Да Рымлянаў 12 разьдзел

Пасланьне да Рымлянаў
Пераклад Чарняўскага 2017 → Пераклад Яна Станкевіча

 
 

Дык прашу вас, браты, праз міласэрнасць Божую, аддавайце целы вашы ў ахвяру жывую, святую, мілую Богу на разумнае служэнне ваша.
 
Дык малю вас, браты міласэрдзям Божым, пасьвяціце целы свае на аброк жывы, сьвяты, Богу любы, значыцца разумную службу сваю;

І не ўпадабняйцеся гэтаму веку, але перамяняйцеся праз аднаўленне розуму вашага, каб пазналі, якая ёсць воля Божая, добрая, прыемная, дасканалая.
 
І не тарнуйцеся да веку гэтага, але адмяніцеся аднаўленьням думкі свае, каб вы пераканаліся што за добрая а прыемная а дасканальная воля Божая.

Дадзенаю мне ласкаю кажу кожнаму з вас, каб не думалі аб сабе вышэй, чым належыць, але каб думалі цвяроза, паводле той меры веры, якую вызначыў Бог.
 
Бо подле ласкі, данае імне, кажу кажнаму з памеж вас: ня думайце празь сябе болей, чымся належа думаць; але думайце сьціпла, кажны подле меры веры, каторую Бог удзяліў яму.

Бо як у адным целе маем многа членаў, а ўсе члены не тую самую работу маюць,
 
Бо, як у вадным целе ў нас шмат чаланоў, але ня ў вусіх чаланоў тая самая дзейнасьць,

так і мы многія ёсць адно цела ў Хрысце, а паасобку адзін для аднаго — члены.
 
Так нас шмат складае адно цела ў Хрысту, а паасобку адны адным сяброве.

А паводле дадзенай нам ласкі маем розныя дары: калі дар прароцтва — то згодна з верай,
 
Але, маючы розныя дары, подле ласкі, данае нам: ці прароцтва, подле меры веры;

калі служэнне — то для служэння, калі хто навучае — для навучання,
 
Ці то службы — у службе; ці хто вучэньня — у вучэньню;

калі хто заахвочвае — для заахвочвання; калі хто раздае — у прастаце сэрца, калі хто старшынствуе — дык рупліва, калі хто мілуе — дык з ахвотаю.
 
Ці хто навучае — у навучаньню; хто падзяляецца — у прасьціні; хто кіруе — кіруй улегліва; хто чыне міласэрдзе, чыні рада.

Любоў хай будзе без крывадушнасці. Адварочвайцеся ад ліха, прыгартайцеся да дабра;
 
Міласьць хай будзе без прыдаваньня; гідзьцеся ліха, ліпніце да дабра;

шчыра любіце адзін аднаго братняю любоўю, у пашане адзін аднаго апераджаючы;
 
У брацкай любосьці адны да адных будзьце кукежныя; у павазе адны адных выпераджайце;

у рупнасці не слабейце, духам палаючы, Госпаду служачы,
 
З рупатлівасьцяй не агіляйцеся; духам гарыце; Спадару служыце;

у надзеі будзьце радасныя, у горы цярплівыя, у малітве сталыя,
 
У надзеі цешчася; у ватугах будзьце вытрывалыя, у малітве кажначасныя;

бярыце ўдзел у патрэбах святых, будзьце гасцінныя.
 
Да патрэбаў сьвятых будзьце падзельлівыя, да гасьціннасьці ганіцеся.

Дабраслаўляйце пераследавальнікаў сваіх; дабраслаўляйце, а не кляніце!
 
Дабраслаўце тых, што перасьлядуюць вас; дабраслаўце а ня клініце.

Радуйцеся з тымі, хто радуецца, плачце з тымі, хто плача.
 
Цешчася з тымі, што цешацца; плачча з тымі, што плачуць.

Будзьце між сабой аднадумцамі, не сягайце думкамі высока, але ідзіце ўслед за пакорлівымі. Не будзьце мудрымі самі з сабой.
 
Майце тую самую павагу адны да адных; не мудрагельце высака, але да нізкіх хініцеся; ня будзьце мудрыя ў вачох сваіх;

Не аддавайце злом за зло. Дбайце пра добрае перад усімі людзьмі.
 
Нікому ліхам за ліха не аддавайце; дбайце праз тое, што добрае ў вачох усіх людзёў.

Наколькі магчыма ды наколькі ад вас залежыць, жывіце з усімі людзьмі ў згодзе.
 
Калі магчыма, паколькі залежа ад вас, шукайце супакою з усімі людзьмі.

Не помсціце, умілаваныя, самі за сябе, але дайце месца гневу, як напісана: «Мне помста, Я аддам», — кажа Госпад.
 
Ня імсьціцеся самы, любовыя, але дайце месца гневу Божаму. Бо напісана: «Помста ў Мяне, Я адплачу, кажа Спадар».

Дык, калі будзе галодны вораг твой, накармі яго; калі будзе сасмаглы, дай яму піць. Так вось робячы, вуголле гарачае насыпаеш яму на галаву.
 
Дык, «Калі твой непрыяцель галодны, дай яму есьці; калі сьмягне, дай яму піць, бо, так робячы, ты зьбярэш на галаву ягоную жар».

Не дайся, каб цябе перамагло зло, але перамагай зло дабром.
 
Ня будзь пераможаны ліхам, але перамагай ліха дабром.