Выхад 40 разьдзел
Выхад
Пераклад Антонія Бокуна → Пераклад Васіля Сёмухі
І прамовіў ГОСПАД да Майсея, кажучы:
І наказаў Гасподзь Майсею сказаць:
«У першы месяц, у першы дзень месяца паставіш Сялібу Намёту Спатканьня.
у першы месяц, у першы дзень месяца пастаў скінію сходу,
І паставіш там Каўчэг Сьведчаньня, і закрыеш Каўчэг заслонаю.
і пастаў у ёй каўчэг адкрыцьця, і захіні каўчэг заслонаю;
І ўнясеш стол, і разложыш на ім тое, што належыць, і ўнясеш сьвечнік, і запаліш лямпы ягоныя.
і ўнясі стол і пастаў на ім усе рэчы яго, і ўнясі сьвяцільню і пастаў на ёй лампады яе;
І паставіш ахвярнік залаты для каджэньня перад Каўчэгам Сьведчаньня; і завесіш заслону на ўваходзе ў Сялібу.
і пастаў залаты ахвярнік, каб дыміць перад каўчэгам адкрыцьця, і павесь заслону на ўваходзе ў скінію;
І паставіш ахвярнік цэласпаленьня перад уваходам у Сялібу Намёту Спатканьня.
і пастаў ахвярнік цэласпаленьня перад уваходам у скінію сходу;
І паставіш мыцельнік паміж Намётам Спатканьня і ахвярнікам, і нальеш у яго вады.
і пастаў умывальнік паміж скініяй сходу і ахвярнікам і налі ў яго вады;
І паставіш панадворак наўкола, і завесіш заслону ў браме панадворку.
і пастаў двор вакол і павесь заслону ў браме двара.
І возьмеш алей памазаньня, і памажаш Сялібу і ўсё, што ў ёй, і асьвяціш яе і ўсе прыналежнасьці ейныя, і будзе Сьвятой.
І вазьмі алею памазаньня, і памаж скінію і ўсё, што ў ёй, і асьвяці яе і ўсе прылады яе, і будзе сьвята;
І памажаш ахвярнік цэласпаленьня і ўсё начыньне ягонае, і асьвяціш ахвярнік, і будзе ахвярнік Сьвятым Сьвятых.
памаж ахвярнік цэласпаленьня і ўсе прылады яго і асьвяці ахвярнік, і будзе ахвярнік сьвятыня вялікая;
І памажаш мыцельнік і падставу ягоную, і асьвяціш яго.
і памаж умывальнік і падножжа яго і асьвяці яго.
І наблізіш Аарона і сыноў ягоных да ўваходу ў Намёт Спатканьня, і абмыеш іх вадою.
І прывядзі Аарона і сыноў ягоных да ўваходу ў скінію сходу і абмый іх вадою;
І апранеш Аарона ў адзеньні сьвятыя, і памажаш яго, і асьвяціш яго, і ён будзе сьвятаром Маім.
і апрані Аарона ў сьвяшчэннае адзеньне, і памаж яго, і асьвяці яго, каб ён быў сьвятаром Мне.
І сыноў ягоных наблізіш, і апранеш іх у хітоны,
І сыноў ягоных прывядзі, і апрані іх у хітоны,
і памажаш іх, як ты памазаў бацьку іхняга, і яны будуць сьвятарамі Маімі, і будзе ім памазаньне іхняе на сьвятарства вечнае ў пакаленьнях іхніх».
і памаж іх, як памазаў ты бацьку іхняга, каб яны былі сьвятарамі Мне, і памазаньне іх прысьвеціць іх у вечнае сьвятарства ў роды іхнія.
І зрабіў Майсей усё; як загадаў яму ГОСПАД, так і зрабіў.
І зрабіў Майсей усё: як загадаў яму Гасподзь, так і зрабіў.
І сталася, у першы месяц другога году, у першы дзень месяца была пастаўлена Сяліба.
У першы месяц другога года, у першы дзень месяца пастаўлена скінія.
І паставіў Майсей Сялібу, і палажыў падстаўкі яе, і паставіў дошкі яе, і палажыў жэрдкі яе, і паставіў слупы яе,
І паставіў Майсей скінію, паклаў падножжы яе, паставіў брусы яе, паклаў жэрдкі і паставіў слупы яе,
і расьцягнуў намёт над Сялібай, і палажыў пакрыцьцё намёту зьверху над ім, як загадаў ГОСПАД Майсею.
напяў покрыва над скініяю і паклаў века паверсе гэтага покрыва, як загадаў Гасподзь Майсею.
