1 летапісаў 16 разьдзел

 

 

І прынесьлі скрыню Божую, і пастанавілі яе сярод будану, каторы Давід разапнуў дзеля яе, і абраклі ўсепаленьні а супакойныя аброкі перад відам Божым.

 

Дык перанеслі каўчэг Божы і памясцілі яго ў сярэдзіне палаткі, якую расцягнуў для яго Давід, і ўсклалі цэласпаленні і ахвяры прымірэння перад Богам.

І скончыў Давід паліць усепаленьні а супакойныя аброкі, і дабраславіў люд імям СПАДАРА,

 

І калі Давід скончыў складанне цэласпаленняў ды ахвяры прымірэння, дабраславіў ён народ у імя Госпада.

І раздаў кажнаму Ізраеляніну, ад мужчыны аж да жонкі, кажнаму па букатцы хлеба, і па кавалку мяса, і па коўні віна.

 

Затым надзяліў кожнага ізраэльца ад мужчыны да жанчыны боханам хлеба, і ляпёшкай фінікаў, і фігамі.

І пастанавіў на службу перад скрыняю СПАДАРОВАЮ службітоў зь Левітаў, каб прыпаміналі яны, дзякавалі а выхвалялі СПАДАРА, Бога Ізраелявага:

 

І ён устанавіў перад каўчэгам Госпадавым паслугачоў з левітаў, каб памяталі аб абавязках перад Ім, і славілі, і ўсхвалялі Госпада, Бога Ізраэля:

Асафа за галоўнага, наступным па ім Захару, Ееля а Шэмірамофа а Егіеля а Матыфу а Елява а Венаю а Овед-Едома а Ееля зь лірамі а гусьлямі, а Асафа да гры на цымбалах,

 

Асафа, кіраўніка, і намесніка яго Захарыю, далей Егіэля, і Сэмірамота, і Егіэля, і Матацію, і Эліяба, і Банаю, і Абэдэдома, і Егіэля для ігры на псалтэрыёнах і цытрах, а Асафа, каб граў на цымбалах,

А Венаю а Ягазеля сьвятароў — штачасна трубіць перад скрыняю змовы Божае.

 

Банаю ж і Яхазіэля — святароў, каб трубілі ў трубы заўсёды перад каўчэгам запавету Божага.

Гэтага дня Давід упяршыню даў псальму ў руку Асафа а братоў ягоных, дзякаваць Богу:

 

У той дзень устанавіў Давід у першы раз, каб хвалілі Госпада праз Асафа ды яго братоў:

Дзякуйце СПАДАРУ, гукайце імя Ягонае, абяшчайце меж людаў учынкі Ягоныя;

 

«Слаўце Госпада, прызывайце Яго імя, распавядайце між народамі Яго справы;

Пейце Яму, пейце псальмы Яму, размаўляйце праз усі чудосы Ягоныя;

 

спявайце Яму і спявайце псалмы і распавядайце пра ўсе Яго цуды.

Хваліцеся сьвятым імям Ягоным; хай вяселіцца сэрца шукаючых СПАДАРА;

 

Хваліце Яго святое імя, хай цешыцца сэрца тых, хто шукае Госпада.

Вызукайце СПАДАРА а сілы Ягоныя, шукайце віду Ягонага кажначасна;

 

Шукайце Госпада і магутнасці Яго, аблічча Яго шукайце заўсёды.

Успамінайце дзіва, што Ён учыніў, знакі Ягоныя й суды вуснаў Ягоных,

 

Памятайце пра цуды Яго, якія ўчыніў, аб знаках Яго і судах вуснаў Яго.

Насеньне Ізраелява, слугі Ягоныя, сынове Якава, абраныя Ягоныя!

 

Нашчадкі Ізраэля — Яго паслугачы, сыны Якуба — выбраннікі Яго.

Ён СПАДАР, Бог наш; па ўсёй зямлі суды Ягоныя.

 

Ён, Госпад, Бог наш, Яго прысуды на ўсёй зямлі.

Памятуйце заўсёды змову Ягоную, слова расказанае тысячам пакаленьняў,

 

Памятайце пра Яго запавет вечна, пра Яго слова, якое загадаў на тысячу пакаленняў,

Каторую Ён учыніў із Абрагамам, і прысягу Ягоную Ісаку,

 

пра запавет, які заключыў з Абрагамам, і пра прысягу Яго Ізааку.

І ўстанавіў Якаву права, Ізраелю змоваю вечнаю,

 

І ўстанавіў яго Якубу як закон, і Ізраэлю як Вечны Запавет,

Кажучы: «Табе дам зямлю Канаанскую, павароз спадку вашага».

 

кажучы: “Дам табе зямлю Ханаана, як долю вашай спадчыны”,

Як вашы людзі былі нячысьленыя, як штось малое, і чужаземцы ў ёй,

 

калі былі вы яшчэ нямногімі, нямногія і чужыя ў ёй.

І пераходзілі яны ад народу да народу, і ад каралеўства да іншага люду;

 

І пераходзілі вы з пакалення ў пакаленне, ды ад царства — да другога народа.

Ён не дазволіў людзіне крыўдзіць іх і ганіў каралёў за іх:

 

І не дазволіў нікому крыўдзіць іх, але за іх караў цароў:

«Не чапайце памазанцаў Маіх, і прарокам Маім не рабіце ліха!»

 

“Не кранайце маіх намашчэнцаў дый прарокам маім не рабіце зла”.

Пейце СПАДАРУ, уся зямля, агалашайце дзень у дзень спасеньне Ягонае.

