Яна 10 разьдзел

Паводле Яна Сьвятое Дабравесьце
Пераклад Чарняўскага 2017 → Пераклад Міхася Міцкевіча

 
 

Сапраўды, сапраўды кажу вам: хто не ўваходзіць у аўчарню праз дзверы, але пранікае інакш, той злодзей і разбойнік;
 
Папраўдзе, папраўдзе кажу вам: — хто не ўвайходзіць праз вароты на двор авечы, а пералазіць інакш, той злодзей і разбойнік.

а хто ўваходзіць праз дзверы, той пастыр над авечкамі.
 
А хто ўвайходзіць праз вароты, той пастыр авечкам.

Яму прыдзвернік адчыняе, і авечкі слухаюцца яго голасу, і сваіх авечак кліча ён па імю ды выпускае іх.
 
Яму прыбрамнік адчыняе, і авечкі слухаюць голасу яго; ён кліча авец сваіх паімённа і выводзіць іх.

А калі выпусціць сваіх авечак, ідзе перад імі наперадзе, а авечкі ідуць за ім, бо ведаюць яго голас;
 
І калі выведзе авечкі свае, ідзе перад імі, і авечкі йдуць за ім, бо ведаюць голас яго.

а за чужым яны не пойдуць, але ўцякаюць ад яго, бо голасу чужых не ведаюць».
 
За чужым-жа ня пойдуць, але разбягуцца ад яго, бо ня знаюць чужога голасу.

Такую прыпавесць сказаў ім Ісус; але яны не зразумелі, што значыць тое, што ім гаварыў.
 
Гэтую прыпавесць сказаў ім Ісус, але яны не зразумелі, пра што такое Ён гаварыў ім.

Дык сказаў ім Ісус ізноў: «Сапраўды, сапраўды кажу вам: Я — дзверы для авечак.
 
Таму Ісус зноў сказаў ім: — папраўдзе, папраўдзе кажу вам: Я — вароты для авец.

Усе, колькі іх не прыйшло перада Мною, — злодзеі яны і разбойнікі, але авечкі не паслухалі іх.
 
Усе, колькі іх прыйходзіла перада Мною — зладзеі і разбойнікі, але авечкі не паслухалі іх.

Я — дзверы: калі хто праз Мяне ўвойдзе, будзе збаўлены; і ўвойдзе, і выйдзе, ды знойдзе пашу.
 
Я ёсьць дзьвярмі тымі: хто праз Мяне ўвойдзе, збавёны будзе, і ўвойдзе, і выйдзе, і пажыву знойдзе.

Злодзей не прыходзіць інакш, каб толькі красці, забіваць і губіць; Я ж прыйшоў, каб мелі жыццё і мелі ўдосталь.
 
Злодзей прыйходзіць толькі дзеля таго, каб украсьці, забіць ці загубіць; Я прыйшоў, каб жыцьцё мелі, і ўдосталь мелі.

Я — Пастыр добры. Добры Пастыр аддае за авечак жыццё Сваё.
 
Я пастыр добры; добры пастыр жыцьцё сваё аддае за авечкі свае.

Але найміт ды той, хто не пастыр, у каго авечкі не свае, бачыць, што набягае воўк, кідае авечак ды ўцякае, — а воўк хапае іх і разганяе авечак, —
 
А найміт, хто ня пастыр, і авечкі яму не свае, бачачы, як урываецца воўк, пакідае авечкі і ўцякае, і воўк хапае іх і разганяе авечкі.

А найміт уцякае, бо ён — найміт і не рупіцца пра авечак.
 
Найміт уцякае, бо найміт, і ня дбае пра авечкі.

Я — добры Пастыр і ведаю Маіх, і яны Мяне ведаюць,
 
Я — Пастыр Добры, і ведаю Маіх, і Мае ведаюць Мяне.

як ведае Мяне Айцец, а Я ведаю Айца; і жыццё Маё аддаю за авечак.
 
Як Айцец Мяне знае, так і Я знаю Айца, і жыцьцё Маё кладу за авечкі.

Ды і іншых авечак маю, якія не з гэтай аўчарні, і тых належыць Мне прывесці, і будуць яны слухаць голасу Майго, і станецца адзін статак і адзін Пастыр.
 
Маю Я і іншыя авечкі, ня з гэтага двара, і іх належыць Мне прывясьці, і яны пачуюць голас Мой, і будзе адзін статак і адзін Пастыр.

Таму любіць Мяне Айцец, што Я жыццё Маё аддаю, каб зноў яго атрымаць.
 
За тое любіць Мяне Айцец, што Я аддаю жыцьцё Маё, каб зноў прыняць яго.

Ніхто ў Мяне яго не адбірае, але Я па Сваёй волі аддаю яго. Маю ўладу аддаваць яго і маю ўладу яго атрымаць. Такі загад атрымаў Я ад Айца Майго».
 
Ніхто яго ад Мяне не адыйме, але Я Сам аддаю яго; і маю ўладу аддаць яго, і ўладу маю зноў прыняць яго; гэты запавет дастаў Я ад Айца Майго.

Дзеля таго ўзнікла зноў спрэчка між юдэямі з-за гэтых слоў.
 
За гэтыя словы зноў узьнялася між юдэямі спрэчка.

Затым многія з іх гаварылі: «Дэмана мае і шалее! Нашто Яго слухаць?»
 
Шматлікія з іх гаварылі: — Ён мае злыдуха і вар'юецца, што вы слухаеце Яго?

