3 Яна 1 3-i ліст Яна 1 разьдзел

¹ Старэйшы — дарагому Гаю, якога я люблю ў праўдзе.

² Улюбёны, малюся, каб ты быў спраўны і здаровы так, як спраўная душа твая.

³ Вельмі ўзрадаваўся я з прыбыцця братоў, якія засведчылі праўду тваю ды як ты жывеш у праўдзе.

⁴ Для мяне няма большай радасці, як пачуць, што дзеці мае жывуць у праўдзе.

⁵ Ты, улюбёны, па веры робіш, калі рупішся дзеля братоў і дзеля падарожных,

⁶ якія аддалі сведчанне тваёй любові перад царквою. Ты добра зробіш, калі выправіш іх у дарогу па-божаску.

⁷ Бо выправіліся яны ў дарогу ў імя [Яго], не прымаючы нічога ад паганаў.

⁸ Таму мусім гасцінна прымаць такіх, каб быць саўдзельнікамі праўды.

⁹ Я напісаў крыху для царквы, але той, які хоча мець першынство сярод іх, Дыятрэф, не прымае нас.

¹⁰ Таму вось, калі прыбуду, нагадаю пра яго ўчынкі, што ён зрабіў, плявузгаючы на нас ліхімі словамі; і быццам яму яшчэ гэтага не хапае, сам не прымае братоў і тым, якія прымаюць, перашкаджае і выганяе з царквы.

¹¹ Улюбёны, не наследуй ліхому, але таму, што добрае. Хто добрае робіць, ёсць ад Бога, а хто робіць благое, той не бачыў Бога.

¹² Пра Дэметра ўсе добра сведчаць, і нават сама праўда; і мы таксама сведчым, і ты ведаеш, што сведчанне наша праўдзівае.

¹³ Шмат я меў табе напісаць, але не хачу пісаць табе атрамантам і пяром;

¹⁴ спадзяюся, што хутка цябе ўбачу і тады пагаворым з вуснаў у вусны.

¹⁵ Супакой табе. Вітаюць цябе сябры. Прывітай сяброў пайменна.