Да Эфэсян 2 Да Эфэсян 2 разьдзел

¹ І вас, мертвых у выступах а грахох вашых,

² У каторых вы некалі хадзілі, подле звычаю сьвету гэтага, подле дзяржаўцы ўлады ў паветру, духа, што цяпер дзее ў сынох непаслухменства,

³ Памеж каторых і мы ўсі жылі калісь у жадах цела нашага, робячы зычэньне цела й разуменьня, і з прыроды былі дзецьмі гневу, як і іншыя,

⁴ Бог, багаты міласэрдзям, зь вялікае міласьці Свае, каторай умілаваў нас,

⁵ І нас, мертвых у выступах, ажывіў з Хрыстом,

⁶ І ўскрысіў разам, і пасадзіў у нябёсах у Хрысту Ісусу,

⁷ Каб паказаць у прыйдучых вякох нязьмернае багацьце ласкі Свае з дабрыні да нас у Хрысту Ісусу.

⁸ Бо вы спасёны ласкаю перазь веру, і гэта не ад вас, Божы дар:

⁹ Не ад учынкаў, каб ніхто не хваліўся.

¹⁰ Бо мы — твор Ягоны, створаны ў Хрысту Ісусу да добрых учынкаў, каторыя Бог наканаваў, каб мы хадзілі ў іх.

¹¹ Дык памятуйце, што вы, калісь пагане подле цела, каторых звалі неабразанымі званыя абразаньням на целе, зробленым рукамі,

¹² Што вы былі таго часу бяз Хрыста, аддаленыя ад грамадзтва Ізраельскага, чужыя да ўмоваў абятніцы, надзеі нямаючыя, і бяз Бога на сьвеце;

¹³ А цяпер у Хрысту Ісусу вы, што былі калісь далёкія, сталі блізкія крывёю Хрыстоваю.

¹⁴ Бо Ён ё супакой наш, Каторы ўчыніў з абодвых адно і паламіў перагародку, што стаяла пасярэдзіне,

¹⁵ Памярцьвіў непрыязьньства целам Сваім, Закон расказаньняў у вуставах Ён абурыў, каб із двух учыніць у Сабе Самым аднаго новага чалавека, робячы супакой,

¹⁶ І ў вадным целе пагадзіць абодвых із Богам пераз крыж, забіўшы непрыязьньства на ім;

¹⁷ І, прышоўшы, абяшчаў Дабравесьць супакою вам, далёкім і блізкім,

¹⁸ Бо перазь Яго абодвы маем прыступ да Айца, у вадным духу.

¹⁹ Дык вы ўжо не чужнікі ані чужаземцы, але суграмадзяне сьвятых і дамовы Божае,

²⁰ Быўшы пабудаваныя на подзе апосталаў а прарокаў, маючы вугольным каменям самога Ісуса Хрыста,

²¹ На Каторым уся будоўля, тарнуючыся разам, вырастае ў сьвяты дом Спадароў,

²² У каторым і вы будуецеся разам на сялібу Божую ў Духу.