Іншыя ж казалі: «Гэта не словы апанаванага дэманам. Ці ж дэман можа сляпым вяртаць зрок?»
 
Іншыя-ж гаварылі: — словы гэтыя не апантанага; ці-ж можа злыдух адчыняць вочы сьляпому?

Сталася тады ў Ерузаліме ўрачыстасць пасвячэння святыні; была зіма,
 
Было-ж тады ў Ерусаліме сьвята Абнаўленьня, і была зіма.

і хадзіў Ісус па святыні ў прысенках Саламона.
 
І хадзіў Ісус у храме, у прытворы Саламонавым.

Тады абступілі Яго юдэі і казалі Яму: «Дакуль будзеш бянтэжыць душу нашу? Калі Ты — Хрыстос, скажы нам яўна».
 
Абступілі тут Яго юдэі, і кажуць Яму: — дакуль Ты будзеш марочыць нам душы? Калі Ты Хрыстос, дык скажы нам адкрыта.

Адказаў ім Ісус: «Сказаў Я вам, а вы не верыце; справы, якія Я выконваю ў імя Айца Майго, яны сведчаць пра Мяне.
 
Ісус адказаў ім: — Я сказаў вам, і ня верыце; учынкі, якія Я твару ў імя Айца Майго, сьветчаць за Мяне.

Але вы не верыце, бо вы не з Маіх авечак, як Я сказаў вам.
 
Але вы ня верыце, бо вы не з Маіх авец, як Я вам сказаў.

Авечкі Мае слухаюцца голасу Майго, і Я ведаю іх, і яны ідуць за Мной,
 
Авечкі Мае слухаюць голасу Майго, і Я знаю іх, і яны за Мною ідуць.

і Я даю ім жыццё вечнае, і не прападуць вечна, і ніхто не вырве іх з Маёй рукі.
 
І Я даю ім жыцьцё вечнае, і не загінуць павек, і ніхто ня вырве іх з рукі Маей.

Айцец Мой, Які даў Мне іх, большы за ўсіх, і ніхто не можа вырваць іх з рукі Айца Майго.
 
Айцец Мой, Хто даў іх Мне, большы за ўсіх, і ніхто ня можа адабраць іх з рукі Айца Майго:

Я і Айцец — адно».
 
Я і Айцец — адзінства ёсьць.

Дык зноў юдэі схапілі камяні, каб Яго ўкаменаваць.
 
Тады юдэі зноў хапіліся за камяньні, каб каменаваць Яго.

Адказаў ім Ісус: «Многа добрых учынкаў паказаў Я вам ад Айца Майго, дык за які з гэтых учынкаў кідаеце ў Мяне камяні?»
 
Ісус адказаў ім: — многа добрых чынаў паказаў Я вам ад Айца Майго; за каторы-ж з гэтых чынаў хочаце пабіць Мяне камяньнямі.

Адказалі Яму юдэі, кажучы: «Не камянуем Цябе за добрую справу, але за блюзненне, за тое, што Ты, хоць Ты чалавек, робіш Сябе Богам».
 
І сказалі юдэі Яму ў адказ: — не за добрыя ўчынкі хочам каменаваць Цябе, але за блюзьнерства і за тое, што Ты — чалавек — выдаеш Сябе за Бога.

Адказаў ім Ісус: «Ці ж у законе вашым не напісана: “Я сказаў: вы — багі”?
 
Ісус адказаў ім: — ці-ж не напісана ў законе вашым: — Я сказаў, вы богі.

Калі назваў багамі тых, для якіх было прызначана слова Божае, — а Пісанне памыліцца не можа, —
 
Калі Ён назваў багамі тых, да каторых было слова Божае — а Пісаньне ня можа быць парушанае, —

аб Тым, Каго Айцец усвяціў і паслаў у свет, вы кажаце: “Ты блюзніш!”, бо Я сказаў: “Я — Сын Божы”?
 
Дык як-жа Таму, Каго асьвяціў Айцец, вы кажаце — блюзьнерыш, — што Я сказаў: — Я Сын Божы?

Калі Я не раблю спраў Айца Майго, не верце Мне.
 
Калі Я ня выконваю дзеяньняў Айца Майго, ня верце Мне.

Але калі раблю, дык, калі вы Мне верыць не хочаце, верце справам, каб спазналі і паверылі, што Айцец — ува Мне, а Я — у Ім».
 
Калі-ж выконваю, і ня верыце Мне, то верце ўчынкам Маім, каб пазналі і ўверылі, што Айцец ува Мне і Я ў Ім.

Імкнуліся затым Яго ўзяць, але Ён ухіліўся ад іх рук.
 
Тады зноў намкнуліся схапіць Яго, але Ён ухіліўся ад рук іхных.

І пайшоў зноў за Ярдан, у месца, дзе раней хрысціў Ян, ды там застаўся.
 
І пайшоў зноў за Йардан, дзе раней хрысьціў Ян, і там застаўся.

І многія прыходзілі да Яго і казалі: «Ян, што праўда, ніводнага знака не ўчыніў; але ўсё, што Ян аб Ім сказаў, было праўдай».
 
І многія прыйшлі да Яго; і гаварылі, што Ян не стварыў ніякага цуду, але ўсё, што сказаў Ян пра Яго, бы праўдзівае.

І многія там паверылі ў Яго.
 
І многія ўверылі ў Яго там.