1 летапісаў 24 разьдзел

 

 

І во радоўкі сыном Ааронавым: сыны Ааронавы: Надаў а Авігуд, Елеазар а Іфамар.

 

Што да сыноў Аарона — такі іх падзел. Сыны Аарона: Надаб, і Абігу, і Элеязэр, і Ітамар.

Надаў а Авігуд памерлі ўперад за айца свайго, сыноў жа ня было ў іх; і затым сьвятарствавалі Елеазар а Іфамар.

 

А Надаб і Абігу памерлі перад сваім бацькам ды не мелі сыноў; святарства спаўнялі Элеязэр і Ітамар.

І разьдзяліў іх Давід — Садока із сыноў Елеазаровых а Агімелеха із сыноў Іфамаровых, радоўкаю подле іх радоў у службе іхнай.

 

І падзяліў іх Давід: сыноў Элеязэра — з Садокам і сыноў Ітамара — з Ахімелехам адпаведна іх чарзе і службе.

І болей знайшлося галоўных мужоў із сыноў Елеазаровых, чымся із сыноў Іфамаровых. І былі яны разьдзелены: сыном Елеазаровым шаснанцацёх галоўных мужоў дому айцоў іхных, а сыном Іфамаровым асьмёх подле дому айцоў іхных.

 

І выявілася, што сыноў Элеязэра было намнога больш, чым сыноў Ітамара, дык ён выбраў з іх, гэта значыць з сыноў Элеязэра, шаснаццаць кіраўнікоў родаў, і па родах сыноў Ітамара і сем’ях іх — восем кіраўнікоў родаў.

І разьдзялілі іх жэрабям адных ад адных; бо былі старшыя над сьвятыняю і старшыя Божыя із сыноў Елеазаровых і із сыноў Іфамаровых.

 

Затым ён падзяліў абодва роды між сабою жэрабем; таму што было пароўну адных і другіх; і каб кіраўнікі святыні і кіраўнікі Божыя былі як з сыноў Элеязэра, так і з сыноў Ітамара.

І запісаў іх Шэмая Нефанэленак, пісар ізь Левітаў, перад відам караля а князёў, і перад сьвятаром Садокам а Агімелехам Авафаронкам, і перад галавою айцоў сьвятароў а Левітаў: адзін дом айцоўскі ўзяты Елеазару і адзін Іфамару.

 

І Сямэя, сын Натанаэля, пісар паміж левітаў, перапісаў іх перад царом, і кіраўнікоў, і святара Садока, і Ахімэлеха, сына Абіятара, кіраўнікоў родаў святарскіх і левітаў: адзін род за Элеязэра, і другі — за Ітамара.

І выпала жэрабя першае Егоярыву, Едаі другое,

 

А першае жэрабя выпала на Ёярыба, другое — на Ядаю,

Гарыму трэйцяе, Сэорыму чацьвертае,

 

трэцяе — на Гарыма, чацвёртае — на Сэарыма,

Малхію пятае, Міяміну шостае,

 

пятае — на Мэльхію, шостае — на Міяміна,

Гаккоцу сёмае, Авію восьмае,

 

сёмае — на Акоса, восьмае — на Абію,

Ешую дзявятае, Шэхані дзясятае,

 

дзевятае — на Ешуа, дзесятае — на Сахэнію,

Еляшыву адзінанцатае, Якіму двананцатае,

 

адзінаццатае — на Эліясіба, дванаццатае — на Якіма,

Гупу трынанцатае, Ешэвеву чатырнанцатае,

 

трынаццатае — на Гопфу, чатырнаццатае — на Ісбааба,

Вілзе пятнанцатае, Імеру шаснанцатае,

 

пятнаццатае — на Бэльгу, шаснаццатае — на Эмэра,

Гэзыру сямнанцатае, Гапіцэцу асьмінанцатае,

 

семнаццатае — на Гэзіра, васемнаццатае — на Апсу,

Петагу дзевятнанцатае, Езэкіелю дваццатае,

 

дзевятнаццатае — на Пэтагію, дваццатае — на Гэзэхіэля,

Яхіну дваццаць першае, Ґамулу дваццаць другое,

 

дваццаць першае — на Яхіна, дваццаць другое — на Гамула,

Дэлаі дваццаць трэйцяе, Маазі дваццаць чацьвертае.

 

дваццаць трэцяе — на Далаява, дваццаць чацвёртае — на Маазіява.

Гэта прызначаньне ім у службе іхнай прыходзіць да дому СПАДАРОВАГА, подле звычаю іхнага пад Ааронам, айцом іхным, як расказаў СПАДАР, Бог Ізраеляў.

 

Такая была іх чарга, калі прыходзілі ў дом Госпадаў на сваю службу, і па рытуале сваім, і па статуту Аарона, бацькі іх, і па загадзе Госпада, Бога Ізраэля.

І засталыя із сыноў Левавых: із сыноў Амрамовых: Шуваель; із сыноў Шуваелявых: Егда;

 

Затым той, хто застаўся з сыноў Леві: з сыноў Амрама: Субаэль, і з сыноў Субаэля — Ягэдэя.

Ад Рэгавы: із сыноў Рэгавіных галоўны Іша;

 

Таксама з сыноў Рагобіі — кіраўнік Ясія.

Ад Іцгара: Шеломоф; із сыноў Шэломофавых: Ягаф;

 

А з Ісаарытаў — Саламот; з сыноў Саламота— Ягат.

Із сыноў Гэўрона: Ера, Амарв другі, Ягазель трэйці, Екамеам чацьверты.

 

З Гэбранітаў: Ерыяў, Амарыя — другі, Яхазіэль — трэці, Екмаам — чацвёрты.

Із сыноў Узелявых: Міха; із сыноў Мішыных: Шамір.

 

Сын Азіэля — Міха; з сыноў Міхі — Самір;

Брат Мішын Іша; із сыноў Ішыных: Захара.

 

брат Міхі — Ясія; з сыноў Ясіі — Захарыя.

Сыны Мераравы: Маглі а Мушы; із сыноў Яазі: Бено.

 

Сыны Мэрары: Махалі і Мусі. Сыны яго: Язіяў і Бані.

Із сыноў Мерары зь Яазі: Бено а Шогам а Заккур а Іўры.

 

Сын Мэрары: з яго сына Язіява: Саам, і Закхур, і Гебры.

У Маглі — Елеазар; у яго сыноў ня было.

 

Затым з Махалі: сын Элеязэр, які не меў дзяцей.

У Кіша: із сыноў Кішавых: Ерагмель.

 

А сын Кіса — Ерамээль;

Сыны Мушавы: Маглі а Едэр а Ерымоф. Гэта сынове Левітаў подле дому айцоў іхных.

 

сыны Мусі: Махалі, Эдэр і Ярмут. Гэта сыны Леві паводле іх родаў.

І кідалі таксама яны на жэрабя, аднолькава з братамі сваімі, сынамі Ааронавымі, перад відам караля Давіда а Садока а Агімелеха і перад галавамі айцоў сьвятарскіх а левіцкіх: галоўныя айцове аднолькава зь меншым братам сваім.

 

Таксама і яны кідалі жэрабя, як і браты яго, сыны Аарона, перад абліччам цара Давіда і Садока ды Ахімэлеха, і кіраўнікоў родаў святарскіх і левіцкіх, як большыя, так і меншыя: жэрабя ўсіх роўна дзяліла.