1 Хронікаў 24 1-я Хронікаў 24 разьдзел

¹ Што да сыноў Аарона — такі іх падзел. Сыны Аарона: Надаб, і Абігу, і Элеязэр, і Ітамар.

² А Надаб і Абігу памерлі перад сваім бацькам ды не мелі сыноў; святарства спаўнялі Элеязэр і Ітамар.

³ І падзяліў іх Давід: сыноў Элеязэра — з Садокам і сыноў Ітамара — з Ахімелехам адпаведна іх чарзе і службе.

⁴ І выявілася, што сыноў Элеязэра было намнога больш, чым сыноў Ітамара, дык ён выбраў з іх, гэта значыць з сыноў Элеязэра, шаснаццаць кіраўнікоў родаў, і па родах сыноў Ітамара і сем’ях іх — восем кіраўнікоў родаў.

⁵ Затым ён падзяліў абодва роды між сабою жэрабем; таму што было пароўну адных і другіх; і каб кіраўнікі святыні і кіраўнікі Божыя былі як з сыноў Элеязэра, так і з сыноў Ітамара.

⁶ І Сямэя, сын Натанаэля, пісар паміж левітаў, перапісаў іх перад царом, і кіраўнікоў, і святара Садока, і Ахімэлеха, сына Абіятара, кіраўнікоў родаў святарскіх і левітаў: адзін род за Элеязэра, і другі — за Ітамара.

⁷ А першае жэрабя выпала на Ёярыба, другое — на Ядаю,

⁸ трэцяе — на Гарыма, чацвёртае — на Сэарыма,

⁹ пятае — на Мэльхію, шостае — на Міяміна,

¹⁰ сёмае — на Акоса, восьмае — на Абію,

¹¹ дзевятае — на Ешуа, дзесятае — на Сахэнію,

¹² адзінаццатае — на Эліясіба, дванаццатае — на Якіма,

¹³ трынаццатае — на Гопфу, чатырнаццатае — на Ісбааба,

¹⁴ пятнаццатае — на Бэльгу, шаснаццатае — на Эмэра,

¹⁵ семнаццатае — на Гэзіра, васемнаццатае — на Апсу,

¹⁶ дзевятнаццатае — на Пэтагію, дваццатае — на Гэзэхіэля,

¹⁷ дваццаць першае — на Яхіна, дваццаць другое — на Гамула,

¹⁸ дваццаць трэцяе — на Далаява, дваццаць чацвёртае — на Маазіява.

¹⁹ Такая была іх чарга, калі прыходзілі ў дом Госпадаў на сваю службу, і па рытуале сваім, і па статуту Аарона, бацькі іх, і па загадзе Госпада, Бога Ізраэля.

²⁰ Затым той, хто застаўся з сыноў Леві: з сыноў Амрама: Субаэль, і з сыноў Субаэля — Ягэдэя.

²¹ Таксама з сыноў Рагобіі — кіраўнік Ясія.

²² А з Ісаарытаў — Саламот; з сыноў Саламота— Ягат.

²³ З Гэбранітаў: Ерыяў, Амарыя — другі, Яхазіэль — трэці, Екмаам — чацвёрты.

²⁴ Сын Азіэля — Міха; з сыноў Міхі — Самір;

²⁵ брат Міхі — Ясія; з сыноў Ясіі — Захарыя.

²⁶ Сыны Мэрары: Махалі і Мусі. Сыны яго: Язіяў і Бані.

²⁷ Сын Мэрары: з яго сына Язіява: Саам, і Закхур, і Гебры.

²⁸ Затым з Махалі: сын Элеязэр, які не меў дзяцей.

²⁹ А сын Кіса — Ерамээль;

³⁰ сыны Мусі: Махалі, Эдэр і Ярмут. Гэта сыны Леві паводле іх родаў.

³¹ Таксама і яны кідалі жэрабя, як і браты яго, сыны Аарона, перад абліччам цара Давіда і Садока ды Ахімэлеха, і кіраўнікоў родаў святарскіх і левіцкіх, як большыя, так і меншыя: жэрабя ўсіх роўна дзяліла.