Да Эфесцаў 2 Ліст да Эфесцаў 2 разьдзел

¹ І вы былі памерлымі праз правіны і грахі,

² у якіх калісьці хадзілі паводле гэтага веку, па волі князя ўлады паветранай, духа, які дзейнічае цяпер у сынах бунту.

³ Між імі і мы калісьці жылі ўсе ў пажадлівасцях цела нашага, выконваючы волю цела і думак, і былі мы па прыродзе дзецьмі гневу, як і іншыя.

⁴ Але Бог, багаты міласэрнасцю, праз бязмежную любоў Сваю, якою ўзлюбіў нас

⁵ і, хоць былі мы мёртвымі праз грахі, ажывіў нас з Хрыстом, — ласкаю вы збаўлены, —

⁶ і ўваскрасіў разам, і пасадзіў разам у нябёсах у Хрысце Ісусе,

⁷ каб у наступных вяках выявіць нам незвычайныя багацці ласкі Сваёй у ласкавасці да нас у Хрысце Ісусе.

⁸ Бо ласкаю вы збаўлены праз веру, і гэта не ад вас, але Божы дар;

⁹ не праз учынкі, каб ніхто не хваліўся.

¹⁰ Бо мы — Яго стварэнне, створаныя ў Хрысце Ісусе для добрых спраў, якія Бог загадзя прыгатаваў, каб мы ў іх жылі.

¹¹ Дзеля таго памятайце, што вы, калісьці пагане целам, якіх завуць неабрэзанымі тыя, што называюцца абрэзанымі абразаннем на целе рукатворным,

¹² у той час былі без Хрыста, адчужаныя ад супольнасці з Ізраэлем і аддаленыя ад абяцанняў запаветаў, не маючы надзеі і без Бога ў свеце.

¹³ Цяпер жа ў Хрысце Ісусе вы, што калісьці былі далёка, сталіся блізкімі праз Кроў Хрыстову.

¹⁴ Бо Ён — супакой наш, Які злучыў абодвух у адно і зруйнаваў сцяну між імі і варожасць, целам Сваім,

¹⁵ скасаваў закон прыказанняў вучэннем, каб стварыць у Сабе з двух аднаго новага чалавека, творачы супакой,

¹⁶ і прымірыць з Богам абодвух у адным целе праз крыж, знішчаючы варожасць на ім.

¹⁷ І, прыйшоўшы, абвясціў супакой вам, якія былі далёка, ды тым, што былі блізка.

¹⁸ Бо праз Яго адны і другія маем доступ да Айца ў адным Духу.

¹⁹ Дык таму вы ўжо не чужынцы і прыхадні, але суграмадзяне святых і члены сям’і Божай,

²⁰ угрунтаваныя на падмурку Апосталаў і прарокаў, дзе вуглавым каменем ёсць Сам Хрыстос Ісус,

²¹ на Якім уся пабудова зладжана расце ў святую святыню ў Госпадзе,

²² на Якім і вы разам будуецеся на жытло Божае Духам.