Да Рымлянаў 12 разьдзел

 

 

Дык прашу вас, браты, праз міласэрнасць Божую, аддавайце целы вашы ў ахвяру жывую, святую, мілую Богу на разумнае служэнне ваша.

 

Дык прашу вас, браты, міласэрнасцю Божаю аддаць вашы целы ў ахвяру жывую, святую, прыемную Богу, як вашу разумную службу.

І не ўпадабняйцеся гэтаму веку, але перамяняйцеся праз аднаўленне розуму вашага, каб пазналі, якая ёсць воля Божая, добрая, прыемная, дасканалая.

 

І не прыстасоўвайцеся да гэтага веку, а пераўтварайцеся абнаўленнем [вашага] розуму, каб распазнавалі вы, што ёсць воля Божая: што ёсць добрае, што прыемнае Богу і што дасканалае.

Дадзенаю мне ласкаю кажу кожнаму з вас, каб не думалі аб сабе вышэй, чым належыць, але каб думалі цвяроза, паводле той меры веры, якую вызначыў Бог.

 

Бо я кажу дадзенаю мне ласкаю кожнаму з вас: не думаць пра сябе вышэй, чым належыць думаць, а думаць сціпла, як кожнаму Бог вызначыў меру веры.

Бо як у адным целе маем многа членаў, а ўсе члены не тую самую работу маюць,

 

Бо як у адным целе мы маем шмат органаў, але не ўсе органы маюць адно і тое ж прызначэнне,

так і мы многія ёсць адно цела ў Хрысце, а паасобку адзін для аднаго — члены.

 

так мы, многія, — адно цела ў Хрысце, а асобна — мы адзін для аднаго розныя органы.

А паводле дадзенай нам ласкі маем розныя дары: калі дар прароцтва — то згодна з верай,

 

І, маючы розныя дары, згодна з ласкаю, дадзенаю нам: і калі прароцтва — будзем прарочыць суразмерна з вераю,

калі служэнне — то для служэння, калі хто навучае — для навучання,

 

а калі служэння — будзем верныя ў служэнні, калі хто вучыць — у навучанні,

калі хто заахвочвае — для заахвочвання; калі хто раздае — у прастаце сэрца, калі хто старшынствуе — дык рупліва, калі хто мілуе — дык з ахвотаю.

 

і калі хто суцяшае — у суцяшэнні; хто дае — у шчырасці; хто кіруе — то з руплівасцю; хто чыніць міласэрнасць — то з радасцю.

Любоў хай будзе без крывадушнасці. Адварочвайцеся ад ліха, прыгартайцеся да дабра;

 

Любоў няхай будзе непрытворная. Брыдзьцеся зла, трымайцеся дабра.

шчыра любіце адзін аднаго братняю любоўю, у пашане адзін аднаго апераджаючы;

 

Горача любіце адзін аднаго братняю любоўю, апераджайце адзін аднаго ў шанаванні,

у рупнасці не слабейце, духам палаючы, Госпаду служачы,

 

У руплівасці не будзьце гультаяватыя, духам палайце, служачы Госпаду.

у надзеі будзьце радасныя, у горы цярплівыя, у малітве сталыя,

 

У надзеі радуйцеся, у горы будзьце стойкімі, у малітве — настойлівыя.

бярыце ўдзел у патрэбах святых, будзьце гасцінныя.

 

Прымайце ўдзел у патрэбах святых, будзьце гасціннымі.

Дабраслаўляйце пераследавальнікаў сваіх; дабраслаўляйце, а не кляніце!

 

Добраслаўляйце тых, хто вас гоніць; добраслаўляйце, а не праклінайце.

Радуйцеся з тымі, хто радуецца, плачце з тымі, хто плача.

 

Радуйцеся з тымі, хто радуецца, [і] плачце з тымі, хто плача.

Будзьце між сабой аднадумцамі, не сягайце думкамі высока, але ідзіце ўслед за пакорлівымі. Не будзьце мудрымі самі з сабой.

 

Будзьце між сабою аднадумныя, не ўпадайце ў высакамер’е, а ідзіце ўслед за сціплымі, не лічыце сябе за разумнікаў.

Не аддавайце злом за зло. Дбайце пра добрае перад усімі людзьмі.

 

Не плаціце нікому злом за зло, дбайце загадзя пра добрае для ўсіх людзей.

Наколькі магчыма ды наколькі ад вас залежыць, жывіце з усімі людзьмі ў згодзе.

 

Калі мажліва, наколькі гэта залежыць ад вас, жывіце ў міры з усімі людзьмі.

Не помсціце, умілаваныя, самі за сябе, але дайце месца гневу, як напісана: «Мне помста, Я аддам», — кажа Госпад.

 

Не помсціце за сябе, улюбёныя, але дайце месца гневу Божаму, бо напісана: «У Мяне помста. Я адплачу, — кажа Госпад».

Дык, калі будзе галодны вораг твой, накармі яго; калі будзе сасмаглы, дай яму піць. Так вось робячы, вуголле гарачае насыпаеш яму на галаву.

 

Дык, калі «твой вораг галодны, накармі яго; калі хоча піць — напаі яго; бо, робячы гэта, ты збярэш на яго галаву гарачае вуголле».

Не дайся, каб цябе перамагло зло, але перамагай зло дабром.

 

Не будзь пераможаны злом, але перамагай зло дабром.