Да Эфэсцаў 2 Да Эфэсцаў 2 разьдзел

¹ І вас, мёртвых праступкамі і граха́мі вашымі,

² у якіх вы калісь хадзілі па ве́ку гэтага сьве́ту, па волі князя ўлады паве́транае, духа, што дзе́ець цяпе́р у сынох праціўле́ньня,

³ між якімі і мы ўсе́ жылі калісь у пажаданьнях це́ла нашага, выпаўняючы жаданьні це́ла і думак, і былі па прыродзе дзяцьмі гневу, як і другія, —

⁴ Бог, багаты літасьцяй праз вялікую любоў Сваю, якою палюбіў нас,

⁵ і нас, мёртвых праступкамі, ажывіў разам з Хрыстом, — ласкай вы выбаўлены, —

⁶ і ўскрасіў з Ім, і пасадзіў на мясцох нябе́сных у Хрысьце Ісусе,

⁷ каб зьявіць у надыходзячых гадох многасьць багацьця ласкі Свае́й у ласкавасьці да нас у Хрысьце́ Ісусе.

⁸ Бо ласкай вы выбаўлены праз ве́ру; і гэта не ад вас — Божы дар:

⁹ не ад дзе́л, каб ніхто не хваліўся.

¹⁰ Бо мы — Яго стварэньне, створаныя ў Хрысьце́ Ісусе на добрыя ўчынкі, якія Бог загадзя празначыў, каб мы ў іх хадзілі.

¹¹ Дык памятайце, што вы, калісь пагане це́лам, называныя неабрэзаньнем ад так званага абрэзаньня ў це́ле, рукатворнага,

¹² што вы былі ў час гэны бяз Хрыста, прызнаваныя чужакамі ад грамадзянства Ізраільскага і чужыя запаве́там прырачэньня, ня маючы надзе́і і бяз Бога ў сьве́це;

¹³ а цяпе́р у Хрысьце́ Ісусе вы, што былі калісь далёка, сталіся блізкімі крывёю Хрыстоваю.

¹⁴ Бо Ён ёсьць мір наш, што́ ўчыніў з абодвух адно і разбурыў стаяўшую пасярэдзіне за́гарадку,

¹⁵ зьніштожыўшы, варожасьць Це́лам Сваім, а закон за́паведзяў — навукай, каб з двох стварыць у Сабе́ аднаго новага чалаве́ка, ладзячы мір,

¹⁶ і ў адным це́ле пагадзіць абодвух з Богам праз крыж, забіўшы на ім варожасьць;

¹⁷ і, прыйшоўшы, абвясьціў мір вам, далёкім і блізкім,

¹⁸ бо праз Яго абое маем доступ да Айца ў адным Духу.

¹⁹ Дык вы ўжо ня чужыя і ня прыходні, але суграмадзяне сьвятым і хатнія ў Бога,

²⁰ збудаваныя на падваліне Апосталаў і Прарокаў, маючы Самога Ісуса Хрыста за кутні камень,

²¹ на якім уся будыніна, разам змацаваная, расьце́ ў сьвяты храм у Госпадзе,

²² на якім і вы разам будуецеся на жыльлё Божае Духам.