1 да Фесаланікійцаў 5 разьдзел
Першае пасланьне да Фесаланікійцаў
Пераклад Праваслаўнай Царквы → Пераклад Анатоля Клышкi
А пра часы і тэрміны няма патрэбы пісаць вам, браты,
А да часоў і тэрмінаў, браты, — вы не маеце патрэбы, каб вам пісаць;
бо самі вы дакладна ведаеце, што дзень Гасподні прыйдзе так, як злодзей уначы́.
бо вы самі вельмі добра ведаеце, што як злодзей уначы — так прыходзіць дзень Гасподні.
Бо калі будуць казаць: «мір і бяспека», тады раптам іх насцігне пагібель, як му́ка ў родах насцігае цяжарную, і не пазбе́гнуць.
Калі будуць казаць: «Мір і бяспека», тады прыйдзе на іх раптоўнае знішчэнне, гэтак жа як родавыя мукі — на цяжарную, яны не ўцякуць!
Але вы, браты, не ў цемры, каб дзень той застаў вас, як злодзей;
Але вы, браты, не ў цемры, каб дзень заспеў вас, як злодзей.
бо ўсе вы — сыны святла і сыны дня: мы — не сыны ні ночы, ні цемры.
Бо вы ўсе сыны святла і сыны дня. Мы не належым ні ночы, ні цемры.
Дык вось, не будзем спаць, як іншыя, а будзем пільнымі і цвярозымі.
Дык не будзем спаць, як астатнія, а будзем чуйнымі і будзем цвярозымі.
Бо, тыя, што спяць, уначы́ спяць, і тыя, што ўпіва́юцца, уначы́ упіва́юцца.
Бо тыя, што спяць, спяць уначы, і тыя, што напіваюцца, п’яныя ўначы.
Мы ж, як сыны дня, будзем цвярозымі, апрану́ўшы браню́ веры і любові і шлем надзеі на спасенне,
Але як мы належым дню, то будзем цвярозыя, апранутыя ў панцыр веры і любові і ў шлем — надзею выратавання.
таму што Бог прызна́чыў нас не на гнеў, а на тое, каб мы атрымалі спасенне праз Госпада нашага Іісуса Хрыста,
Таму што Бог нас прызначыў не на гнеў, а на атрыманне выратавання праз нашага Госпада Ісуса Хрыста,
Які памёр за нас, каб мы, ці не спім, ці спім, жылí з Ім разам.
Які памёр за нас, каб мы — ці чуваем, ці спім — жылі разам з Ім.
Таму суцяша́йце адно аднаго і настаўля́йце адно аднаго, як вы і робіце.
Таму навучайце адзін аднаго і будуйце адзін аднаго, як вы і робіце.
Просім жа вас, браты, паважаць тых, хто працуе ў вас, і хто ўзнача́львае вас ў Госпадзе, і хто настаўля́е вас,
І просім вас, браты, паважаць тых, хто працуе між вас, і вядзе вас ў Госпадзе, і навучае вас.
і шанаваць іх асабоіва, з любоўю, за справу іх; жывіце ў міры паміж сабою.
І асабліва высока шанаваць іх любові за іх працу. Жывіце ў міры між сабою.
Закліка́ем вас таксама, браты, абразумля́йце бясчы́нцаў, суцяшайце маладушных, падтры́млівайце сла́бых, будзьце доўгацярплíвымі да ўсіх.
І молім вас, браты: настаўляйце бясчынных, суцяшайце маладушных, падтрымлівайце слабых, будзьце доўгацярплівыя да ўсіх.
Глядзіце, каб ніхто нікому не плаціў злом за зло; а заўсёды шукайце дабра і адзін аднаму, і ўсім.
Глядзіце, каб ніхто нікому не плаціў злом за зло, а заўсёды імкніцеся рабіць дабро і адзін аднаму, і ўсім.
Заўсёды радуйцеся.
Заўсёды радуйцеся,
Няспы́нна маліцеся.
безупынна маліцеся,
За ўсё дзякуйце: бо такая для вас воля Божая ў Хрысце Іісусе.
ва ўсім дзякуйце: бо гэта воля Божая ў Хрысце Ісусе для вас.
Духа не гасíце.
Духа не гасіце;
Прароцтвамі не пагарджа́йце.
прароцтвамі не пагарджайце.
Усё выпрабо́ўвайце, добрага трыма́йцеся.
Але ўсё правярайце. Добрага цвёрда трымайцеся;
Ад усякага роду зла ўстры́млівайцеся.
ад усялякага роду зла ўстрымлівайцеся.
Сам жа Бог міру няхай асвяцíць вас ва ўсёй паўнаце, і няхай ваш дух, і душа, і цела ва ўсёй іх цэласці захаваюцца беззага́ннымі ў прышэсце Госпада нашага Іісуса Хрыста.
І Сам Бог міру няхай асвяціць вас поўнасцю, і ваш дух, і душа, і цела няхай захаваецца ў цэласці беззаганна ў прышэсце нашага Госпада Ісуса Хрыста.
Верны Той, Хто закліка́е вас, Які і здзе́йсніць гэта.
Верны Той, Які заклікае вас, Які і зробіць гэта.
Браты! маліцеся за нас.
Браты! Маліцеся і аб нас.
Вітайце ўсіх братоў пацалу́нкам святы́м.
Вітайце ўсіх братоў святым пацалункам.
Заклінаю вас Госпадам прачытаць гэтае пасла́нне ўсім святы́м брата́м.
Заклінаю вас Госпадам, каб гэты ліст быў прачытаны ўсім [святым] братам.
Благадаць Госпада нашага Іісуса Хрыста з вамі. Амінь.
Ласка нашага Госпада Ісуса Хрыста няхай будзе з вамі. [Амін.]
