1 да Цімафея 2 разьдзел

Першае пасланьне да Цімафея
Пераклад Чарняўскага 2017 → Пераклад П. Татарыновіча

 
 

Дык прашу найперш, каб узносілі просьбы, малітвы, умольванні і падзякі за ўсіх людзей,
 
Перш за ўсё вось-жа прашу маліцца благальна, падзячна, за ўсіх людзей,

за цароў і за ўсіх тых, што знаходзяцца пры ўладзе, каб маглі мы весці жыццё ціхае і спакойнае з усёю пабожнасцю і прыстойнасцю.
 
за каралёў ды ўсеўладу, каб вясьці нам супакойнае й ціхое жыцьцё ў шчырай богабоязі ды чыстасьці,

Бо гэта добра і міла Збаўцу нашаму Богу,
 
гэта бо добрае й мілае Богу Збавіцелю нашаму,

Які хоча збавіць усіх людзей і давесці іх да пазнання праўды.
 
Які хоча, каб усе дайшлі да пазнаньня праўды і былі збаўлёныя.

Бо адзін Бог, і адзін Пасярэднік між Богам і людзьмі — чалавек Хрыстос Ісус,
 
Адзін бо ёсьць Бог, адзін і Пасярэднік між Богам і людзьмі — Чалавек Хрыстус Езус,

Які Самога Сябе выдаў дзеля адкуплення за ўсіх, як сведчанне ў свой час,
 
што аддаў сябе самога на водкуп усіх, на сьвядоцтва сваім часам,

на які і я прызначаны прапаведнікам, і Апосталам, і, праўду кажу у Хрысце, не ашукваю, настаўнікам паганаў у веры і праўдзе.
 
для якога вестуном і Апосталам Я пастаўлены (кажу праўду ў Хрыстусе, нялгу), вучыцелем паганаў у веры І праўдзе.

Дык хачу, каб мужчыны маліліся на кожным месцы, падымаючы чыстыя рукі без гневу і спрэчак.
 
Жадаю вось-жа, каб мужчыны маліліся на кажным месцы, узьнімаючы рукі чыстыя бяз гневу й сумніваў,

Падобна і жанчыны ў прыстойным адзенні, упрыгожаныя са сціпласцю і цнатлівасцю не пляценнем валасоў ці золатам або перламі ці каштоўнымі строямі,
 
гэтаксама і жанчыны: ў прыстойным адзеньні, скромна і ўстыдліва, а ня з вымудраванымі заплётамі валасоў, у золаце й пэрлах, ці пышных строях,

але як належыць жанчынам, лепш выяўляючы пабожнасць праз добрыя справы.
 
але — як прыстоіць жанчынах, пасьвяціўшымся пабожнасьці, (хай моляцца) спаўняючы добрые ўчынкі.

Жанчына няхай вучыцца ў ціхасці, з поўнай пакорлівасцю.
 
Жанчына маўчкі хай вучыцца ўсякае пакоры.

Не дазваляю жанчыне навучаць і панаваць над мужам, але каб заставалася ў ціхасці.
 
І жанчыне, каб навучала, не дазваляю, ані каб над мужам верхаводзіла, але трымалася маўчаньня.

Бо Адам быў першым створаны, а потым Ева.
 
Перш бо створаны Адам, а потым Ева.

І не Адам даўся звесціся, а жанчына была зведзена і ўпала ў злачынства.
 
Ды не Адам быў спакушаны, але жонка спанаджаная была ў праступку;

Яна будзе збаўлена, родзячы дзяцей і трываючы ў веры, любові і святасці са сціпласцю.
 
збавіцца, аднак, родзячы, калі будзе трываць у веры й любасьці ды сьвятасьці зы скромнасьцяй.