 

Спявайце Госпаду, уся зямля, дзень пры дні абвяшчайце Яго збаўленне,

Павядайце меж паган чэсьць Ягоную, меж усіх людаў чудосы Ягоныя;

 

распавядайце між паганамі Яго славу, ва ўсіх народах Яго цуды.

Бо вялікі СПАДАР а вельмі славуты, і страшнейшы Ён над усі багі,

 

Бо Госпад Магутны і вельмі слаўны і страшны для ўсіх багоў;

Бо ўсі багі людаў — балваны, але СПАДАР нябёсы ўчыніў.

 

бо ўсе багі паганаў — нікчэмныя, Госпад жа нябёсы стварыў.

Слава а вялічча перад відам Ягоным, магутнасьць а радасьць на месцу Ягоным.

 

Слава і веліч перад абліччам Яго, моц і радасць — у Яго месцы.

Прызнайце СПАДАРУ, радзімы людаў, прызнайце СПАДАРУ чэсьць а моц.

 

Аддавайце Госпаду, сем’і народаў, аддавайце Госпаду славу і ўладу;

Прызнайце СПАДАРУ чэсьць імені Ягонага. Прынясіце дар, ды йдзіце перад від Ягоны, сьціце СПАДАРА ў харашыні сьвятасьці.

 

аддавайце Госпаду славу імю Яго, ускладайце ахвяру і прыходзьце перад аблічча Яго, і ў адзенні святочным пакланіцеся Госпаду.

Дрыжы перад Ім, уся зямля: нават сьвет Ён умацаваў, непахісьнецца.

 

Хай уздрыгвае перад Ім уся зямля; Ён бо аснаваў свет непарушны.

Хай радуюцца нябёсы, хай вяселіцца зямля, і хай скажуць меж народаў: «СПАДАР гаспадарствуе!»

 

Хай цешацца нябёсы і радуецца зямля і хай кажуць усе народы: “Госпад валадарыць!”

Раві, мора а паўніня яго, хай цешыцца поле а ўсе, што на ім.

 

Хай шуміць мора і ўсё, што яго запаўняе, хай цешацца палі і ўсё, што на іх існуе,

Тады запяюць дзервы лесавыя перад СПАДАРОМ, бо Ён прыходзе судзіць зямлю.

 

тады хай перад Госпадам славяць Яго дрэвы лясныя, Ён бо прыйшоў судзіць зямлю.

Выхваляйце СПАДАРА, бо добры, бо на векі міласэрдзе Ягонае.

 

Слаўце Госпада, бо Ён добры, бо вечная Яго міласэрнасць.

І кажыце: «Спасі нас, Божа спасеньня нашага! і зьбяры нас, і выбаў нас ад паган, каб мы маглі славіць сьвятое імя Твае і хваліцца ў хвале Тваёй!

 

І кажыце: “Ратуй нас, Божа, Збаўца наш, і збяры нас, і вырві ад народаў, каб славілі мы святое імя Тваё і каб цешыліся песнямі Тваімі.

Дабраславёны СПАДАР, Бог Ізраеляў, ад веку і аж на векі!» І ўвесь люд сказаў: «Амін!», і хваліў СПАДАРА.

 

Дабраславёны Госпад, Бог Ізраэля, на векі вечныя”». Дый увесь народ сказаў: «Амін!» і «Слава Госпаду!»

Давід пакінуў там, перад скрыняю змовы СПАДАРОВАЕ, Асафа а братоў ягоных, каб яны служылі перад скрыняю кажначасна, подле патрэбы кажнага дня,

 

Так пакінуў Давід там, перад каўчэгам запавету Госпада, Асафа і братоў яго, каб спаўнялі паслугу пастаянна перад каўчэгам па рытуале кожнага дня.

І Овед-Едома а братоў ягоных, шасьцьдзясят асьмёх; Овед-Едома Ідуфунёнка а Госу — за брамнікаў,

 

Потым Абэдэдома з шасцюдзесяццю васьмю яго братамі, і Абэдэдома, сына Ідытуна, ды Госу паставіў прыдзвернымі.

А Садока сьвятара а братоў ягоных сьвятароў — перад вітальняю СПАДАРОВАЮ, на ўзвышшу, што ў Ґівеоне,

 

А святара Садока і братоў яго, святароў, паставіў перад скініяй Госпада на ўзгорку, што ў Габаоне,

Да абраканьня ўсепаленьняў СПАДАРУ на аброчніку ўсепаленьня кажначасна, нараніцы і ўвечары, подле ўсёга, што напісана ў Законе СПАДАРОВЫМ, каторы Ён расказаў Ізраелю;

 

каб ускладалі Госпаду на ахвярніку цэласпаленні заўсёды: раніцай і вечарам, паводле ўсяго таго, што напісана ў законе Госпада, які паручыў Ізраэлю.

І зь імі Гэмана а Ідуфуна і іншых абраных, каторыя прызначаны наймя, каб славіць СПАДАРА, бо на векі міласэрдзе Ягонае.

 

І з імі былі Геман і Ідытун і астатнія выбраныя, па імю вызначаныя, каб дзякавалі Госпаду: «Бо навек міласэрнасць Яго».

Пры іх Гэман а Ідуфун з трубамі а цымбаламі, каб граць, і із снадзямі да песьняў Божых; сыноў жа Ідуфуна — ля варот.

 

І з імі Геман і Ідытун славілі Бога, граючы на трубах, і ўдараючы моцна ў цымбалы і іншыя музычныя інструменты; сыноў жа Ідытуна паставіў прыдзвернымі.

І адышоў кажны чалавек да дому свайго; зьвярнуўся й Давід, каб дабраславіць дом свой.

 

Затым вярнуўся ўвесь народ, кожны ў свой дом, і таксама Давід, каб дабраславіць свой дом.