2 Пятра 1 2-i ліст Пётры 1 разьдзел

¹ Сімон Пётра, паслугач і апостал Ісуса Хрыста, тым, што ў справядлівасці Бога нашага і Збаўцы Ісуса Хрыста атрымалі веру, роўную нашай:

² ласка вам і супакой хай памножацца праз пазнанне Бога і Ісуса, Госпада нашага.

³ Паколькі ўсё нам — ад Боскае магутнасці Яго, падараванай для жыцця і пабожнасці праз пазнанне Таго, Хто паклікаў нас Сваёю славай і дабрадзейнасцю,

⁴ праз якія падараваў Ён нам дарагія і вялікія абяцанні, каб праз іх сталіся мы ўдзельнікамі Божае прыроды, усцярогшыся нікчэмнасці, якая пашыраецца па свеце праз пажадлівасць,

⁵ то менавіта дзеля гэтага старайцеся з усіх сіл, каб у сваёй веры паказаць дабрадзейнасць сваю, а ў дабрадзейнасці веданне,

⁶ а ў веданні паўстрыманасць, а ў паўстрыманасці цярплівасць, а ў цярплівасці пабожнасць,

⁷ а ў пабожнасці браталюбства, а ў браталюбстве любоў.

⁸ Калі гэта ў вас жыве і памнажаецца, то яно не пакіне вас пустымі і бясплоднымі ў пазнанні Госпада нашага Ісуса Хрыста.

⁹ А ў каго гэтага няма, той сляпы і блізарукі, які забыўся аб ачышчэнні ад даўнейшых сваіх грахоў.

¹⁰ Дык тым больш, браты, старайцеся ўгрунтаваць сваё пакліканне і выбранне. Гэтак бо робячы, ніколі не дапусціце аблуд.

¹¹ Бо гэтак яшчэ шырэй адчыніцца вам уваход у вечнае Валадарства Госпада нашага і Збаўцы Ісуса Хрыста.

¹² Таму я буду вам заўсёды прыгадваць гэта, хоць вы ведаеце і перакананыя ў цяперашняй праўдзе.

¹³ Я лічу за справядлівасць, пакуль знаходжуся ў гэтай палатцы, падбадзёрыць вас напамінам,

¹⁴ бо ведаю, што хутка пакіну гэтую палатку маю, як Госпад наш Ісус Хрыстос вызначыў мне.

¹⁵ Буду прыкладаць намаганні, каб вы часта і па маім адыходзе пра гэта ўспаміналі.

¹⁶ Бо мы вясцілі вам магутнасць і прыход Госпада нашага Ісуса Хрыста, не ідучы следам за прыдуманымі казкамі, але як сведкі, што бачылі Яго веліч.

¹⁷ Бо атрымаў Ён ад Бога Айца гонар і славу, калі вось такім чынам прагучаў да Яго голас ад велічнай славы: «Гэта Сын Мой улюбёны, у Якім Я маю ўпадабанне».

¹⁸ І мы чулі, як гэты голас зыходзіў з неба, калі мы з Ім разам былі на святой гары.

¹⁹ Прытым мы маем найпэўнейшае прарочае слова, і вы добра робіце, трымаючыся яго, як светача, які свеціць у цёмным месцы аж пакуль развіднее, і зорка ранняя ўзыдзе ў сэрцах вашых.

²⁰ Гэта перш за ўсе майце на ўвазе, што ніводнае прароцтва Пісання нельга вытлумачыць самавольна.

²¹ Бо не паводле волі чалавечай было калісьці абвешчана прароцтва, але прамовілі яго людзі Божыя, кіраваныя Духам Святым.