1 да Цімафея 2 разьдзел
Першае пасланьне да Цімафея
Пераклад Рыма-Каталіцкага Касцёла → Пераклад Яна Станкевіча
Перш за ўсё, я заклікаю, каб прашэнні, малітвы, просьбы аб заступніцтве і падзякі ўзносіліся за ўсіх людзей:
Дык наўперд дамяняю чыніць просьбы, малітвы, прычыны, падзякі за ўсіх людзёў,
за каралёў і за ўсіх, хто мае ўладу, каб мы маглі весці спакойнае і ціхае жыццё ва ўсёй пабожнасці і годнасці.
За каралёў і за ўсіх, што займаюць высокія становішчы, каб мы ціхое а супакойнае жыцьцё вялі ў кажнай набожнасьці і ўрочыстасьці;
Гэта добра і прыемна ў вачах Бога, Збаўцы нашага,
Бо гэта добра а прыемна Спасу нашаму Богу,
які хоча, каб усе людзі былі збаўлены і дайшлі да пазнання праўды.
Каторы зыча, каб усі людзі спасьліся й дасяглі пазнаньня праўды.
Бо адзін Бог і адзін пасрэднік паміж Богам і людзьмі — Чалавек Езус Хрыстус,
Бо адзін Бог, і пасярэднік памеж Бога й людзёў адзін, чалавек Ісус Хрыстос,
які аддаў сябе самога на водкуп за ўсіх як сведчанне, дадзенае ў адпаведную пару,
Каторы даў Сябе на адкупленьне за ўсіх, праз што сьветчана ўпару,
дзеля чаго я прызначаны прапаведнікам і апосталам. Кажу праўду і не хлушу. Я настаўнік язычнікаў у веры і праўдзе.
Да чога я быў прызначаны за агалашэньніка а апостала (я кажу праўду, не маню) а вучыцеля народаў у веры а праўдзе.
Таму жадаю, каб мужчыны маліліся на кожным месцы, узносячы чыстыя рукі без гневу і спрэчак.
Дык я хачу, каб мужы на кажным месцу маліліся, узьнімаючы пасьвячаныя рукі бяз гневу й сумлеву.
Падобна і жанчыны няхай апранаюцца з належнай стрыманасцю, сціпла і прыстойна, аздабляючы сябе не пляценнем валасоў ці золатам або пэрламі ці каштоўнымі строямі,
Падобна, каб жанкі, у прыходнай адзежы, сьціпла й разумна, прыбіраліся не пляценьням а золатам або пэрламі, або дарагімі ўборамі,
але добрымі ўчынкамі, як належыць жанчынам, што імкнуцца да пабожнасці.
Але добрымі ўчынкамі, што ўходзе жанкам, боязьнь Божую вызнаючым.
Жанчына няхай вучыцца ў ціхасці і ў поўнай паслухмянасці.
Няхай жонка вучыцца моўчыкам з усім паданьням;
А жанчыне не дазваляю навучаць і панаваць над мужам, але няхай застаецца ў ціхасці.
Але я не дазваляю, каб жонка вучыла й мела ўладу над мужам, але хай застаецца ў маўчаньню.
Бо першым быў створаны Адам, а потым Ева.
Бо Адам быў ухормаваны першы, а потым Ева;
І не Адам быў зведзены, але жанчына была зведзеная і зграшыла.
І не Адам быў ашуканы, але жонка, будучы ашуканай, стала выступніцаю;
Яна будзе збаўлена праз нараджэнне дзяцей, калі яны будуць трываць у веры, любові і святасці з развагаю.
Яна, адылі, будзе ўратавана раджэньням дзяцей, калі будзе трываць у веры а ў міласьці а ў сьвятасьці з розумам.