І ўзяў, і палажыў Сьведчаньне ў Каўчэг, і ўлажыў насілы ў Каўчэг, і палажыў накрыўку на Каўчэг зьверху.
І ўзяў і паклаў адкрыцьцё ў каўчэг, і ўклаў жэрдкі ў колцы каўчэга, і паклаў века на каўчэг зьверху;
І ўнёс Каўчэг у Сялібу, і завесіў заслону, якая вісіць, і засланіў ёю Каўчэг Сьведчаньня, як загадаў ГОСПАД Майсею.
і ўнёс каўчэг у скінію, і павесіў заслону, і засланіў каўчэг адкрыцьця, як загадаў Гасподзь Майсею.
І паставіў стол у Намёт Спатканьня, на паўночным баку Сялібы, звонку ад заслоны.
І паставіў стол у скініі сходу на паўночным баку скініі, паза заслонаю,
І разлажыў шэрагі хлябоў перад абліччам ГОСПАДА, як загадаў ГОСПАД Майсею.
і расклаў на ім рад хлябоў перад Госпадам, як загадаў Гасподзь Майсею.
І паставіў сьвечнік у Намёт Спатканьня насупраць стала, на паўднёвым баку Сялібы.
І паставіў сьвяцільню ў скініі сходу насупраць стала, на паўднёвым баку скініі,
І запаліў лямпы перад абліччам ГОСПАДА, як загадаў ГОСПАД Майсею.
і паставіў лампаду перад Госпадам, як загадаў Гасподзь Майсею.
І паставіў ахвярнік залаты ў Намёце Спатканьня перад заслонаю.
І паставіў залаты ахвярнік у скініі сходу перад заслонаю
І кадзіў на ім пахкім кадзілам, як загадаў ГОСПАД Майсею.
і задыміў на ім пахучае дымленьне, як загадаў Гасподзь Майсею.
І завесіў заслону на ўваходзе ў Сялібу.
І павесіў заслону пры ўваходзе ў скінію;
І ахвярнік цэласпаленьня паставіў каля ўваходу ў Сялібу Намёту Спатканьня, і ахвяраваў на ім цэласпаленьне і ахвяру хлебную, як загадаў ГОСПАД Майсею.
і ахвярнік цэласпаленьня паставіў каля ўваходу ў скінію сходу і прынёс на ім цэласпаленьні і ахвяру хлебную, як загадаў Гасподзь Майсею.
І паставіў мыцельнік паміж Намётам Спатканьня і ахвярнікам, і наліў у яго вады для абмываньня.
І паставіў умывальнік паміж скініяй сходу і ахвярнікам і наліў у яго вады для абмываньня,
І абмывалі ў ім Майсей і Аарон, і сыны ягоныя рукі свае і ногі свае.
і абмывалі зь яго Майсей і Аарон і сыны ягоныя рукі свае і ногі свае;
Калі ўваходзілі ў Намёт Спатканьня і калі набліжаліся да ахвярніка, яны абмываліся, як загадаў ГОСПАД Майсею.
калі яны ўваходзілі ў скінію і падыходзілі да ахвярніка, тады і абмывалі, як загадаў Гасподзь Майсею.
І паставіў панадворак вакол Сялібы і ахвярніка, і завесіў заслону ў браме панадворку. І скончыў Майсей работу.
І паставіў двор вакол скініі і ахвярніка і павесіў заслону ў браме двара. І так закончыў Майсей дзею.
І закрыла воблака Намёт Спатканьня, і слава ГОСПАДА напоўніла Сялібу.
І ўкрыла воблака скінію сходу.
І ня мог Майсей увайсьці ў Намёт Спатканьня, бо ляжала на ім воблака, і слава ГОСПАДА напаўняла Сялібу.
І ня мог Майсей увайсьці ў скінію, бо засланяла яго воблака, і слава Гасподняя напаўняла скінію.
І калі падымалася воблака па-над Сялібаю, тады вырушалі сыны Ізраіля ў-ва ўсе падарожжы свае.
Калі падымалася воблака ад скініі, тады выпраўляліся ў дарогу сыны Ізраілевыя падчас усяго падарожжа свайго;
А калі не падымалася воблака, тады не вырушалі, аж да дня, калі яно падымалася.
калі ж не падымалася воблака, дык і яны не выпраўляліся ў дарогу, пакуль яно не падымалася;
Бо воблака ГОСПАДА было над Сялібай удзень, і агонь быў над ёй уначы перад вачыма ўсяго дому Ізраіля ў-ва ўсіх падарожжах іхніх.
бо воблака Гасподняе стаяла над скініяй удзень, і агонь быў уначы ў ёй перад вачыма ўсяго дома Ізраілевага падчас усяго падарожжа іхняга.
