачах толькі служачы, каб людзям падабацца, але як паслугачы Хрыстовы, выконваючы волю Божую ад душы,

⁷ з добрай волі паслугуючы, як Госпаду, а не людзям,

⁸ ведаючы, што кожны, хто б зрабіў дабро, той і ад Госпада атрымае, ці ён нявольнік, ці вольны.

⁹ І вы, гаспадары, тое самае рабіце ім, змяншаючы пагрозы, ведаючы, што іх і ваш Госпад ёсць у небе і што Ён не ўзіраецца на асобу.

¹⁰ Урэшце, браты, умацуйцеся ў Госпадзе і ў сіле магутнасці Яго.

¹¹ Апраніцеся ва ўсю зброю Божую, каб змаглі ўстаяць супраць хітрыкаў д’ябла.

¹² Бо наша змаганне не супраць цела і крыві, але супраць начальстваў, супраць уладаў, супраць цемры гэтага веку, супраць духаў нягоднасці ў нябёсах.

¹³ Дзеля таго вазьміце ўсю зброю Божую, каб маглі ў дзень ліхі супрацьстаць і, выканаўшы ўсё, выстаяць.

¹⁴ Дык стойце, падперазаўшы сцёгны вашы праўдаю, і надзеўшы панцыр справядлівасці,

¹⁵ і абуўшы ногі ў гатоўнасць абвяшчаць Евангелле супакою;

¹⁶ на ўсякую [нагоду] вазьміце шчыт веры, якім зможаце патушыць усе вогненныя стрэлы ліхога;

¹⁷ і вазьміце шалом збаўлення разам з мечам Духа, якім ёсць Слова Божае,

¹⁸ ва ўсякі час молячыся ўсякаю малітваю і просьбаю ў Духу, аб гэтым самым чувайце з усёй трываласцю і просьбаю за ўсіх святых

¹⁹ і за мяне, каб дадзены быў мне дар слова на адкрыванне вуснаў маіх, каб пераканаўча выяўляў таямніцы Евангелля,

²⁰ дзеля якога я прызначаны пасланцам у путах, каб у ім адважыўся гаварыць так, як мне належыць гаварыць.

²¹ Каб жа і вы ведалі пра мяне, што раблю, пра ўсё гэта паведаміць вам Тыхік, найдаражэйшы брат і верны слуга у Госпадзе,

²² якога я паслаў да вас на тое, каб вы ведалі, што ў нас робіцца, і каб ён суцешыў сэрцы вашы.

²³ Супакой братам і любоў з вераю ад Бога Айца і Госпада Ісуса Хрыста.

²⁴ Ласка з усімі, якія любяць Госпада нашага Ісуса Хрыста ў незнішчальнасці. Амін.