3 Іаана 1 разьдзел

¹ Старэйшына — улюбёнаму Гаію, якога я люблю ў праўдзе.

² Улюбёны, малюся, каб ты ва ўсім меў вялікі поспех і быў здаровы, як мае вялікі поспех твая душа.

³ Бо я вельмі ўзрадаваўся, калі прыходзілі браты і сведчылі аб тваёй праўдзе, як ты і жывеш у праўдзе.

⁴ Для мяне няма большай радасці, як чуць, што мае дзеці жывуць у праўдзе.

⁵ Улюбёны, ты верна дзейнічаеш у тым, што ты робіш для братоў і да таго чужаземных,

⁶ якія засведчылі пра тваю любоў перад царквою; і ты добра зробіш, калі правядзеш іх, як належыць, дзеля Бога;

⁷ бо яны дзеля [Яго] Імя выйшлі, нічога не ўзяўшы ад язычнікаў.

⁸ Так што мы павінны падтрымліваць такіх, каб нам зрабіцца супрацоўнікамі праўды.

⁹ Я сёе-тое напісаў царкве; але Дыятрэф, які любіць першынстваваць у іх, не прымае нас.

¹⁰ Таму, калі я прыйду, то нагадаю пра яго ўчынкі, якія ён вытварае, плявузгаючы на нас ліхімі словамі; і, не задавальняючыся гэтым, ён і сам не прымае братоў, і забараняе тым, хто хоча прыняць, і выганяе з царквы.

¹¹ Улюбёны, пераймай не ліхое, а добрае. Хто творыць дабро, той — ад Бога; хто творыць ліха, той не бачыў Бога.

¹² Пра Дзімітрыя засведчана ўсімі, і самою праўдай; і мы таксама сведчым, і ты ведаеш1, што наша сведчанне праўдзівае.

¹³ Шмат я меў напісаць табе, але не хачу пісаць табе чарнілам і пяром;

¹⁴ а спадзяюся хутка ўбачыць цябе, і мы пагаворым з вуснаў у вусны.

¹⁵ Мір табе. Вітаюць цябе сябры. Прывітай сяброў пайменна. [Амін].