Псалтыр 8 псалом
Псалтыр
Пераклад Антонія Бокуна → Пераклад Васіля Сёмухі
Кіраўніку хору: на лад Гітыт. Псальм Давіда.
Кіроўцу хору. На Гэцкім інструмэньце. Псальма Давідава.
ГОСПАДЗЕ, Госпадзе наш! Якое слаўнае імя Тваё па ўсёй зямлі! Слава Твая ўзьнесеная па-над нябёсы!
Госпадзе Божа наш! якое велічнае імя Тваё па ўсёй зямлі! Слава Твая па-над нябёсы!
З вуснаў немаўлятаў і тых, што пры грудзях, Ты зрабіў умацаваньне супраць ненавісьнікаў Тваіх, каб спыніць ворага і мсьціўцу.
З вуснаў дзяцей і немаўлятак Ты зладзіў хвалу, дзеля ворагаў Тваіх, каб зьнямовіць мсьціўцу і ворага.
Калі я гляджу на неба Тваё, твор пальцаў Тваіх, на месяц і на зоркі, якія Ты паставіў,
Калі я гляджу на нябёсы Твае, — твор Тваіх рук, на месяц і зоркі, якія Ты паставіў,
я думаю: «Што ёсьць чалавек, што Ты памятаеш пра яго, і сын чалавечы, што Ты наведваеш яго?
дык што ёсьць чалавек, якога Ты памятаеш, і сын чалавечы, якога наведваеш Ты?
Не нашмат Ты паменшыў яго перад багамі, і славай і веліччу Ты ўкаранаваў яго,
Нядужа Ты зьменшыў яго перад анёламі: славаю, гонарам увянчаў яго;
і даў яму панаваць над творамі рук Тваіх, і ўсё Ты паклаў пад ногі яму:
паставіў яго ўладаром над творамі рук Тваіх; пад ногі паклаў яму ўсё:
авечак і валоў усіх, і зьвяроў палявых,
валоў і авечак усіх, і польных зьвяроў гэтак сама,
птушак у небе, і рыбаў у моры, і ўсё, што ходзіць сьцежкамі марскімі».
птушак нябесных і рыбін марскіх, усё, што праходзіць марскімі шляхамі.
ГОСПАДЗЕ, Госпадзе наш! Якое слаўнае імя Тваё па ўсёй зямлі!
Госпадзе Божа наш! Якое велічнае імя Тваё па ўсёй зямлі!
