1 Хронікаў 16 1-я Хронікаў 16 разьдзел

¹ Дык перанеслі каўчэг Божы і памясцілі яго ў сярэдзіне палаткі, якую расцягнуў для яго Давід, і ўсклалі цэласпаленні і ахвяры прымірэння перад Богам.

² І калі Давід скончыў складанне цэласпаленняў ды ахвяры прымірэння, дабраславіў ён народ у імя Госпада.

³ Затым надзяліў кожнага ізраэльца ад мужчыны да жанчыны боханам хлеба, і ляпёшкай фінікаў, і фігамі.

⁴ І ён устанавіў перад каўчэгам Госпадавым паслугачоў з левітаў, каб памяталі аб абавязках перад Ім, і славілі, і ўсхвалялі Госпада, Бога Ізраэля:

⁵ Асафа, кіраўніка, і намесніка яго Захарыю, далей Егіэля, і Сэмірамота, і Егіэля, і Матацію, і Эліяба, і Банаю, і Абэдэдома, і Егіэля для ігры на псалтэрыёнах і цытрах, а Асафа, каб граў на цымбалах,

⁶ Банаю ж і Яхазіэля — святароў, каб трубілі ў трубы заўсёды перад каўчэгам запавету Божага.

⁷ У той дзень устанавіў Давід у першы раз, каб хвалілі Госпада праз Асафа ды яго братоў:

⁸ «Слаўце Госпада, прызывайце Яго імя, распавядайце між народамі Яго справы;

⁹ спявайце Яму і спявайце псалмы і распавядайце пра ўсе Яго цуды.

¹⁰ Хваліце Яго святое імя, хай цешыцца сэрца тых, хто шукае Госпада.

¹¹ Шукайце Госпада і магутнасці Яго, аблічча Яго шукайце заўсёды.

¹² Памятайце пра цуды Яго, якія ўчыніў, аб знаках Яго і судах вуснаў Яго.

¹³ Нашчадкі Ізраэля — Яго паслугачы, сыны Якуба — выбраннікі Яго.

¹⁴ Ён, Госпад, Бог наш, Яго прысуды на ўсёй зямлі.

¹⁵ Памятайце пра Яго запавет вечна, пра Яго слова, якое загадаў на тысячу пакаленняў,

¹⁶ пра запавет, які заключыў з Абрагамам, і пра прысягу Яго Ізааку.

¹⁷ І ўстанавіў яго Якубу як закон, і Ізраэлю як Вечны Запавет,

¹⁸ кажучы: “Дам табе зямлю Ханаана, як долю вашай спадчыны”,

¹⁹ калі былі вы яшчэ нямногімі, нямногія і чужыя ў ёй.

²⁰ І пераходзілі вы з пакалення ў пакаленне, ды ад царства — да другога народа.

²¹ І не дазволіў нікому крыўдзіць іх, але за іх караў цароў:

²² “Не кранайце маіх намашчэнцаў дый прарокам маім не рабіце зла”.

²³ Спявайце Госпаду, уся зямля, дзень пры дні абвяшчайце Яго збаўленне,

²⁴ распавядайце між паганамі Яго славу, ва ўсіх народах Яго цуды.

²⁵ Бо Госпад Магутны і вельмі слаўны і страшны для ўсіх багоў;

²⁶ бо ўсе багі паганаў — нікчэмныя, Госпад жа нябёсы стварыў.

²⁷ Слава і веліч перад абліччам Яго, моц і радасць — у Яго месцы.

²⁸ Аддавайце Госпаду, сем’і народаў, аддавайце Госпаду славу і ўладу;

²⁹ аддавайце Госпаду славу імю Яго, ускладайце ахвяру і прыходзьце перад аблічча Яго, і ў адзенні святочным пакланіцеся Госпаду.

³⁰ Хай уздрыгвае перад Ім уся зямля; Ён бо аснаваў свет непарушны.

³¹ Хай цешацца нябёсы і радуецца зямля і хай кажуць усе народы: “Госпад валадарыць!”

³² Хай шуміць мора і ўсё, што яго запаўняе, хай цешацца палі і ўсё, што на іх існуе,

³³ тады хай перад Госпадам славяць Яго дрэвы лясныя, Ён бо прыйшоў судзіць зямлю.

³⁴ Слаўце Госпада, бо Ён добры, бо вечная Яго міласэрнасць.

³⁵ І кажыце: “Ратуй нас, Божа, Збаўца наш, і збяры нас, і вырві ад народаў, каб славілі мы святое імя Тваё і каб цешыліся песнямі Тваімі.

³⁶ Дабраславёны Госпад, Бог Ізраэля, на векі вечныя”». Дый увесь народ сказаў: «Амін!» і «Слава Госпаду!»

³⁷ Так пакінуў Давід там, перад каўчэгам запавету Госпада, Асафа і братоў яго, каб спаўнялі паслугу пастаянна перад каўчэгам па рытуале кожнага дня.

³⁸ Потым Абэдэдома з шасцюдзесяццю васьмю яго братамі, і Абэдэдома, сына Ідытуна, ды Госу паставіў прыдзвернымі.

³⁹ А святара Садока і братоў яго, святароў, паставіў перад скініяй Госпада на ўзгорку, што ў Габаоне,

⁴⁰ каб ускладалі Госпаду на ахвярніку цэласпаленні заўсёды: раніцай і вечарам, паводле ўсяго таго, што напісана ў законе Госпада, які паручыў Ізраэлю.

⁴¹ І з імі былі Геман і Ідытун і астатнія выбраныя, па імю вызначаныя, каб дзякавалі Госпаду: «Бо навек міласэрнасць Яго».

⁴² І з імі Геман і Ідытун славілі Бога, граючы на трубах, і ўдараючы моцна ў цымбалы і іншыя музычныя інструменты; сыноў жа Ідытуна паставіў прыдзвернымі.

⁴³ Затым вярнуўся ўвесь народ, кожны ў свой дом, і таксама Давід, каб дабраславіць свой дом.